«قۇرمەتتى دوستار! بارشاڭىزدى استانانىڭ 25 جىلدىق مەرەيتويىمەن شىن جۇرەكتەن قۇتتىقتايمىن!
ەلوردامىز وسى جىلداردىڭ ىشىندە قارقىندى دامىپ, ءوزىنىڭ مارتەبەسىنە ساي ەڭسەلى ورتالىققا اينالدى. ۇلتىمىزدى ۇيىستىرىپ, بىرلىگىمىزدى بەكەمدەۋگە زور ىقپالىن تيگىزدى.
استانانىڭ ارقا تورىنە كوشۋى ەلىمىز ءۇشىن وتە قيىن كەزەڭدەردە ىسكە اسقانى بەلگىلى. پرەزيدەنتىمىز قاسىم-جومارت كەمەل ۇلى توقاەۆ كەشە عانا وتكەن استانانىڭ 25 جىلدىق مەرەيتويىنا ارنالعان باۋىرلاس قالالار فورۋمىندا «بۇل – حالقىمىزدىڭ بولاشاق تاعدىرىن ايقىنداعان اسا ماڭىزدى جانە دەر كەزىندە قابىلدانعان تاريحي شەشىم بولعانىن» ايرىقشا اتاپ ءوتتى.
شىن مانىندە, جاڭا استانا ءوزى عانا وركەندەپ قويماي, تۇتاس ەلدىڭ ىلگەرى جىلجۋىنا تىڭ سەرپىن بەردى. استانامىز شيرەك عاسىردىڭ ىشىندە جان-جاقتى دامىدى. وسىلايشا ول اكىمشىلىك ورتالىق قانا ەمەس, مادەني-رۋحاني سالماعى باسىم ىرگەلى شاھارعا اينالدى.
سوندىقتان استانانىڭ مەرەيتويى – تۇتاس ۇلتىمىزدىڭ مەرەيى دەپ سەنىمدى تۇردە ايتا الامىز. بارشاڭىزدى وسى مەرەكەمەن قۇتتىقتاي وتىرىپ, ەلىمىزگە اماندىق, جەرىمىزگە تىنىشتىق جانە ءار وتباسىنا ىرىس پەن ىنتىماق تىلەيمىن!
ەلدىگىمىز ماڭگى, ەرتەڭىمىز باياندى بولسىن! قالامىز ءوسىپ-وركەندەي بەرسىن! استانا كۇنى قۇتتى بولسىن!», دەلىنگەن ماۋلەن اشىمباەۆتىڭ قۇتتىقتاۋ ماتىنىندە.
