فوتو: اباي وبلىسى اكىمدىگى
اباي وبلىسى اكىمدىگىنىڭ اقپاراتىنشا, ايماقتىڭ الەۋمەتتىك-ەكونوميكالىق دامۋىندا تۇراقتى ءوسىم بايقالىپ وتىر.
«وسى جىلدىڭ العاشقى التى ايىندا ءوڭىر كاسىپورىندارى 673,6 ملرد تەڭگەگە ءونىم ءوندىردى. نەگىزگى ۇلەسى – 56,3% تاۋ-كەن ونەركاسىبى جانە كەنورىندارىن قازۋعا تيەسىلى. بۇل سالادا 379,5 ملرد تەڭگەگە, ال وڭدەۋ ونەركاسىبىندە 269,2 ملرد تەڭگەگە ءونىم شىعارىلدى. وڭىردە اۋىل شارۋاشىلىعى بەلسەندى دامىپ كەلەدى. بۇل سالادا جالپى ءونىم كولەمى 143,7 ملرد تەڭگەنى قۇرادى», دەلىنگەن حابارلامادا.
وبلىس كولەمى بويىنشا ەگىس ەگۋ ناۋقانى تولىعىمەن اياقتالعان. ونىڭ كولەمى جالپى 654,2 گا اۋماقتى قۇرادى.
«ونىڭ ىشىندە ءداندى داقىلدار – 297,3 مىڭ گا, مايلى داقىلدار – 306,2 مىڭ گا, كارتوپ – 7,7 مىڭ گا, كوكونىستەر – 3,6 مىڭ گا, باقشا داقىلدارى – 2 مىڭ گا. ينۆەستيتسيا تارتۋ بويىنشا جۇمىسقا ەرەكشە كوڭىل ءبولىنىپ جاتىر. وتكەن التى ايدا وڭىرگە 230,5 ملرد تەڭگە تارتىلدى. اباي وبلىسىندا قۇرىلىس بەلسەندى قارقىنمەن جۇرگىزىلۋدە. قۇرىلىس جۇمىستارىنىڭ كولەمى 63,1 ملرد تەڭگەنى قۇرادى. جىل باسىنان بەرى 130,1 مىڭ شارشى مەتر تۇرعىن ءۇي پايدالانۋعا بەرىلدى», دەلىنگەن مالىمەتتە.
ءبىرىنشى جارتىجىلدىقتا وبلىستا 11 773 جۇمىس ورنى قۇرىلعان, ونىڭ 7 242-ءسى تۇراقتى.
«جۇمىسپەن قامتۋ ورگاندارىنا جۇمىسقا ورنالاسۋ ءۇشىن 12 282 ادام جۇگىنگەن, ونىڭ ىشىندە 6 512 ادام جۇمىسقا ورنالاستىرىلدى. اقىلى قوعامدىق جۇمىستارعا – 3 074 ادام جىبەرىلدى», دەلىنگەن اقپاراتتا.
