ەڭسەلى سپورت كەشەندەرى
رەسمي ستاتيستيكاعا سۇيەنەتىن بولساق, بۇگىندە باس قالادا ءىرىلى-ۇساقتى 600-دەن استام سپورت نىسانى جۇمىس ىستەپ تۇر. سونىڭ ىشىندە جيىرماعا جۋىق سپورت عيماراتى حالىقارالىق دودالاردى قابىلداۋعا قاۋقارى جەتەدى. سونىمەن قاتار بۇل سپورت كەشەندەرىندە تەك الەمدىك دەڭگەيدەگى جارىستار وتكىزىپ قانا قويماي, قالا تۇرعىندارىنىڭ دا سالاماتتى ءومىر سالتىن ۇستانىپ, سپورتپەن شۇعىلدانۋعا بارلىق جاعداي جاسالعان. ياعني جاز مەزگىلىندە استانا جۇرتى فۋتبول, سۋعا ءجۇزۋ, جۇگىرۋ سىندى سپورت تۇرلەرىمەن اينالىسسا, قىستا كونكي تەۋىپ, شات-شادىمان بولادى. ماسەلەن, «استانا» سپورت كەشەنى قالا تۇرعىندارىنا باسسەين مەن جاتتىعۋ زالىن ۇسىنادى. سونىمەن قاتار بالالار سكالودروم, فۋتبول جانە باسكەتبول مەن ۆولەيبول ۇيىرمەلەرىنە جازىلىپ, ۇلكەندەر جاعى ويىن الاڭدارىن جالعا الىپ, جاتتىعۋلارىنا بولادى. سپورتتىق سەكتسيالاردان كيكبوكسينگ, كاراتە, بوكس جانە تاعى باسقا ۇيىرمەلەر جۇمىس ىستەيدى.
ۆەلوشاباندوز شلەمى تۇرىندە جاسالعان «سارىارقا» ۆەلوترەگى – الەمدەگى ەڭ ۇزدىك سپورت كەشەندەرىنىڭ ءبىرى رەتىندە تانىلعان. 2011 جىلى پايدالانۋعا بەرىلگەن عيماراتتا جاتتىعۋ زالى, ترەك, مۇز سىرعاناعى, تاەكۆوندو, گيمناستيكا, ويىن زالى جانە شاعىن فۋتبول الاڭدارى بار. «سارىارقا» ۆەلوترەگى سىرتقى كورىنىسى ايتىپ تۇرعانداي, نەگىزىنەن, ۆەلوسپورتقا ارناپ سالىنعان. دەسە دە, بۇل جەر بوكستان, باسكەتبولدان, كوركەم گيمناستيكادان جانە دزيۋدودان جارىستار وتكىزۋگە ىڭعايلى كەشەن. مۇندا ۆولەيبول, فۋتبول الاڭدارى مەن باسسەين جانە فيتنەس-ورتالىق بار. بۇل كەشەندەگى سپورت جارىستارىن 9 مىڭنان اسا جانكۇيەر تاماشالاي الادى.
«الاۋ» مۇزايدىنىنا ەلوردا تۇرعىندارى كونكي تەۋىپ, سەرگۋ ءۇشىن بارادى. قىس مەزگىلىندە كۇنىنە 2500-دەي حالىق جينالادى ەكەن. ال سوڭعى دەرەكتەرگە سۇيەنسەك, بۇگىندە ەلوردامىزدىڭ ءاربىر ءتورتىنشى تۇرعىنى سالاماتتى ءومىر سالتىن ۇستانىپ, تۇراقتى تۇردە سپورت تۇرلەرىمەن اينالىسادى. سونىمەن قاتار «الاۋدا» جاز مەزگىلىندە باتۋت, ۇستەل تەننيسى, بادمينتون, بيليارد جانە شاعىن گولف سەكىلدى سپورت تۇرلەرىمەن شۇعىلدانا الادى.
«داۋلەت» سپورت كەشەنىندە ۇلكەن تەننيستەن دارىستەر جۇرگىزىلەدى. بۇگىندە ەلىمىزدەگى ەڭ ۇلكەن تەننيس ورتالىعىندا بالالار جەكەلەي جانە توپ بولىپ جاتتىعادى. بۇل جەردە تەننيستىڭ الىپپەسىن ۇيرەتۋدەن باستاپ, ءتۇرلى جارىستارعا دايىنداپ شىعارادى. سونداي-اق قالا تۇرعىندارى قالاعان ۋاقىتىندا كورتتى جالعا الا الادى. بۇگىندە وسى تەننيس كورتىندا شىڭدالىپ شىققان استانالىق جاس سپورتشىلار حالىقارالىق جارىستاردا ۇزدىكتەر قاتارىنان كورىنىپ جۇرگەنى بارشاعا بەلگىلى.
