شاڭسورعىشتان روبوت, كىر جۋاتىن ماشينادان ۇشقىش جانە كولىك بولشەكتەرىنەن تەرميناتور قۇراستىرعان ءتىس دارىگەرى وسى كۇنگە دەيىن 40-تان اسا ءمۇسىن جاساپتى. بۇگىندە قۋانىش مۇحامەدجانوۆتىڭ ۇيىندەگى مۇراجايىنا كەلۋشىلەر سانى ارتىپ, تالعار قالاسىنداعى قىزىقتى نىساننىڭ بىرىنە اينالعان. ءتىپتى شەتەلدىك تۋريستەر دە ات باسىن بۇرىپ تۇرادى.
– كەيىنگى ءبىر جىلدا 10 ءمۇسىن جاسادىم. ولاردىڭ اراسىندا ەكى گوريللا, وپتيمۋس پرايم جانە ايداھار بار. كوپكە تانىمال ۆاللي روبوتتىڭ دا كوشىرمەسىن جاسادىم. ولاردىڭ بارلىعى تۇرمىستىق تەمىر قالدىقتارىنان قۇراستىرىلعان. قازىر پلاستيك قالدىقتارمەن جۇمىس ىستەپ جاتىرمىن, – دەيدى ارت-ءمۇسىنشى قۋانىش مۇحامەدجانوۆ.
شەبەر ۇنەمى شەبەرلىگىن شىڭداپ, شەتەلدىك ارىپتەستەرىمەن تاجىريبە الماسىپ وتىرادى. بولاشاقتا بۇرىنعىدان دا كۇردەلى مۇسىندەر جاساپ, شەتەلدىك شەبەرلەرمەن ورتاق جوبانى قولعا الماق. ماسەلەن, مۋزەيدەگى ۇلكەن گوريللانى ءبىراز جىل بۇرىن بريتاندىق ءمۇسىنشى كولىكتىڭ بامپەرىنەن قۇراستىرىپتى. ال تالعارلىق شەبەر تۇرمىستىق پلاستيكالىق قالدىقتاردان جاساعان. گوريللا جوباسى وسىلاي باستالعان. ولاردىڭ سالماعى 300 كيلو جانە تەك قايتا وڭدەلگەن پلاستيكتەن قۇراستىرىلادى. ەكس-ستوماتولوگتىڭ ەندىگى ماقساتى – مۇراجاي اۋماعىن ۇلعايتىپ, مۇسىندەر ءتۇرىن كوبەيتۋ. وعان قوسا بالالارعا ارنالعان كەيىپكەرلەردەن ەرەسەكتەرگە ارنالعان مۇسىندەر قۇراستىرۋعا نيەتتەنىپ وتىر.
