اسكەري راسىمگە ۇلتتىق ۇلاننىڭ ارداگەرلەرى, استانا قالاسى پوليتسيا دەپارتامەنتى باستىعىنىڭ ءبىرىنشى ورىنباسارى جانە ەلوردالىق جەدەل قۇرامانىڭ باسشىلىعى, سونداي-اق ساربازداردىڭ اتا-انالارى مەن تۋىستارى قاتىستى.
- بۇگىن اسكەري بولىمدە ماڭىزدى وقيعا بولىپ وتىر. جاس ساربازداردىڭ اسكەري انت قابىلداۋ ءساتى ءبىز ءۇشىن مارتەبەلى كۇندەردىڭ ءبىرى. سوندىقتان بۇل قۋانىشتى جاعداي ەستەرىڭىزدە ەرەكشە ساقتالادى. سىزدەر قر ۇلتتىق ۇلانىنىڭ ساربازدارى قاتارىنا رەسمي تۇردە قوسىلدىڭىزدار. بۇگىننەن باستاپ ەل تىنىشتىعىن سەنىمدى قورعاڭىزدار! 
ەستەرىڭىزدە بولسىن! سىزدەردىڭ بورىشتارىڭىز – قازاقستان رەسپۋبليكاسى ۇلتتىق ۇلانىنىڭ اتىن, اسكەري ءداستۇرىن ابىرويمەن جانە نامىسپەن ارى قاراي جالعاستىرۋ, - دەدى ءىس-شارانىڭ اشىلۋىندا ءسوز سويلەگەن 5573 اسكەري ءبولىمىنىڭ كومانديرى پولكوۆنيك ايان ەسجانوۆ.
قازاقستان رەسپۋبليكاسىنىڭ ۇلتتىق ۇلانى تاۋەلسىزدىكتىڭ العاشقى كۇندەرىنەن باستاپ ىشكى اسكەرلەردىڭ قۇقىقتىق ميراسقورى بولا وتىرىپ, ەلدىڭ قوعامدىق قاۋىپسىزدىگى مەن كونستيتۋتسيالىق قۇرىلىسىن سەنىمدى قامتاماسىز ەتىپ كەلەدى. جىل سايىن ەلىمىزدىڭ بارلىق دەرلىك وڭىرلەرى مەن رەسپۋبليكالىق ماڭىزى بار قالالارىنان ەلوردالىق جەدەل قۇراماداعى جاس جىگىتتەر وتاندى قورعاۋداعى وزدەرىنىڭ قاسيەتتى بورىشىن ورىنداۋ ءۇشىن شاقىرىلادى. مۇندا ولارعا ازاماتتارىمىزدىڭ قۇقىقتارى مەن بوستاندىقتارىن قورعاۋ جونىندە زور جاۋاپكەرشىلىك جۇكتەلەدى. بۇگىن 5573 اسكەري ءبولىمىنىڭ 1-2023 جىلعى شاقىرىلىمىندا كەلگەن 731 سارباز وتان الدىندا اسكەري انت بەردى.
اسكەري انت ءار ازاماتتىڭ كوكەيىندە ماڭگىلىككە ساقتالىپ قالادى. ويتكەنى, بۇل ناعىز جىگىتتەر عانا ارقالاي الاتىن ۇلكەن جاۋاپكەرشىلىك. ول ەشقاشان ەسكىرمەيدى. اسكەري انت قابىلداعان ازامات كەز كەلگەن ۋاقىتتا, كەز كەلگەن جاستا وتانىن قورعاۋعا دايار تۇرادى. بۇگىنگى جەرىمىزگە اتا-بابالارىمىزدىڭ ارقاسىندا قول جەتكىزدىك. سول اماناتتى ادال اتقارايىق, - دەدى كوپشىلىك الدىندا ءسوز سويلەگەن ۇلتتىق ۇلان ارداگەرلەر كەڭەسىنىڭ توراعاسى گەنەرال-مايور قالياقپار توقىشەۆ. 
بۇگىننەن باستاپ وتان الدىنداعى بورىشىن وتەۋگە كەلگەن جانە جاس جاۋىنگەر كۋرسىنان وتكەن ساربازدار ەلىمىزدىڭ زاڭدى قورعاۋشىلارىمەن ءبىر قاتارعا تۇراتىن بولادى.
- ءوز اتىمنان جانە قازاقستان رەسپۋبليكاسى گەنەرالدار مۇشەلەرى اتىنان سىزدەردى بۇگىنگىدەي ەرەكشە كۇنمەن قۇتتىقتايمىن. جاس ساربازدار قولدارىنا قارۋ الىپ, ۇلاندىقتاردىڭ قاتارىنا ەنىپ وتىر. بۇل جەردەگى سولداتتار اسكەري بورىشتارىن ەل استاناسىندا وتەپ ءجۇر. بيىل − استانا قالاسىنا 25 جىل. بۇل دا ءبىر كەرەمەت جاعداي دەپ ويلايمىن. بۇگىننەن باستاپ قازاق ەلىنە, قازاق جەرىنە ابىرويمەن قىزمەت ەتەسىزدەر دەپ سەنەمىن, - دەدى ۇلتتىق ۇلاننىڭ ارداقتى ارداگەرى گەنەرال-مايور داۋلەت سالحانوۆ.
مىنبەردە ءسوز سويلەگەندەر اراسىندا 1-وقۋ روتاسىنىڭ ساربازى قاتارداعى حاقنازار دوسىمسەيىتتىڭ اكەسى بەرىك دوسىمسەيىت جانە 5-وقۋ روتاسىنىڭ ساربازى قاتارداعى مەرحات قانتاەۆتىڭ اناسى اقتولقىن دەميسينوۆا جاۋىنگەرلەردى قۇتتىقتادى. سونداي-اق اسكەري ءبولىمنىڭ اسكەري قىزمەتشىلەرىنە العىستارىن ءبىلدىردى. جيىندا 2-وقۋ روتاسىنىڭ ساربازى قاتارداعى راحات توقتارباەۆ تا ءسوز سويلەپ, قارۋلاستارىنا جىگەرلى ءسوز ارنادى.
ءىس-شارا بارىسىندا وقۋ پۋنكتىنىڭ 5-وقۋ روتاسىنىڭ جاۋىنگەرلەرى ساپتىق دەفيلە كورسەتتى. سونداي-اق وزگە دە ساربازدار قارۋ-جاراقپەن ءتۇرلى مانيپۋلياتسيا ورىندادى. بۇدان بولەك جيىلعان جۇرتقا جەكپە-جەك تۇرىنەن ءادىس-تاسىلدەر ۇسىنىلدى.