استاناداعى ايشىقتى عيماراتتاردىڭ قاتارىن «بارىس ارەنا» مۇز سارايى دا تولىقتىرىپ تۇر. 2015 جىلى پايدالانۋعا بەرىلگەن بۇل كەشەندە ەلوردانىڭ «بارىس» حوككەي كلۋبى قۇرلىقتىق حوككەي ليگاسىندا ماتچتارىن وتكىزەدى. ارەنا ءبىر ساتتە 12000-عا دەيىن كورەرمەن سىيدىرا الادى. جالپى اۋماعى 86 مىڭ شارشى مەتردى الىپ جاتىر. كوپ فۋنكتسيالى كەشەندە 2 مۇز ايدىنىنا قوسا, 50 مەترلىك وليمپيادالىق باسسەين مەن كوركەم جۇزۋگە ارنالعان باسسەينى بار. سونىمەن قاتار سپورت سارايىندا باسقا دا مەرەكەلىك مادەني ءىس-شارالاردى وتكىزۋگە بولادى.
بۇدان بولەك, 30 مىڭ جانكۇيەرگە ارناپ سالىنعان «استانا ارەنا» سپورت كەشەنىن, سونىمەن قاتار ءۇش جىل بۇرىن ەل يگىلىگىنە بەرىلگەن QAZAQSTAN جەڭىل اتلەتيكا سپورت كەشەنىن دە اتاپ وتۋگە بولادى. حالىقارالىق جەڭىل اتلەتيكا فەدەراتسيالارى قاۋىمداستىعى (IAAF) تاراپىنان سەرتيفيكاتقا يە بولعان بۇل سپورت نىسانى ەڭ جوعارى دەڭگەيدەگى جارىستاردى (الەم, ازيا چەمپيوناتى جانە ت.ب.) وتكىزۋگە, ساپالى جاتتىقتىرۋشىلار قۇرامى مەن سپورتشىلاردى دايىنداۋعا مۇمكىندىك بەرەدى. ءۇش قاباتتى عيماراتتا سوپاق جۇگىرۋ جولاعى, باسسەين, سپورتشىلارعا ارنالعان 36 ورىندىق جاتاقحانا جانە جەڭىل اتلەتيكانىڭ بارلىق ءتۇرى قامتاماسىز ەتەتىن يادرو لاقتىرۋعا, بيىكتىككە سەكىرۋگە, ۇزىندىققا سەكىرۋگە ارنالعان سەكتورلارى بار.
باس شاھارداعى دودالار
جوعارىدا ءبىز اتاپ وتكەن سپورت عيماراتىنىڭ بىرقاتارىندا كەيىنگى 10 جىلدىڭ ىشىندە الەمدىك دەڭگەيدەگى جارىستار, ءارتۇرلى سپورت تۇرلەرىنەن الەم جانە ازيا چەمپيوناتتارى ءبىر ەمەس, بىرنەشە رەت ۇيىمداستىرىلدى. سونىمەن قاتار فۋتبولدان ەۋروپا جانە الەم چەمپيوناتتارىنىڭ ىرىكتەۋ كەزەڭدەرى, ەۋروكۋبوك دودالارىنىڭ ەڭ ماڭىزدى ويىندارى, ەلىمىزدىڭ داڭقتى كاسىپقوي بوكسشىلارىنىڭ قاتىسۋمەن كاسىپقوي بوكس كەشتەرى دە ۇيىمداستىرىلعانى كۇنى بۇگىنگىدەي جادىمىزدا.
تارقاتىپ ايتار بولساق, 2009 جىلى پايدالانۋعا بەرىلگەن «استانا ارەنا» ستاديونىندا ءار جىلدارى ەۋروپانىڭ ەڭ تاڭداۋلى قۇرامالارى دوپ تەپتى. سولاردىڭ قاتارىندا 2014 جىلعى الەم چەمپيونى گەرمانيا, 1992 جىلعى ەۋروپا چەمپيونى دانيا, الەم چەمپيوناتىنىڭ ەكى دۇركىن قولا جۇلدەگەرى پولشا, الەم جانە ەۋروپا چەمپيوناتىنىڭ جۇلدەگەرى نيدەرلاند, چەحيا, بەلگيا جانە تاعى باسقا كارى قۇرلىقتىڭ ازۋلى ۇجىمدارى بار.
