ءماجىلىس دەپۋتاتى كەنجەعۇل سەيتجان وڭىرلەرگە ءىسساپارى اياسىندا اتىراۋ وبلىسىنا باردى. وبلىس ورتالىعىنداعى №3 ارناۋلى الەۋمەتتىك قىزمەتتەر كورسەتۋ ورتالىعىنىڭ باسشىلارىمەن كەزدەسىپ, جۇمىسىمەن تانىستى.
ورتالىق بارلىق دارەجەدەگى اقىل-وي كەمىستىگى مەن زاعيپتىعى, باس ميىنىڭ ورگانيكالىق زاقىمدانعاننان كەيىنگى بوگدە ادامنىڭ تۇراقتى كۇتىمىن قاجەت ەتەتىن پسيحونەۆرولوگيالىق پاتولوگياسى بار 3 جاستان 18 جاسقا دەيىنگى مۇگەدەك بالالاردىڭ تۇرۋىنا ارنالعان. قىزمەت الۋشىلارعا ءۇي جاعدايىنا جاقىنداتىلعان, جاسى مەن دەنساۋلىعىن, جەكە قاجەتتىلىكتەرىن ەسكەرە وتىرىپ, ولاردىڭ جەكە دامۋ, الەۋمەتتەنۋ جانە ورتاعا بەيىمدەلۋ دەڭگەيىن ارتتىرۋعا باعىتتالعان ارناۋلى الەۋمەتتىك قىزمەت كورسەتىلەدى.
سونداي-اق دەپۋتات مۇنداعى قىزمەتكەرلەر ءوز ىستەرىنىڭ ماماندارى ەكەنىن ءارى جۇمىستارىن سۇيىسپەنشىلىكپەن ورىندايتىنىن اتاپ ءوتتى. ورتالىق باسشىلىعى تاربيەلەنۋشى بالالارعا بەرىلەتىن اربالار ساپاسىنىڭ تومەندىگى جانە كەي ەرەكشە قاجەتتىلىكتەرى بار بالالارعا قولدانۋ قيىندىق تۋعىزاتىنى جونىندە شاعىمدارىن ايتتى.
***
استانادا سەنات دەپۋتاتى بيبىگۇل جەكسەنباي «Amanat» پارتياسىنىڭ قالالىق فيليالى مەن قالالىق قۇرىلىس باسقارماسىنىڭ وكىلدەرىمەن بىرگە ەلورداداعى ق.مۇڭايتپاسوۆ اتىنداعى ورتالىق ستاديوندا بولدى.
سپورت عيماراتى بىرنەشە جىل بۇرىن اپاتتى جاعدايعا بايلانىستى جابىلعان بولاتىن. دەپۋتاتقا ساپار بارىسىندا فۋتبول ورتالىعىنىڭ جاڭا قۇرىلىسىنىڭ جوباسى تانىستىرىلدى. بۇدان بۇرىن وسى ستاديونعا كۇردەلى جوندەۋ جۇمىستارىن جاساۋ كوزدەلگەن بولاتىن. ماماندار ماسەلەنى زەردەلەي كەلىپ, ونى جاڭادان سالعان ءتيىمدى ەكەنى انىقتالدى. قازىرگى كەزدە الەمدىك ستاندارتتار بويىنشا فۋتبول بىرىنشىلىكتەرىن وتكىزۋ مۇمكىندىگى بار 4 500 ورىندىق تولىققاندى ستاديون سالۋ تۋرالى شەشىم قابىلدانعانى ايتىلدى. جوبا بويىنشا تەك فۋتبول عانا ەمەس, سونىمەن قاتار ستاديون اۋماعىندا بالالار مەن جاسوسپىرىمدەردىڭ سپورتپەن شۇعىلدانۋ مۇمكىندىگى قاراستىرىلعان.
