«بۇگىن ءبىز ەلوردانى دامىتۋدىڭ وزەكتى ماسەلەلەرىن تالقىلاۋ ءۇشىن جينالىپ وتىرمىز. بيىل باس قالامىزدىڭ قۇرىلعانىنا 25 جىل تولدى. استانا شيرەك عاسىر ىشىندە زاماناۋي ءىرى قالاعا اينالدى. كوپ جۇمىس اتقارىلدى. جەتىستىكتەرىمىز از ەمەس. ەلوردا كۇن ساناپ ۇلعايىپ كەلە جاتىر. تۇرعىندار سانى ايتارلىقتاي كوبەيدى. الداعى جىلدارى قالا حالقىنىڭ سانى 1,5 ميلليونعا جەتەدى دەگەن بولجام بار. بۇدان دا كوپ بولۋى ابدەن مۇمكىن. بىراق, قالانىڭ باس جوسپارىندا بۇل جاعداي تولىق ەسكەرىلمەگەن.
ارينە, قالانىڭ قارقىندى دامىعانى جاقسى. دەگەنمەن, قازىر وسى ءۇردىس الەۋمەتتىك ينفراقۇرىلىمعا زور سالماق ءتۇسىرىپ وتىر. ءالى كۇنگە دەيىن شەشىمىن تاپپاي كەلە جاتقان ماسەلەلەر بار. مۇنى جۇرت ءبىلىپ وتىر. سوندىقتان, ۇكىمەت تە, اكىمدىك تە سونىڭ ءبارىن شەشۋ ءۇشىن جۇمىلا جۇمىس ىستەۋى كەرەك. بۇل جۇمىسقا قوعام وكىلدەرىن تارتۋ قاجەت», دەدى پرەزيدەنت.
مەملەكەت باسشىسى استانانى كوركەيتۋ, تۇرمىس ساپاسىن جاقسارتۋ – بارلىعىنا ورتاق مىندەت ەكەنىن اتاپ ءوتتى.
ء«بىز قاڭتار ايىندا ارنايى كەڭەس وتكىزىپ, ءبىراز ماسەلەنى تالقىلادىق, ماقسات-مىندەتتەردى ايقىندادىق. سودان بەرى جارتى جىلعا جۋىق ۋاقىت ءوتتى. ەندى اتقارىلعان جۇمىستارعا توقتالامىز», دەدى پرەزيدەنت.
مەملەكەت باسشىسىنىڭ ايتۋىنشا, مەرەيتوي – قول جەتكىزگەن جەتىستىكتەر مەن جارقىن جەڭىستەرگە عانا ەمەس, جىبەرىلگەن قاتەلىكتەر مەن مۇمكىندىكتەرگە دە نازار اۋداراتىن ماڭىزدى بەلەس.
«جىبەرىلگەن كەمشىلىكتەردەن ساباق الىپ, ءتيىستى قورىتىندى شىعارۋ ماڭىزدى. قازىر بوساڭسيتىن جانە جەتىستىكتەرگە توقمەيىلسيتىن ۋاقىت ەمەس. باسەكەگە تولى كۇرەستە جەتىستىگىنە ماساتتانباي, ءوزىن-ءوزى شىڭداپ, العا قادام باسقاندار جەڭىسكە جەتەدى.
بۇگىنگى جيىننىڭ ءمان-ماڭىزى دا – وسى. استانا – ەلىمىزدىڭ ىسكەرلىك, ساياسي جانە مادەني ورتالىعى. ەلىمىزدىڭ بارلىق ايماقتارى ەلورداعا قاراپ بوي تۇزەيدى, داميدى. استانا كوپتەگەن سالادا, سونىڭ ىشىندە ازاماتتاردىڭ ءومىر ءسۇرۋ ساپاسى بويىنشا دا باسقا قالالارعا ۇلگى كورسەتەدى. سوندىقتان, قالانىڭ تۇراقتى دامۋىنا كەدەرگى بولىپ جاتقان تۇيتكىلدەردى شەشۋ ءۇشىن مەملەكەتتىك ورگاندار تياناقتى جۇمىس ىستەۋى قاجەت», دەدى ق.توقاەۆ.