سونىمەن قاتار 2011 جىلى قىسقى ازيا ويىندارى قارساڭىندا اشىلعان «سارىارقا» سپورت كەشەنىندە ەڭ العاش شورت-ترەك جارىستارى وتسە, كەيىننەن ۆەلوسپورتتان الەم كۋبوگى, 2013 جىلى ەلىمىزدە العاش رەت وتكەن اۋىر اتلەتيكادان ازيا چەمپيوناتىنىڭ جارىستارى ۇيىمداستىرىلدى. سول جولى جەرلەستەرىمىز 3 التىن, 2 كۇمىس, 1 قولا مەدال ولجالاپ, جارىستى جالپىكوماندالىق ەسەپتە ءۇشىنشى ورىنمەن تۇيىندەگەنىن ايتا كەتكەن ءجون.
2015 جىلى استانا تۇرعىندارى «الاۋ» مۇزايدىنىنداعى دزيۋدودان الەم چەمپيوناتىن تاماشالاۋعا مۇمكىندىك الدى. جەر-جاھاننىڭ 123 ەلىنەن كەلگەن ەڭ تاڭداۋلى بالۋاندار ءبىر اپتا بويى استانا اسپانىن دۇبىرگە بولەدى. سول جىلى ەل تاريحىندا العاش رەت ەكى قازاق بالاسى فينالدا بەلدەسىپ, ەل مەرەيىن اسىردى. 60 كيلو سالماقتاعى ەلىمىزدىڭ قوس مىقتىسى – ەلدوس سمەتوۆ پەن رۋستام يبراەۆ جارىس بويى بارلىق قارسىلاستارىنان باسىم ءتۇسىپ, فينالدا جانكۇيەرلەرگە تارتىستى بەلدەسۋ ۇسىندى.
اراعا ءبىر جىل سالىپ ەلوردا ءتورت بىردەي وتانداسىمىز دارا شىققان بوكستان ايەلدەر اراسىنداعى الەم چەمپيوناتىن قابىلدادى. سول جىلعى بۇرىمدىلار باسەكەسىندە نازىم قىزايباي, دينا جولامان, ۆالەنتينا حالزوۆا جانە ءلاززات كۇنگەيباەۆا ءانۇرانىمىزدى شىرقاتىپ, سپورت كەشەنىنە جينالعان بوكس جانكۇيەرلەرىن قۋانىش پەن شاتتىققا بولەگەن ەدى.
2019 جىلى استانا تۇرعىندارى تاعى ءبىر الەمدىك دەڭگەيدەگى ماڭىزدى جارىستىڭ كۋاگەرى اتاندى. ەلورداداعى «بارىس ارەنا» كەشەنىندە دۇنيەجۇزىنىڭ ەڭ تاڭداۋلى ءاپايتوس بالۋاندارى ەلىمىزدىڭ باس قالاسىندا باس قوسىپ, الەم چەمپيونى اتاعىن ساراپقا سالدى. ولاردىڭ قاتارىندا وليمپيا ويىندارىنىڭ ەكى دۇركىن, الەم چەمپيوناتىنىڭ بەس دۇركىن جەڭىمپازى رەسەيلىك ابدۋلراشيد سادۋلاەۆ, وليمپيا ويىندارىنىڭ جۇلدەگەرى, ءۇش مارتە الەم چەمپيوناتىندا دارا شىققان گرۋزيالىق گەنو پەترياشۆيلي, جاھاندىق دودانىڭ ءتورت دۇركىن چەمپيونى امەريكالىق كايل دەيك, ريو وليمپياداسىنىڭ جەڭىمپازى كۋبالىق يسماەل بوررەرو مولينا جانە تاعى باسقا مىقتى سپورتشىلار بولعانىن جانكۇيەرلەر ءالى دە ۇمىتا قويماعان بولار.
سونىمەن قاتار ەلوردادا شايبالى حوككەيدەن ءبىرىنشى ديۆيزيوننىڭ الەم چەمپيوناتى, كلاسسيكالىق شاحماتتان الەم چەمپيوناتىنىڭ التىن ءتاجى, تەننيستەن اتر 500 ساناتىنداعى تۋرنير جانە ودان بولەك ءىرى جارىستار وتكىزىلسە, جەكەلەگەن سپورت تۇرلەرىنەن داڭقتى بوكسشىمىز گەننادي گولوۆكين باستاعان وتاندىق كاسىپقوي بوكس جۇلدىزدارى قانات يسلام مەن بەيبىت شۇمەنوۆ ەلوردادا التىن بەلبەۋىن قورعادى. الەمدىك تەننيس جۇلدىزدارى سانالعان يسپانيالىق رافاەل نادال, فرانتسيالىق جو-ۆيلفريد تسونگا, سەربيالىق ساڭلاق نوۆاك دجوكوۆيچ استاناعا ارنايى كەلىپ, قالا تۇرعىندارىنا كەرەمەت كورمەلىك ماتچ ۇسىنعان بولاتىن.
