كورەرمەندى وزىنە باۋراپ اكەتەتىن الىپ قۋات – كەنەپتەگى مەيىرىم شۋاعى. سەزىم جاڭبىرىن سىركىرەتكەن ساعىنىش ەسكەن سۇلبالار. سۋرەتشى تابيعات كورىنىسىنەن العان العاشقى اسەرىن العاۋسىز جەتكىزۋگە ۇمتىلادى. مىڭ قۇبىلعان اشىق ءتۇستى بوياۋ ۇندەستىگىن ول الدىمەن كورىپ, سودان سوڭ قابىلداپ بارىپ بوياۋ تۇستەرى ارقىلى كەنەپ بەتىنە تۇسىرەدى. ءبىر ولكەنىڭ تامسانارلىق سۇلۋلىعىن جىلدىڭ ءار مەزگىلىندە جالىقپاي بەينەلەۋگە بار. جيەنباي ورىنباەۆتىڭ گرافيكاسىنا كومپوزيتسيانىڭ قاراپايىمدىلىعى مەن ايقىندىلىعى, ىقشامدىلىق, تازالىق, اشىق ءتۇس, سۇلبالاردىڭ ناقتىلىعى ءتان.
شىعارماشىلىعى كوپ جانرلى بولعانىمەن, سۋرەتشى اۋىل تاقىرىبىن, تابيعات پەيزاجدارىن جىرلاعاندا تالانت قۋاتى تاسقىنداي تۇسەتىندەي. ونىڭ قالامىنداعى ايرىقشا باعالانعان شوقتىعى بيىك تۋىندىلار وسى تاقىرىپتارعا تيەسىلى. اۋىل كورىنىسىنىڭ ليريكالىق پەيزاجى مەن تابيعاتتىڭ شەكسىز سۇلۋلىعى ومىرگە اسەمدىك سىيلايدى.
«سۋرەتشى بوياۋ ماسساسىن تەڭەستىرۋگە, كومپوزيتسيانىڭ بارلىق ەلەمەنتتەرىن ىرعاقتى ۇيىمداستىرۋعا, الەمنىڭ مانەرلىلىگىن بۇزباي, فورمالاردىڭ وزىندىك اۋەنىن جاساۋعا تىرىسادى. ءوز اۆتوپورترەتىندەگى اشىق بەت الپەتى مەن ويلى كوزدەرى سۋرەتشىنىڭ رۋحاني ىشكى دۇنيەسىن كورەرمەنمەن بولىسكەندەي. ال «اۋىلداعى كۇز» شىعارماسىندا جوعارى قاراي ورلەگەن قازداردىڭ قيمىل-قوزعالىس فورمالارىنىڭ ءدال بەينەلەنۋى بايقالادى. سونىمەن قاتار «بالالىق شاق تۋرالى ەستەلىك», «قۇربىلار» اتتى تۋىندىلارىندا اق كيمەشەكتەگى ۇرشىق ءيىرىپ وتىرعان اجەلەردىڭ بەينەلەرىنەن سوناۋ بالالىق شاقتىڭ ەستەلىگى مەن تۋعان جەرگە دەگەن ساعىنىش سەزىمى ەسەدى. سۋرەتشى تابيعات جاعدايىنىڭ نيۋانستارىن, سىرعىپ بارا جاتقان سەزىمتال ءبىر ساتتىك سۇلۋلىقتى نازىكتىكپەن قابىلداپ, ليريكتىڭ كوزىمەن كورەدى», دەيدى ونەرتانۋشى لاۋرا ابىلداەۆا.
جيەنباي ورىنباەۆ 1962 جىلى قازىرگى تۇركىستان وبلىسى سارىاعاش اۋدانىندا دۇنيەگە كەلدى. تاشكەنت پەداگوگيكالىق ينستيتۋتىنىڭ كوركەمسۋرەت-گرافيكا فاكۋلتەتىن ءتامامدادى. كوپتەگەن حالىقارالىق جانە رەسپۋبليكالىق كورمەلەردىڭ قاتىسۋشىسى. ءوزىنىڭ شىعارماشىلىق قىزمەتىن وقىتۋشىلىقپەن ۇشتاستىرعان تالانت يەسى قازىرگى تاڭدا بولاشاق قىلقالام شەبەرلەرىن باۋلىپ ءجۇر.
الماتى
