ەرلەر اراسىنداعى ەلىمىزدىڭ ءبىرىنشى راكەتكاسى «ۇلكەن دۋلىعا» ساناتىنداعى ءتۋرنيردىڭ العاشقى اينالىمىندا دۇنيەجۇزىلىك رەيتينگتە 54-ورىندا تۇرعان امەريكالىق ماككەنزي ماكدونالدپەن باق سىناستى. ءبىرىنشى پارتيا ءا دەگەننەن تاي-برەيككە دەيىن جالعاسىپ, 13 گەيمدە امەريكالىق سپورتشىنىڭ باعى جاندى – 7:6 (7:3). ەكىنشى پارتيانىڭ سەگىزىنشى گەيمىنەن كەيىن تارازى باسى 4:4 ەسەبىمەن تەڭەسىپ تۇرعان مەزەتتە بۋبليك برەيك جاساپ, سوسىن ءوز گەيمىنە ۇپاي الىپ, بۇل سەتتى جەڭىسپەن تۇيىندەدى – 6:4.
ءۇشىنشى سەت باستالعان ساتتە جەرلەسىمىز دوپتى ويىنعا قوسقاندا قاتەلىككە بوي الدىرىپ, قارسىلاسىنىڭ برەيك جاساۋىنا جول بەرىپ قويدى – 0:2. دەگەنمەن, كەيىننەن تارازى باسىن تەڭەستىرە الدى – 4:4. سودان كەيىن تاعى ءبىر برەيككە قول جەتكىزىپ, ءۇشىنشى پارتيانى دا ءوز پايداسىنا اياقتادى – 6:4. ءتورتىنشى پارتيادا وتانداسىمىز وتە سەنىمدى ويىن كورسەتىپ, 6:4 ەسەبىمەن ماتچتى اياقتادى. ەندى الەكساندر ەكىنشى اينالىمدا تاعى ءبىر امەريكالىق تەننيسشى, الەمنىڭ 48-راكەتكاسى دجەففري دجون ۆولفپەن كورتقا شىعادى. ال كەشە كەشكىسىن الەمنىڭ ءۇشىنشى راكەتكاسى ەلەنا رىباكينا مەن ەلىمىزدىڭ ەكىنشى راكەتكاسى يۋليا پۋتينتسەۆا ۋيمبلدونداعى العاشقى ويىنىن وتكىزدى.