دەپۋتات بيبىگۇل جەكسەنباي ءوز كەزەگىندە بالالار مەن جاسوسپىرىمدەردىڭ جان-جاقتى دامۋى ءۇشىن قولايلى جاعدايلار جاساۋ, ونىڭ ىشىندە ونەردى زەرتتەۋ جانە سپورتپەن شۇعىلدانۋ مەملەكەتتىڭ باسىمدىعى بولىپ سانالاتىنىن جەتكىزدى. ءبىلىمدى, تاربيەلى جانە دەنى ساۋ ۇرپاق ۇلتتىڭ ەڭ قىمبات يگىلىگى ەكەنىن جەتكىزدى. كەزدەسۋ بارىسىندا سەناتورعا استانادا سالىنۋى جوسپارلانعان باسقا دا نىساندار بويىنشا اقپارات ايتىلدى.
***
ءماجىلىس دەپۋتاتى, «Amanat» فراكتسياسىنىڭ مۇشەسى ەرلان ابديەۆ تۇركىستان وبلىسى قازىعۇرت اۋدانىنىڭ امانكەلدى ەلدى مەكەنىنە بارىپ, جالپى ورتا ءبىلىم بەرەتىن مەكتەپتىڭ قۇرىلىس جۇمىسىمەن تانىستى.
وندا 150 ورىنعا ارنالعان قوسىمشا مەكتەپتىڭ قۇرىلىسىن جۇرگىزىپ جاتقان مەردىگەرمەن جانە تاپسىرىس بەرۋشىمەن نىسانداردى سالۋ ۇدەرىسىندە تۋىندايتىن پروبلەمالىق ماسەلەلەردى تالقىلادى. اتالعان نىسان 2022 جىلدىڭ مامىر ايىندا باستالعان, قارجىنىڭ جەتىسپەۋشىلىگىنە بايلانىستى قۇرىلىس توقتاپ, بيىلعى جىلدىڭ ناۋرىز ايىندا قارجىسى ءبولىنىپ, قازىرگى تاڭدا قۇرىلىس جۇمىستارى قارقىندى جۇرگىزىلۋدە.
ساپار بارىسىندا دەپۋتات قۇرىلىسى ءجۇرىپ جاتقان ساراپحانا اۋىلدىق وكرۋگى, مايلىوشاق ەلدى مەكەنىنەن 200 ورىندىق ا.بايتۇرسىنوۆ اتىنداعى جالپى ورتا مەكتەبىنە باردى. ءبىلىم وشاعىنىڭ قۇرىلىسىن «ومىرزاق» جشس جۇرگىزۋدە. قۇرىلىس 2021 جىلى باستالعان. بيىل جەلتوقسان ايىنا دەيىن اياقتالۋى ءتيىس. ءماجىلىس دەپۋتاتى قوس نىساندى ارالاۋ بارىسىندا قۇرىلىستىڭ بىرقاتار اتقارىلۋى ءتيىس جۇمىستارىنا نازار اۋداردى.
***
سەناتور قايرات تاستەكەەۆ اباي وبلىسىنداعى اقسۋات جانە كوكپەكتى اۋداندارىنىڭ تۇرعىندارىمەن جانە ءماسليحات دەپۋتاتتارىمەن كەزدەستى.
سەناتور كەزدەسۋ بارىسىندا تۇرعىندارمەن سويلەسىپ, ايماقتىڭ جاعدايىمەن تانىستى. دەپۋتات سونداي-اق VIII سايلانعان پارلامەنتتىڭ ءبىرىنشى سەسسياسى اياسىندا اتقارىلعان جۇمىستار تۋرالى تۇرعىنداردى حاباردار ەتتى.
«سەنات وسى ۋاقىت ىشىندە مەملەكەت باسشىسىنىڭ ەلىمىزدى جاڭعىرتۋ جونىندەگى رەفورمالارىن زاڭنامالىق قامتاماسىز ەتۋ جونىندە اۋقىمدى جۇمىس اتقاردى. پارلامەنت ءۇش ايدا 25 زاڭ قابىلدادى. ونىڭ ىشىندە 10 زاڭ دەپۋتاتتىق كورپۋستىڭ باستاماسىمەن ازىرلەندى», دەدى سەناتور.
كەزدەسۋ سوڭىندا تۇرعىنداردى تولعاندىراتىن ماسەلەلەر تالقىلاندى جانە پارلامەنت قابىلداعان زاڭدار بويىنشا جان-جاقتى پىكىر الماسۋ ورىستەدى.