ەلوردانى ايگىلەگەن «استانا» برەندى
ەلوردانىڭ اتاۋى بۇگىندە حالىقارالىق قوعامداستىق تاراپىنان مويىندالىپ قانا قويماي, سپورت الەمىندە دە داڭقى جەر جارىپ تۇر. بۇعان «استانا» اتاۋىن يەمدەنگەن سپورتتىق كوماندالار كوپ ەڭبەك سىڭىرگەنى جاسىرىن ەمەس. ماسەلەن, ۆەلوسپورتتاعى «استانامىز» وسى ۋاقىتقا دەيىن «تۋر دە فرانس», «دجيرو د’يتاليا», «يسپانيا ۆۋەلتاسى» سەكىلدى جاھاندىق ءىرى دودالاردا الدىڭعى شەپتى بەرمەي ءجۇر. سونداي-اق وسى ءمار-تەبەلى كوپكۇندىكتەردىڭ بارلىعىندا «استانانىڭ» ۆەلوشاباندوزدارى جەڭىس تۇعىرىنان كورىندى. ولاردىڭ اراسىندا الەكساندر ۆينوكۋروۆتىڭ ءىزىن جالعاعان جەرلەسىمىز الەكسەي لۋتسەنكونىڭ دا بار ەكەنى قۋانتادى. 2017 جىلى «يسپانيا ۆۋەلتاسىندا», 2020 جىلى «تۋر دە فرانستا» ءبىر مارتە كەزەڭ جەڭىمپازى اتانعان بولاتىن.
ۆەلوكلۋبتان بولەك, «استانا» فۋتبول كومانداسى دا ەۋروپانى باعىندىرا باستادى. 2009 جىلى قۇرىلعان ەلوردالىق ۇجىم وسى ۋاقىت ارالىعىندا چەمپيوندار ليگاسىنىڭ توپتىق كەزەڭىندە ءبىر رەت, ەۋروپا ليگاسىنىڭ توپتىق باسەكەسىندە ەكى رەت وينادى. سونىمەن قاتار قازاقستاننىڭ جەتى دۇركىن چەمپيونى 2018 جىلى ەۋروپا ليگاسىندا تۇڭعىش رەت پلەي-وفف كەزەڭىنە شىقتى. وسى ءبىر ايتۋلى تابىسىنان كەيىن كارى قۇرلىقتىڭ كوماندالارى ەلوردا ۇجىمىمەن ساناسا باستادى. «استانا» ەۋروكۋبوك جارىستارىنا قاتىسا باستاعان جىلدارى كلۋبتىق رەيتينگتە ۇزدىك 400 كوماندانىڭ ىشىندە بولسا, اينالدىرعان ءۇش-ءتورت جىلدىڭ ىشىندە توپ-100 كلۋبتىڭ قاتارىنا قوسىلدى. ءتىپتى ءبىر كەزدەرى اعىلشىننىڭ «ەۆەرتون», يتاليانىڭ «ينتەر» جانە ماسكەۋدىڭ «لوكوموتيۆ» كوماندالارىن جانە باسقا دا ءىرى كوماندالاردى باسىپ وزعان-دى.
استانا برەندىمەن الەمگە تانىلعان تاعى ءبىر كوماندانىڭ ءبىرى – «استانا ارلاندارى» جارتىلاي كاسىپقوي بوكس كلۋبى ەدى. بۇكىلالەمدىك بوكس سەرياسىندا ەل نامىسىن قورعاعان ەلوردا كومانداسى 2010-2018 جىلدار ارالىعىندا اتالعان تۋرنيردە ءۇش مارتە چەمپيون اتانىپ, ءتورت مارتە جۇلدەگەرلەر قاتارىنان كورىندى. ارلانداردىڭ اۋىز تولتىرىپ ايتاتىن جەتىستىگى 2015 جانە 2017 جىلدارعا تۋرا كەلدى. ويتكەنى الەمدىك بوكس دەرجاۆاسى سانالاتىن كۋبالىق كوماندامەن ەكى رەت فينالدا جولىعىپ, بوستاندىق ارالىنىڭ بوكسشىلارىنا قازاق ەلىنىڭ وعلاندارى دا وسال ەمەستىگىن دالەلدەدى.
