وبلىس ورتالىعىنان 17 شاقىرىم جەردەگى كورياكوۆ كولى اس تۇزىمەن تانىمال. تۇزدى سۋ ايدىنى پاۆلودار اۋدانىنىڭ اۋماعىندا, كورياكوۆكا جانە كەمەڭگەر ەلدى مەكەندەرىنە جاقىن جەردە ورىن تەپكەن. كولدىڭ تابانى تەگىس, سوعان سايكەس قار كوپ تۇسكەن جانە جاۋىن-شاشىن مول بولعان جىلدارى كەمەرىنە كەلەدى. اۋماعى 11 مىڭ شارشى مەتردەي بولاتىن كولدىڭ تەرەڭدىگى 70 سانتيمەتردەن اسپايدى. ەكولوگتەردىڭ ايتۋىنشا, ونىڭ تابانىندا جاتقان تۇز قاباتىنىڭ قالىڭدىعى 42 سانتيمەتردەن 76 سانتيمەترگە دەيىن وزگەرىپ وتىرادى ەكەن. جازعى ۋاقىتتا سۋى قىزعىلت تارتىپ, الىستان قاراعاندا وتە اسەرلى كورىنەدى. كولدىڭ ۇستىمەن تۇز تارتقان ەرتەدەگى اعاش كوپىردىڭ باعاندارى دا بۇل جەرگە جاراسا قالعان. الىس-جاقىننان كەلگەن تۋريستەر سۋ ايدىنىن ءجيى قىزىقتاپ, سۋرەتكە تۇسكەندى ۇناتادى.
جەرگىلىكتى تاۋەلسىز ەكولوگتەر ماۋسىم ايىنان بەرى كولدىڭ سۋى وتە تايازدانىپ, بۇرىنعى قىزعىلت رەڭكىنەن اجىراپ بارا جاتقانى جايىندا دابىل قاققان. بۇعان قوسا جەرگىلىكتى اۋىل تۇرعىندارى ونداعى تۇزدى رەتسىز پايدالانىپ, تابيعي بايلىقتى ۇيلەرىنە تاسىپ جاتقان كورىنەدى. وڭىرلىك جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ ماماندارى جۋىقتا كولگە بارلاۋ جۇمىستارىن جۇرگىزىپ, وعان سونشالىقتى قاتەر ءتونىپ تۇرعان جوق دەگەن قورىتىندىعا كەلدى. جۋىردا ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا دا كورياكوۆقا ارنايى بارىپ, جاعدايىمەن تانىستى.
– كورياكوۆكا اۋىلىنىڭ ماڭىنداعى قىزعىلت كولدىڭ جاعدايى پاۆلودار وبلىسىنىڭ عانا ەمەس, ەل تۇرعىندارىن دا الاڭداتىپ وتىرعانىن جاقسى بىلەمىز. ەكولوگيا جانە تابيعي رەسۋرستار ءمينيسترى باستاعان ارنايى كوميسسيا كولدەگى جاعدايدى ءوز كوزىمەن كوردى. كولدىڭ جانىنا تاۋەلسىز ەكولوگتەر, وڭىردەگى قۇزىرەتتى ۆەدومستۆولاردىڭ وكىلدەرى جينالىپ, قازىرگى احۋال تۋرالى باياندالدى. كوميسسيا تابيعي قۇبىلىستارعا, اتاپ ايتقاندا, بيىلعى اپتاپ ىستىققا بايلانىستى سۋ قويماسى تايازدانىپ كەتكەن دەگەن قورىتىندى جاساپ وتىر. وزدەرىڭىز بايقاپ وتىرعانداي, بيىل جاۋىن-شاشىن وتە از. بۇل قۇبىلىس – سونىڭ سالدارى. ەكىنشىدەن, كورياكوۆ كولى مۇنداي جاعدايعا بۇرىندارى دا تاپ بولعان. مىسال ءۇشىن پاۆلودارداعى مۋزەيلەردىڭ بىرىندە كولدىڭ وسىدان 120 جىل بۇرىنعى فوتوسۋرەتى ساقتالعان. وندا سۋ ايدىنىنىڭ مۇلدە قۇرعاپ تۇرعانىن, ءمونوليتتى تۇز قاباتىمەن جابىلعانىن كورۋگە بولادى. سوندىقتان بارلىعى وزگەرەدى, بۇل – تابيعي قۇبىلىس, – دەيدى وڭىرلىك جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ باسشىسى ايگەرىم قابىلتاەۆا.
بۇل جەردە 2020 جىلدان بەرى «مۋلتيسەرۆيس» كومپانياسى تۇز وندىرۋمەن اينالىسادى. ءوندىرىس كولەمى شامالى بولعاندىقتان, ولار ەكولوگيالىق جاعدايعا اسەر ەتە المايدى دەيدى ەكولوگتەر. 2019 جىلى كورياكوۆ زەرتتەلىپ, عالىمدار كول ارتەميا قۇرتىن ءوسىرۋ ءۇشىن قولايسىز دەگەن بايلام جاساعان. سوندىقتان ول تەك اس تۇزىن وندىرەتىن ورىن رەتىندە عانا پايدالانىلادى. كولدە شامامەن 1 ملن 773 مىڭ تونناداي تۇز قورى جيناقتالعان.