***
ءماجىلىس دەپۋتاتى, «Amanat» فراكتسياسىنىڭ مۇشەسى باۋىرجان سماعۇلوۆ شاحتينسك قالاسىندا بولىپ, «شاحتينسكتەپلوەنەرگو» جشس-عا تيەسىلى جەرگىلىكتى جىلۋ ەلەكتر ورتالىعىنا باردى.
ساپار بارىسىندا حالىق قالاۋلىسى جىلۋ ەلەكتر ورتالىعىنداعى بىرقاتار ماسەلەنى انىقتادى. ونى ۋاقتىلى شەشپەگەن جاعدايدا, قالا تۇرعىندارى قىستا جىلۋسىز قالادى. بيىل مامىردا 1, 3, 4-قازاندىقتاردى جوندەۋ جۇمىسى باستالدى. بۇل جۇمىس 15 قىركۇيەكتە اياقتالۋى ءتيىس. دەپۋتات جەو-نى جاڭعىرتۋ ماسەلەسىن ءوز باقىلاۋىنا الاتىنىن مالىمدەدى.
جالپى, قاراعاندى وبلىسىندا جالپى 247,3 شاقىرىم جىلۋمەن جابدىقتاۋ جەلىلەرىن كۇردەلى جوندەۋدەن وتكىزۋ جانە قايتا جاڭعىرتۋ, 320 شاقىرىم ەلەكترمەن جابدىقتاۋ جەلىلەرىن كۇردەلى جوندەۋدەن وتكىزۋ جانە قايتا جاڭعىرتۋ, 110,8 شاقىرىم سۋ بۇرۋ جەلىلەرىن جانە تاعى باسقالاردى كۇردەلى جوندەۋدەن وتكىزۋ جانە رەكونسترۋكتسيالاۋ جوسپارلانۋدا.
***
سەنات دەپۋتاتتارى ءالي بەكتاەۆ, مۇرات قادىربەك جانە اليشەر ساتۆالديەۆتىڭ تۇركىستان وبلىسىنداپعى ساپارى قازىعۇرت اۋدانىندا جالعاستى.
ونەر مەكتەبىندە جەرگىلىكتى تۇرعىندارمەن بولعان كەزدەسۋگە ارداگەرلەر كەڭەسىنىڭ مۇشەلەرى, كاسىپكەرلەر مەن شارۋالار, اۋداندىق ءماسليحات دەپۋتاتتارى جانە قوعامدىق ۇيىمداردىڭ وكىلدەرى قاتىستى. سەناتورلار كەزدەسۋ بارىسىندا قابىلدانعان ۇلتتىق جانە حالىقارالىق زاڭنامانىڭ باپتارى مەن وعان تولىقتىرۋلار تۋرالى جينالعاندارعا جان-جاقتى ءتۇسىندىرىپ, وڭىردەگى ماسەلەلەر بويىنشا پىكىر الماستى. اڭگىمە بارىسىندا مەملەكەتتىك شەكارانىڭ توزعان باعاناسىن, جولداردى, كۇردەلى جوندەۋدى قاجەت ەتەتىن نىسانداردى رەتكە كەلتىرۋ, سونداي-اق اۋداندا تۋريزم سالاسىن دامىتۋ, كاسىپكەرلىكتى قولداۋ جانە شارۋالارعا تومەن پايىزبەن نەسيە بەرۋ سياقتى ماسەلەلەر قوزعالدى. سەناتورلار ءوز كەزەگىندە كوتەرىلگەن بارلىق ماسەلەلەر پارلامەنتتىڭ الداعى سەسسياسى بارىسىندا ولاردىڭ نازارىندا بولاتىنىن اتاپ ءوتتى.
پارلامەنتشىلەر سونىمەن قاتار شاربۇلاق اۋىلدىق وكرۋگىنىڭ اقباستاۋ ەلدى مەكەنىندەگى 150 ورىندىق مەكتەپكە بارىپ, سونداي-اق قوسىمشا سالىنىپ جاتقان اۋىز سۋ قويماسى قۇرىلىسىنىڭ بارىسىمەن تانىستى.
