قۇرمەتتى بىرلەسكەن وتىرىسقا قاتىسۋشىلار!
بۇگىن ءبىز سەگىزىنشى سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىنىڭ جۇمىسىن اياقتاپ, قورىتىندىلاپ وتىرمىز.
اتقارعان قىزمەتىمىزدىڭ ناتيجەسىن ءداستۇر بويىنشا تۇيىندەپ, بولاشاققا جوسپارىمىزدى ناقتىلاپ الۋىمىز قاجەت.
وتكەن جىلى قازاقستان حالقى بۇكىلحالىقتىق رەفەرەندۋمدا پرەزيدەنت رەفورمالارىن قولدادى.
ەلىمىزدىڭ جاڭارعان كونستيتۋتسياسى بۇكىل مەملەكەتتىك جۇيە بويىنشا اۋقىمدى وزگەرىستەرگە جول اشتى.
سۋپەرپرەزيدەنتتىك جۇيەدەن پرەزيدەنتتىك رەسپۋبليكا ۇلگىسىنە كوشتىك.
پارلامەنتتىڭ ءرولى مەن مارتەبەسى كۇشەيدى.
ەل باسقارۋ ىسىنە حالىقتىڭ اتسالىسۋ بەلسەندىلىگى ارتا ءتۇستى.
ازاماتتاردىڭ قۇقىعىن قورعاۋدىڭ كونستيتۋتسيالىق تەتىكتەرى نىعايتىلدى.
سەنات پەن ءماجىلىس سايلاۋى ەلدەگى ساياسي جاڭعىرۋدىڭ شەشۋشى كەزەڭىنە اينالدى.
زاڭ شىعارۋشى ورگان تولىعىمەن قايتا قۇرىلدى.
سەناتتىڭ قۇرىلىمى وزگەردى.
قازاقستان حالقى اسسامبلەياسى سەناتتا ءوز مانداتتارىن الدى.
ماجىلىسكە العاش رەت 6 ساياسي پارتيا سايلاندى.
وسىعان دەيىن ۇزاق ۋاقىت بويى وپپوزيتسيادا بولعان پارتيا پارلامەنتكە ءوتتى.
بۇل جولعى سايلانىم قازاقستان تاريحىنداعى ەڭ كوپ پارتيالى پارلامەنت بولىپ وتىر.
ءماجىلىس ءتۇرلى كوزقاراستار مەن ساياسي كۇشتەر توعىسقان الاڭعا اينالدى.
حالىق قالاۋلىلارىنىڭ جاڭا تولقىنى كەلدى.
ءماجىلىس قۇرامى ۇزاق جىلدان بەرى العاش رەت ءبىرمانداتتى وكرۋگتەن سايلانعان, شىنايى ءارى تارتىستى باسەكەدە وزىپ شىققان دەپۋتاتتارمەن تولىقتى.
سونىمەن قاتار ايەلدەر مەن ەرەكشە قاجەتتىلىگى بار ادامداردىڭ جانە جاستاردىڭ قاتارى كوبەيدى.
سەگىزىنشى سايلانىمدى باسقا شاقىرىلىمدارعا قاراعاندا ەڭ جاس پارلامەنت دەپ اتاۋعا بولادى.
جاسى ءالى 35-كە تولماعان 13 دەپۋتات قازاقستان جاستارى اتىنان وكىلدىك ەتۋدە.
بۇگىنگى تاڭدا جاڭارعان پارلامەنت – ساياسي مادەنيەتى جوعارى, بەدەلدى حالىق قالاۋلىلارىنان قۇرالعان.
قۇرمەتتى ارىپتەستەر!
ءبىرىنشى سەسسيا نەبارى 100 كۇنگە سوزىلدى.
قىسقا بولعانىمەن, اتقارىلعان مىندەتتەر بويىنشا بۇل سەسسيانىڭ جۇمىسى وتە ماڭىزدى ءارى مازمۇندى بولدى.
