«بۇگىندە پوليتسيا قىزمەتىنىڭ سەرۆيستىك مودەلى ەنگىزىلىپ جاتىر. پيلوتتىق جوبالار قولعا الىندى. سونىڭ ارقاسىندا تۇرعىندارمەن تىعىز جۇمىس ىستەيتىن بولىمشەلەردىڭ قىزمەتى رەتتەلدى.
«جۇرتقا جاقىن پوليتسيا» قاعيداتىن ورنىقتىرۋ ءۇشىن ناقتى شارالار قابىلدانۋدا. وسى قارقىندى توقتاتپاۋ كەرەك. پيلوتتىق جوبا اياسىندا قول جەتكەن جەتىستىكپەن شەكتەلىپ قالۋعا بولمايدى. اشىعىن ايتقاندا, قىزمەت كورسەتۋدىڭ سەرۆيستىك مودەلى تۋرالى تەك ماماندار عانا ايتىپ ءجۇر. قاراپايىم ازاماتتار مەن قوعام وكىلدەرى پىكىر ءبىلدىرىپ جاتقان جوق. بۇل – حالىق ونىڭ ناقتى ناتيجەسىن, وڭ وزگەرىستەردى كورىپ جاتقان جوق دەگەن ءسوز», دەدى پرەزيدەنت.
مەملەكەت باسشىسى سوتقا دەيىنگى تەرگەۋ سالاسىنىڭ ماڭىزى جايلى اتاپ ءوتتى.
«سونداي-اق سوتقا دەيىنگى تەرگەۋ سالاسىنا دا نازار اۋدارعان ءجون. بۇل – قۇقىق قورعاۋ جۇيەسىندەگى مەملەكەتتىك قىزمەتتىڭ ەرەكشە ءبىر ءتۇرى. ارينە, ونىڭ وزىندىك ىشكى ءتارتىبى مەن ەرەجەلەرى بار», دەدى قاسىم-جومارت توقاەۆ.
