ماگومەد اديەۆ جاتتىقتىراتىن قازاقستان ۇلتتىق قۇراماسى وتكەن ايدا ەكى ويىن وتكىزىپ, ەكەۋىندە دە جەڭىسكە جەتكەن بولاتىن. اتاپ ايتقاندا, ەۋرو-2024 ىرىكتەۋ كەزەڭى اياسىندا وتكەن سىرت الاڭداعى ماتچتىڭ العاشقىسىندا سان-مارينو فۋتبولشىلارىن 3:0 ەسەبىمەن تىزە بۇكتىرگەن بولسا, اراعا ءۇش كۇن سالىپ بەلفاستتا سولتۇستىك يرلانديا قۇراماسىن (1:0) قاپى قالدىرعان بولاتىن. وسى جەڭىسىنىڭ ارقاسىندا ۇلتتىق قۇراما فيفا رەيتينگىندە 8 ساتىعا كوتەرىلىپ, 1198.24 ۇپايمەن 104-ورىنعا جايعاستى. مۇنىڭ الدىنداعى رەيتينگتە جەرلەستەرىمىز 112-ساتىدا تۇرعان ەدى.
رەيتينگتىڭ العاشقى ۇشتىگى وزگەرىسسىز قالدى. ادەتتەگىدەي 2022 جىلعى الەم چەمپيونى – ارگەنتينا 1843.73 ۇپايمەن كوش باستاپ تۇرسا, فرانتسيا (1843.54) – ەكىنشى, برازيليا (1828.27) ءۇشىنشى ورنىن ساقتاپ قالدى. ال ەۋرو-2024 ىرىكتەۋ كەزەڭىندەگى قارسىلاستارىمىزدىڭ رەيتينگىنە توقتالار بولساق, دانيا (1597.37) – 19, فينليانديا (1419.19) – 54, سلوۆەنيا (1391.04) – 60, سولتۇستىك يرلانديا (1361.17) – 64 جانە سان-مارينو (753.11) ەڭ سوڭعى 211-ورىندا تۇر.