سەسسيانىڭ اشىلۋىندا مەملەكەت باسشىسى قاسىم-جومارت كەمەل ۇلى توقاەۆ قىزمەتىمىزدىڭ نەگىزگى باعىتتارىن ايقىنداپ بەردى.
ولار ءىس جۇزىندە جۇزەگە اسىرىلىپ, پارلامەنتتە قارالعان زاڭ جوبالارىنىڭ نەگىزىنە اينالدى.
بۇل سەسسيا بارىسىندا پالاتالاردىڭ 3 بىرلەسكەن وتىرىسى بولدى. سەناتتىڭ 12 جانە ءماجىلىستىڭ 15 جالپى وتىرىسى ءوتتى.
وندا 120-دان استام ماسەلە قارالدى.
پارلامەنتتىڭ قاراۋىندا 82 زاڭ جوباسى بولدى, سونىڭ ىشىندە 25 زاڭ قابىلدانىپ, 13 زاڭعا پرەزيدەنت قول قويدى.
قازىرگى سايلانىمنىڭ باستى ەرەكشەلىگى – كوپتەگەن ماڭىزدى زاڭ جوبالارىنىڭ دەپۋتاتتاردىڭ باستاماسىمەن ازىرلەنۋى.
دەپۋتاتتار باستاماشى بولعان زاڭ جوبالارىنا سايلاۋشىلاردىڭ تالاپ-تىلەگى, مۇڭ-مۇقتاجى, ەل پرەزيدەنتىنىڭ تاپسىرمالارى ارقاۋ بولدى.
بۇل رەتتە زاڭسىز الىنعان اكتيۆتەردى قايتارۋ تۋرالى زاڭنىڭ قابىلدانۋى –الەۋمەتتىك ادىلدىك ىزدەگەن جۇرتشىلىق تالابىنا لايىقتى جاۋاپ.
ول تۋرالى پرەزيدەنتتىڭ سايلاۋالدى باعدارلاماسىندا ايتىلعان.
ءبىزدىڭ پارتيالاردىڭ سايلاۋالدى باعدارلامالارىنا دا ەنگىزىلدى.
اتالعان ماسەلەگە وسى سەسسيادا نۇكتە قويىلدى.
بۇل زاڭ – زاڭسىز الىنعان اكتيۆتەردى قايتارۋدىڭ جاڭا قۇقىقتىق تەتىكتەرىن قالىپتاستىردى.
قۇجاتتا سىبايلاس جەمقورلىققا قارسى كۇرەستەگى جاڭا حالىقارالىق ۇردىستەر ەسكەرىلدى.
ەشكىم دە زاڭسىز ارەكەتى ءۇشىن جاۋاپكەرشىلىكتەن قاشىپ قۇتىلا المايدى.
***
سونداي-اق قوعامدا جانە ساراپشىلار اراسىندا سۇيىتىلعان گاز اينالىمىن رەتتەۋ جانە تۇرعىن ءۇي-كوممۋنالدىق شارۋاشىلىعى ماسەلەلەرى جان-جاقتى تالقىلانعانىن بىلەسىزدەر.
مەملەكەت باسشىسى وسى ماسەلەنى شەشۋ ءۇشىن ناقتى تاپسىرما بەردى.
وسى ورايدا دەپۋتاتتار ارنايى زاڭ ازىرلەدى.
زاڭدا گازدى زاۋىتتان تۇتىنۋشىعا دەيىن جەتكىزۋدىڭ اشىق جۇيەسى جاسالادى.
كوپپاتەرلى تۇرعىن ۇيلەردى باسقارۋداعى كەمشىلىكتەر جويىلدى.
ەندى, جاڭا زاڭ بويىنشا, باسقارۋ نىسانىن تۇرعىنداردىڭ ءوزى تاڭداي الادى: كسك-نى قالدىرا ما, وسي-ءدى تاڭداي ما – ونى وزدەرى شەشەدى.
***
دەپۋتاتتار ونلاين-پلاتفورمالار جانە ونلاين-جارناما ماسەلەلەرى جونىندەگى زاڭعا دا باستاماشىلىق ەتتى.
