ءماجىلىس دەپۋتاتتارى امانتاي جارقىنبەك پەن نۇرجان اشىمبەتوۆ جۇمىس ساپارىمەن پاۆلودار وبلىسىنا بارىپ, اقسۋ قالاسىنداعى بىرقاتار الەۋمەتتىك نىساننىڭ قۇرىلىسىمەن تانىستى.
ماجىلىسمەندەر اقسۋ قالاسىنا قاراستى پوگرانيچنيك اۋىلىنا ساپارى بارىسىندا پروبلەمالىق نىسانعا اينالعان فەلدشەرلىك امبۋلاتوريا مەن دەنە شىنىقتىرۋ-ساۋىقتىرۋ كەشەندەرىن ارالادى. قازىردىڭ وزىندە ولاردىڭ قۇرىلىسى بەكىتىلگەن كەستەدەن كەشىگىپ جاتىر. امبۋلاتوريا مەردىگەرى ونىڭ مەرزىمىندە ىسكە قوسىلاتىنىن ايتتى. دەگەنمەن دەپۋتاتتاردىڭ پىكىرىنشە, جوبا تولىقتىرۋ مەن تۇزەتۋدى قاجەت ەتەتىندىكتەن, جۇمىس كولەمى ارتۋى مۇمكىن.
سونىمەن قاتار دەپۋتاتتار اقسۋ قالاسىنداعى ماگيسترالدىق جانە تاراتۋشى جىلۋ جەلىلەرىن قايتا جاڭعىرتۋ جۇمىستارىمەن تانىستى. ماجىلىسمەندەر جۇمىسپەن قامتۋدىڭ جول كارتاسى اياسىندا قۇرىلىسى 2021 جىلى باستالعان مۇز سارايىندا دا بولدى. بۇگىندە ونىڭ ىرگەتاسى عانا قۇيىلعان, قۇرىلىس ءالى سوزىلىپ جاتىر. ساپار سوڭىندا دەپۋتاتتار ازاماتتاردى قابىلداپ, تالاپ-تىلەكتەرىن تىڭدادى. تۇرعىندار جايىلىم جەرلەرگە قاتىستى ساۋالدارىن قويدى.
* * *
سەنات دەپۋتاتتارى جانبولات جورگەنباەۆ, گەننادي شيپوۆسكيح, زاكيرجان كۋزيەۆ الماتى وبلىسىنا باردى. دەپۋتاتتار قوناەۆ قالاسىنا ساپار بارىسىندا سۋارۋ جۇيەسىن جاڭعىرتۋ جونىندەگى قۇرىلىس جۇمىستارىنىڭ بارىسىمەن تانىسىپ, سۋ پايدالانۋشى شارۋاشىلىقتاردىڭ وكىلدەرىمەن كەزدەستى.
سۋ پايدالانۋ شارۋاشىلىقتارىنىڭ وكىلدەرىمەن كەزدەسۋ بارىسىندا سەناتورلار سۋمەن جابدىقتاۋعا, سۋ جيناۋ قۇرىلىستارىنداعى سانيتارلىق-قورعاۋ ايماقتارىن كۇتىپ ۇستاۋعا, سۋ شارۋاشىلىعى وبەكتىلەرىن تازالاۋعا جانە كۇردەلى جوندەۋگە بايلانىستى وزەكتى ماسەلەلەردى تالقىلادى.
سەناتورلاردىڭ ساپارى ىلە اۋدانىندا ودان ءارى جالعاستى. وندا سەناتورلار قاراوي اۋىلدىق وكرۋگىنە تيەسىلى «شالا» جانە «قۇرالاس» ارنالارىنىڭ جاي-كۇيىمەن, اششىبۇلاق اۋىلدىق وكرۋگىندەگى تازارتۋ قۇرىلىسىنىڭ بارىسىمەن تانىسىپ, سۋ پايدالانۋ شارۋاشىلىقتارىنىڭ وكىلدەرىمەن كەزدەستى.
* * *
ءماجىلىس دەپۋتاتتارى ەربولات ساتىبالدين مەن امانجول ءالتاي ۇلىتاۋ وبلىسىنىڭ جەزقازعان قالاسىنا قاراستى كەڭگىر كەنتىندە ورنالاسقان قۇس فابريكاسى قۇرىلىس ونىڭ جۇمىسىمەن تانىستى.
«احتياموۆ» شارۋا قوجالىعى – «Amanat» پارتياسىنىڭ سايلاۋالدى باعدارلاماسىن ورىنداۋدىڭ جول كارتاسىنداعى نىسانداردىڭ ءبىرى. سوندىقتان ونىڭ ساپالى ءارى ءوز ۋاقىتىندا اياقتالۋىن پارتيا ءوز باقىلاۋىندا ۇستاپ وتىر. فابريكا قۇس ەتى, جۇمىرتقا جانە قۇراما جەم وندىرۋمەن اينالىسادى.
وڭىرگە ارنايى بارعان ءماجىلىس دەپۋتاتتارى فابريكانىڭ جۇمىسىمەن تولىق تانىسىپ شىقتى. وبلىستا قۇس ونىمدەرىن تۇتىنۋى 3 500 توننا بولسا, بۇل فابريكا سونىڭ 30 پايىزىن وتەيدى. بۇل جەرگىلىكتى ءونىم ءوندىرىپ, ونى نارىققا شىعارۋ ءۇشىن ۇلكەن مۇمكىندىك بەرەدى.
