توتەنشە جاعداي ماماندارىنىڭ دەرەگىنشە, «ەرتىس ورمانى» رەزەرۆاتىندا 15 شىلدە كۇنى تۇستە باستالعان ءورت ارادا ءبىر تاۋلىك وتكەندە بارىپ اۋىزدىقتالدى. ەكپىندى جەل مەن اپتاپ ىستىقتىڭ سالدارىنان ءتىلسىز جاۋ ورمان ارالىقتارىندا جىلدام تاراپ, العاشقى ساتتەردە ءورت سوندىرۋشىلەر جالىندى باقىلاي الماعان. جاعدايدىڭ كۇردەلەنىپ بارا جاتقانىن ەسكەرگەن توتەنشە جاعدايلار ءمينيسترى سىرىم ءشارىپحانوۆ پەن پاۆلودار وبلىسىنىڭ اكىمى اسايىن بايحانوۆ وقيعا ورنىندا بولىپ, ورتكە قاتىستى سوڭعى مالىمەتتەردى جاريالاپ وتىرعانىن كوزىمىز شالدى. ورتكە بايلانىستى جەدەل شتاب قۇرىلىپ, عارىشتان مونيتورينگ جاساۋ ارقىلى مالىمەتتەر جينالدى.
توتەنشە جاعدايلار مينيسترلىگىنىڭ ءباسپاسوز قىزمەتى حابارلاعانداي, ءورت شارباقتى اۋدانىنىڭ ستەپنوە جانە باۋىرتال ورمانشىلىقتارىندا ورىن العان. توتەنشە جاعدايلار ءمينيسترى مەن وبلىس اكىمى اۋماقتى اۋەدەن بارلاپ شىقتى. العاشقى تاۋلىكتە 98-ورامداعى ءورت ەرەكشە كۇشەيىپ, بىرنەشە ەلدى مەكەنگە قاۋىپ توندىرگەنى راس. بىرنەشە اۋىلدىڭ حالقىن وزگە اۋماققا كوشىرۋ دە جوسپارلاندى. ابىروي بولعاندا ءورت سوندىرۋشىلەر ءتىلسىز جاۋدىڭ ەكپىنىن توقتاتىپ, ءارى جەلدىڭ باعىتى دا وزگەرىپ ورمان ءورتى تەجەلدى. «ەرتىس ورمانى» رەزەرۆاتىنىڭ اقپاراتىنا سۇيەنسەك, ورتەنگەن اۋماقتىڭ الدىن الۋ اۋدانى 850 گەكتاردى قۇراپ وتىر.
وڭىرلىك توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باسشىسىنىڭ ورىنباسارى, ازاماتتىق قورعاۋ پودپولكوۆنيگى بەرىك وماروۆتىڭ ايتۋىنشا, ورماندى جەرلەردەگى ءورت نەگىزىنەن جالقاراعايلاردىڭ جوعارى بولىكتەرىن شارپىعان. ءتىلسىز جاۋمەن كۇرەسكە جەرگىلىكتى جانە استانا قالاسى مەن شىعىس قازاقستان, قاراعاندى وبلىستارىنىڭ توتەنشە جاعداي كۇشتەرى مەن قۇرالدارى جۇمىلدىرىلعان. 101 تەحنيكا مەن 6 تىكۇشاق, 361 ءورت ءسوندىرۋشى ورماندا لاۋلاعان قىزىل جالىندى اۋىزدىقتاپ, قازىرگى كۇنى اۋماقتاعى وت وشاعىن تولىق ءسوندىرۋ شارالارىن جالعاستىرىپ جاتىر. مي-8 جانە Eurocopter تىكۇشاقتارى ارقىلى سوڭعى ەكى تاۋلىكتە ءورت بولعان جەرلەرگە 144 شارشى مەتر سۋ شاشىلعان.
– تاعى ءبىر ءىرى ءورت وقيعاسى باياناۋىلداعى مەملەكەتتىك ۇلتتىق تابيعي ورمان پاركىندە تىركەلدى. 14 شىلدە كۇنى قىزىلتاۋ اۋىلىنان 20 شاقىرىم جەردە جايىلىمدىق جانە شابىندىق جەرلەردە جالىن تۇتانعان. دالبا ورمان شارۋاشىلىعىنىڭ 115, 117, 118 ورامدارىنا تيەسىلى 20 گەكتار جەر ورتەنگەن. ال اۋماقتا كۇيىك شالعان جەرلەردىڭ جالپى اۋماعى 800 گەكتاردى قۇراپ وتىر. ونداعى جالىندى اۋىزدىقتاۋعا جەرگىلىكتى توتەنشە جاعداي قىزمەتىنىڭ 27 قىزمەتكەرى مەن 7 تەحنيكا, ۇلتتىق پاركتىڭ 22 قىزمەتكەرى, سونداي-اق ەرىكتى ءورت ءسوندىرۋ قۇرىلىمىنان 55 ادام مەن 11 تەحنيكا, جەرگىلىكتى اتقارۋشى ورگانداردان 8 ادام مەن 4 تەحنيكا تارتىلدى. قازىرگى كۇنى ءورتتى تولىق ءسوندىرۋ شارالارى ءجۇرىپ جاتىر, – دەيدى ب.وماروۆ.
بۇعان دەيىن ەكىباستۇزعا قاراستى الكەي مارعۇلان اۋىلى ماڭىندا جانە ءوڭىردىڭ قاراعاندى وبلىسىمەن شەكارالاساتىن جەرلەرىندە دە ءتىلسىز جاۋدىڭ 127 گەكتار جەردى جايپاپ وتكەنى بەلگىلى بولدى. ءورتتىڭ سالدارىنان اتالعان ەلدى مەكەننىڭ تۇرعىندارىنا تيەسىلى 72 ۇساق مال جانىپ كەتكەن. قىردا قاراۋسىز جۇرگەن قوي-ەشكىنى تۇتقيىلدان كەلگەن دالا ءورتى شارپىپ, ءتىرى قالعان ت ۇلىكتەر اراسىندا ءالى دە ءولىپ جاتقاندارى بار كورىنەدى. ارنايى كوميسسيا ازىرشە 70-تەن استام مال قىرىلدى دەپ قانا تانىعان. اۋىل ادامدارى كوميسسيانىڭ بۇل شەشىمىمەن كەلىسپەي وتىرعانىن ايتۋ كەرەك. ماسەلەگە گازەتىمىزدىڭ الداعى نومىرلەرىندە ارنايى توقتالاتىن بولامىز.
جالپى, سوڭعى ءبىر اپتانىڭ ىشىندە پاۆلودار وبلىسى اۋماعىندا ورمان جانە دالا ورتتەرى بويىنشا 35 وقيعا تىركەلگەن. توتەنشە جاعداي قىزمەتىنىڭ ماماندارى مەن ارنايى ورگاندار ءتىلسىز جاۋدان كەلگەن شىعىن مەن كۇيىك شالعان جەرلەردىڭ اۋدانىن انىقتاپ جاتىر.
