جۇمىس ساپارى بارىسىندا پرەمەر-ءمينيستردىڭ ءبىرىنشى ورىنباسارى ەكىباستۇز جەو-سىنا بارىپ, تاۋلىك بويى جوندەۋ-قالپىنا كەلتىرۋ جۇمىستارى جۇرگىزىلىپ جاتقان ۋچاسكەلەردى ارالادى.
ستانتسياداعى 10 قازاندىقتىڭ بارلىعىن جوندەۋ كوزدەلگەن, ونىڭ ىشىندە 8 قازاندىقتا كۇردەلى جوندەۋ جۇرگىزىلەدى. بيۋدجەت قاراجاتى ەسەبىنەن 5 سۋ جىلىتۋ قازاندىعىنا كۇردەلى جوندەۋ جۇمىستارى جۇرگىزىلىپ جاتىر. «واەك» اق قاراجاتى ەسەبىنەن 5 ەنەرگەتيكالىق قازاندىقتى, سونداي-اق قوسالقى جابدىقتاردى, عيماراتتار مەن قۇرىلىستاردى كۇردەلى جانە اعىمداعى جوندەۋ جۇزەگە اسىرىلادى.
1 شىلدەدە №7, № 9 قازاندىقتارىن جوندەۋ اياقتالدى. جوندەۋ جۇمىستارى 18 تامىزدا اياقتالاتىن №6 ەنەرگەتيكالىق قازاندىقتا جانە 5 سۋ جىلىتۋ قازاندىعىندا جالعاسىپ جاتىر. № 11, 14, 15 سۋ جىلىتۋ قازاندىقتارىندا ەسكى جابدىقتاردى بۇزۋ جۇمىستارى اياقتالىپ, قۇرىلىس-مونتاجداۋ جۇمىستارى جۇرگىزىلىپ جاتىر. ەكراندىق پانەلدەردى, گاز قۇبىرلارىن, كونۆەكتيۆتى پاكەتتەردى جانە قۇبىرلى اۋا جىلىتقىشتاردىڭ تەكشەلەرىن مونتاجداۋ جۇمىستارى جۇرگىزىلۋدە. بارلىق ۋچاسكەدە جوندەۋ جۇمىستارى بەكىتىلگەن كەستەگە سايكەس ءجۇرىپ جاتىر.
«جىلۋ بەرۋ ماۋسىمىنىڭ باسىنا دەيىن بارلىق جۇمىس اياقتالۋعا ءتيىس. ءتيىستى قاراجات ءبولىندى, جۇمىستار جۇرگىزىلۋدە», دەدى پرەمەر-ءمينيستردىڭ ءبىرىنشى ورىنباسارى.
سونداي-اق رومان سكليار 4 جىلۋ ماگيسترالىن رەكونسترۋكتسيالاۋ جۇمىستارى جۇرگىزىلىپ جاتقان ۋچاسكەلەردە بولدى. مۇندا 5,4 كم جەلى تولىعىمەن جاڭارتىلادى.
پاۆلودار وبلىسىنىڭ اكىمى اسايىن بايحانوۆتىڭ ايتۋىنشا, بۇگىنگى تاڭدا اتالعان ۋچاسكەلەردە 1,9 شاقىرىم جاڭا جەلى سالىندى. جۇمىستار بەلگىلەنگەن كەستەدەن الدا كەلە جاتىر, جوسپارلانعان جۇمىستاردىڭ بارلىق كولەمىن وسى جىلدىڭ تامىز ايىنىڭ سوڭىنا دەيىن اياقتاۋ جوسپارلانىپ وتىر.
ەكىباستۇزدا الەۋمەتتىك نىساندار مەن تۇرعىن ۇيلەردى جىلۋ بەرۋ كەزەڭىنە دايىنداۋ بەلسەندى جۇرگىزىلۋدە. قازىرگى ۋاقىتتا گيدراۆليكالىق سىناقتار بارىسىندا انىقتالعان بارلىق 269 اقاۋ تولىق كولەمدە جويىلدى. 690 كوپقاباتتى ءۇيدىڭ 568-ىندە سىعىمداۋ, جۇيەلەردى جۋ اياقتالدى. باسقارۋ نىسانى جوق 182 كوپقاباتتى ۇيدە دايىندىقتى قالا قۇراۋشى كاسىپورىندار جۇرگىزىپ جاتىر. شىلدە ايىنىڭ سوڭىنا دەيىن بارلىق جۇمىس اياقتالادى.
سونىمەن قاتار پرەمەر-ءمينيستردىڭ ءبىرىنشى ورىنباسارى رومان سكليار پاۆلودار قالاسىنداعى جىلۋ بەرۋ ماۋسىمىنا دايىندىق جۇمىستارىنىڭ بارىسىن تەكسەردى. مۇندا نەگىزگى جابدىقتىڭ 40 بىرلىگىن جوندەۋ جانە 49,1 شاقىرىم جىلۋ جەلىلەرىن قايتا جاڭارتۋ جۇرگىزىلۋدە. وبلىس ورتالىعىنداعى جىلۋ جەلىلەرىنىڭ توزۋىن ازايتۋ ماقساتىندا 2023 جىلى العاش رەت كۆارتالىشىلىك جەلىلەردى رەكونسترۋكتسيالاۋ جۇرگىزىلىپ جاتىر. بارلىعى 11,7 كم جاڭا جەلىلەر سالىنادى.
ءبىرىنشى ۆيتسە-پرەمەر جىلۋ جەلىلەرىن جوندەۋ جۇمىستارىنىڭ مەرزىمىندە ورىندالۋى جانە وڭىردەگى جىلۋ بەرۋ ماۋسىمىنا دايىندىق ۇكىمەتتىڭ باستى نازارىندا ەكەنىن جانە وبلىس باسشىلىعىنىڭ ەرەكشە باقىلاۋىندا بولۋعا ءتيىس ەكەنىن اتاپ ءوتتى. پاۆلودارداعى ەرتىس ءوڭىرىنىڭ تۇرعىندارى ءۇشىن الداعى جىلۋ بەرۋ ماۋسىمدارىنىڭ ءساتتى ءوتۋى جەرگىلىكتى بيلىك پەن مەردىگەرلىك ۇيىمداردىڭ ۇيلەسىمدى جۇمىسىنا تىكەلەي بايلانىستى.
