ايتا كەتەيىك, وسىدان 10 كۇن بۇرىن باشماچنوە اۋىلىنداعى شارۋا قوجالىعىنا تيەسىلى ساۋىن سيىرلار ءبىر مەزگىلدە قىرىلعان ەدى.
مالىمەتكە قاراعاندا, جانۋارلار سۋاتتان شىعىپ بىرىنەن سوڭ ءبىرى سۇلاپ تۇسكەن. ال ءسال ۋاقىت بۇرىن وسى اۋىلداعى كارتوپ ەگىلگەن القاپتىڭ ماڭايىندا جايىلعان ەكەن.
ۆەتەرينارلار مال ولەكسەلەرىنەن سىناما الىپ, ساراپتاماعا جىبەردى. توپىراق پەن سۋدىڭ دا قۇرامى تەكسەرىلدى.
«توپىراق پەن سۋدان الىنعان سىنامادان پەستيتسيدتاردىڭ قالدىقتارى انىقتالدى. ولار: «ديحلورفوس», «ديمەتوات», «پاراتيونمەتيل», «حلورپيريفوس». وسى 4 پرەپارات جوعارى دەڭگەيدە انىقتالدى. ولار وسىمدىكتەردى ءار ءتۇرلى جاندىكتەردەن قورعاۋ ءۇشىن قولدانىلادى», دەدى ۆەتەريناريالىق باسقارما باسشىسىنىڭ ورىنباسارى اسىلتاس ابىلاي ۇلى.