WSB جوباسىنداعى «استانا ارلاندارى» ساپىندا ءار جىلدارى ەسىمى جاھانعا ءمالىم بوكسشىلار قورعادى. ولاردىڭ قاتارىندا بەيجىڭ وليمپياداسىنىڭ چەمپيونى باقىت سارسەكباەۆ پەن قولا جۇلدەگەرى قانات يسلام, ريو وليمپياداسىنىڭ چەمپيونى دانيار ەلەۋسىنوۆ پەن كۇمىس جۇلدەگەر ۆاسيلي لەۆيت, سونداي-اق الەم چەمپيوندارى مەرەي اقشالوۆ, قايرات ەراليەۆ, جانىبەك ءالىمحان ۇلى, تەمىرتاس ءجۇسىپوۆ, وليمپيا ويىندارىنىڭ قاتىسۋشىسى قانات ءابۋتاليپوۆ, رۋسلان مىرساتاەۆ, ولجاس ساتتىباەۆ سەكىلدى بوكسشىلار جۇدىرىقتاستى.
بۇدان بولەك «استانا» اتتى باسكەتبول كلۋبى دا بار. كوماندانىڭ قۇرىلعانىنا كوپ بولا قويماسا دا, قازاقستاننىڭ 10 دۇركىن چەمپيونى اتانىپ, ەل كۋبوگىن توعىز رەت يەلەندى. 2017 جىلى ازيا چەمپيوناتىنىڭ قولا جۇلدەگەرى اتاندى. 2011 جىلدان بەرى ۆتب بىرىڭعاي ليگاسىندا سىنعا ءتۇسىپ كەلە جاتقان «استانا» باسكەتبول كومانداسى ءۇش رەت شيرەك فينالعا دەيىن جەتتى.
ۇمىتپەن پەن مەجە
كوماندالىق سايىستاردان بولەك, جەكەلەي سپورت تۇرلەرىندە دە اتوي سالىپ جۇرگەن استانالىق سپورتشىلار از ەمەس. ولار سپورتتىڭ قاي تۇرىندە بولماسىن, حالىقارالىق ارەنادا ەل تۋىن بيىككە كوتەرىپ ءجۇر. الايدا, ولاردىڭ بىرقاتارى وزگە ايماقتا تۋىپ-وسكەن ورەندەر ەكەنى بەلگىلى. ماسەلەن, جۋىردا عانا تاشكەنتتە وتكەن بوكستان الەم چەمپيوناتىندا توپ جارعان سانجار تاشكەنباي وڭتۇستىكتىڭ تۋماسى بولسا, نۇربەك ورالباي جامبىل وبلىسىندا تۋعان. سونىمەن قاتار بوكستان ريو وليمپيادا چەمپيونى دانيار ەلەۋسىنوۆ ورالدىڭ ورەنى, ۆەلوسپورتتان لوندون وليمپياداسىنىڭ جەڭىمپازى الەكساندر ۆينوكۋروۆ نەگىزى سولتۇستىك قازاقستاننىڭ, مەرگەن ولگا دوۆگۋن وڭتۇستىكتىڭ تۇلەگى ەكەنى جاسىرىن ەمەس.
استانالىق سپورتشىلاردىڭ ءتىزىمى وسىلاي جالعاسا بەرەدى. ەڭ وكىنىشتىسى, 25 جىلدىڭ ىشىندە استانا قالاسىنىڭ بىردە-ءبىر ءتول تۇرعىنى اراسىنان چەمپيون سپورتشى شىققان جوق. سوندىقتان بۇگىندە ەلوردانىڭ دا ءتول سپورتشىلارىن كوتەرەتىن كەز جەتتى. وعان ەلوردادا بارلىق جاعداي جاسالعانىن جوعارىدا اتاپ وتتىك. سپورتتىق كلۋبتار اشىلىپ, باپكەرلەر دە, شەتەلدەن ماماندار دا تارتىلىپ جاتىر. بالكىم, الداعى وليمپيا ويىندارىندا, الەم جانە ازيا چەمپيوناتتارىندا وزا شاپقان استانالىق سپورتشىلاردىڭ جەڭىسىنەن ءسۇيىنشى سۇراپ, سول ساڭلاقتاردىڭ جەتىستىگىنە قول سوعىپ قالارمىز.