* * *
سەنات دەپۋتاتتارى ەرنۇر ايتكەنوۆ پەن التىنبەك نۋح ۇلى ەكىباستۇزداعى جىلۋ ەنەرگەتيكا ورتالىعىنا بارىپ, جوندەۋ-قالپىنا كەلتىرۋ جۇمىستارىنىڭ بارىسىمەن تانىستى.
دەپۋتاتتار جەو-دا جوندەۋ-قالپىنا كەلتىرۋ جۇمىستارى ءجۇرىپ جاتقان ۋچاسكەلەردى قارادى جانە جىلۋ بەرۋ ماۋسىمىنا دايىندىق ۇدەرىسىنە كۋا بولدى. ستانسادا بارلىق 10 قازاندىقتى جوندەۋ قاراستىرىلعان, ونىڭ ىشىندە 8 قازاندىقتا كۇردەلى جوندەۋ جۇمىستارى جاسالادى. سۋ جىلىتاتىن 5 قازاندىققا بيۋدجەت قارجىسى ەسەبىنەن كۇردەلى جوندەۋ جۇرگىزىلەدى. سونداي-اق 5 ەنەرگەتيكالىق قازاندىقتى, قوسالقى جابدىقتاردى, عيماراتتار مەن قۇرىلىستاردى كۇردەلى جانە اعىمداعى جوندەۋ جۇمىستارىن جاساۋ جوسپارلانىپ وتىر.
* * *
ءماجىلىس دەپۋتاتتارى ەركەبۇلان مامبەتوۆ پەن دميتري كولودا سولتۇستىك قازاقستان وبلىسىنىڭ پەتروپاۆل قالاسىنا باردى. وندا ماناش قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندەگى جاتاقحانا ماسەلەسىن تالقىلادى.
1 200 ورىنعا ارنالعان ەكى ستۋدەنتتىك جاتاقحانا پەتروپاۆل قالاسىنىڭ ورتالىعىندا وقۋ ورنى 500 مەتر قاشىقتىقتا ورنالاسادى. قۇرىلىس بەلسەندى قارقىنمەن ءجۇرىپ جاتىر, قازىر نىساندا 90 ادام جۇمىس ىستەيدى, مەردىگەر – جەرگىلىكتى «وسنوۆانيە» جشس. مەردىگەردىڭ ايتۋىنشا, جاتاقحانا 2024 جىلدىڭ تامىزىنا دەيىن دايىن بولادى. قۇرىلىستىڭ التى ايعا كەشىكتىرىلۋىنىڭ سەبەبى – تەندەردىڭ باسقا قاتىسۋشىسىنىڭ داۋلاسۋىنا بايلانىستى سوت پروتسەسى وتكەن.
«جىلۋ مەن سۋ بولماسا, وبەكت ىسكە قوسىلمايدى. ءبىز پەتروپاۆل اكىمدىگىنەن جاقىن جەردە ورنالاسقان ءۇش ءۇيدى ساتىپ الۋ كەرەك دەگەن ماردىمسىز جاۋاپ الدىق. ەگەر قاراشا-جەلتوقسان ايلارىندا ينفراقۇرىلىم جاسالماسا, وندا مەردىگەردىڭ پايدالانۋعا بەرىلۋى ءالى بەلگىسىز ۋاقىتقا كەشىكتىرىلەدى. ول قىستا ىشكى جۇمىستاردى جۇرگىزە المايدى», دەدى ەركەبۇلان مامبەتوۆ.
* * *
سەنات دەپۋتاتى امانگەلدى تولاميسوۆ شىعىس قازاقستان وبلىسىندا بولىپ, ايماق تۇرعىندارىمەن كەزدەستى.
سەناتور وڭىرگە ساپار بارىسىندا اباي وبلىسىنىڭ اياگوز اۋدانىنداعى بىرقاتار الەۋمەتتىك نىسانداردى ارالادى, ەمحانالاردىڭ جۇمىسىمەن, قالا قۇرىلىسىنداعى پروبلەمالارمەن تانىستى.
«سەناتتىڭ قازىرگى كەزدەگى نەگىزگى مىندەتتەرىنىڭ ءبىرى وڭىرلەردىڭ مۇددەسىن ءبىلدىرۋ. وسىعان بايلانىستى ءبىزدىڭ جۇمىسىمىزعا جەرگىلىكتى ماڭىزى بار پروبلەمالىق ماسەلەلەرمەن تانىسۋ اسا ماڭىزدى. سوندىقتان وڭىرلەردىڭ تۇرعىندارىمەن مۇنداي كەزدەسۋلەردىڭ بىزگە كومەگى زور. سىزدەر كوتەرگەن بارلىق ماسەلەلەردى ۇدايى باقىلاۋدا ۇستايتىن بولامىز», دەدى سەناتور.
سەناتور سونىمەن قاتار وڭىردەگى «جايلى مەكتەپ» جوباسىن ىسكە اسىرۋ بارىسىمەن دە تانىستى.