پرەزيدەنت وسى سالانى قۇقىقتىق تۇرعىدان رەتتەۋ قاجەتتىگى تۋرالى ءوز جولداۋىندا ايتقان ەدى.
زاڭ جوباسى قوعامدا قىزۋ تالقىلاندى.
سوندىقتان وندا ۇكىمەتتىك ەمەس ۇيىمداردىڭ, ساراپشىلار قوعامداستىعىنىڭ, الەۋمەتتىك جەلىنى پايدالانۋشىلاردىڭ پىكىرى بارىنشا ەسكەرىلدى.
***
وسى سەسسيادا كاسىپتىك بىلىكتىلىك تۋرالى زاڭمەن جۇمىس اياقتالدى.
زاڭ ۇلتتىق بىلىكتىلىك جۇيەسىنىڭ بارلىق ەلەمەنتتەرىن رەتتەيدى.
ماسەلەن, كاسىپتىك بىلىكتىلىكتى دالەلدەۋ ارقىلى ءتۇرلى قىزمەتپەن اينالىسۋعا مۇمكىندىك بەرەدى.
***
ەلەكتر ساموكاتتار قولدانىسى قوعامدا ۇلكەن ماسەلەگە اينالىپ وتىر.
ولاردىڭ ءجۇرىسىن رەتتەۋ جونىندەگى تۇزەتۋلەر پارلامەنتتە كەڭ تالقىلاندى.
ەڭ باستىسى, دەپۋتاتتار قابىلداعان زاڭ جاياۋ جۇرگىنشىلەردىڭ دە, ساموكات جۇرگىزۋشىلەرىنىڭ دە قاۋىپسىزدىگىن قامتاماسىز ەتەدى.
***
سونىمەن بىرگە بۇرىنعى سەمەي يادرولىق پوليگونى اۋماعىن زەرتتەۋ مەن قاۋىپسىزدىگىن قامتاماسىز ەتۋ ماسەلەسى كوپتەن شەشىمىن تاپپاي كەلە جاتقان تۇيتكىلدى جايتتىڭ ءبىرى ەدى.
بۇگىندە بۇل ماسەلە زاڭنامالىق دەڭگەيدە شەشىمىن تاپتى.
زاڭ نورمالارى پوليگوننىڭ اۋماعىن قاۋىپسىز كۇيگە كەلتىرىپ, حالىقتى رادياتسيادان قورعاۋعا جول اشادى.
***
سونداي-اق مەملەكەت باسشىسىنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى اياسىندا ءماجىلىستىڭ وكىلەتتىگى, باقىلاۋشىلىق فۋنكتسياسى كۇشەيتىلدى.
پرەزيدەنت ايتقانداي, ءبىز بيۋدجەتتىڭ اتقارىلۋى بارىسىن, ءاربىر تيىننىڭ جۇمسالۋىن قاتاڭ قاداعالاۋىمىز قاجەت.
وسىعان وراي جوعارى اۋديتورلىق پالاتانىڭ ەسەبىن تىڭدادىق.
وندا حالىقتى تولعاندىراتىن ەڭ وزەكتى تاقىرىپ – جىلۋمەن قامتۋ ماسەلەسى كوتەرىلدى.
قوعامدى, دەپۋتاتتاردى جىلۋ ورتالىقتارىنىڭ قىسقى ماۋسىمعا دايىندىعى الاڭداتىپ وتىر.
وسى جونىندە ءبىراز سىني پىكىرلەر ايتىلدى.
ناتيجەسىندە ۇكىمەت پەن جوعارى اۋديتورلىق پالاتاعا ءتيىستى ۇسىنىمدار جولداندى.
***
پالاتانىڭ كەلەسى ەسەبى مەملەكەتتىك قارىز تاقىرىبىنا ارنالادى.
ونى الداعى سەسسيادا تىڭدايمىز.
***
سونىمەن قاتار دەپۋتاتتار حالىقارالىق شارتتار مەن كەلىسىمدەردىڭ وتاندىق بازاسىن قالىپتاستىرۋعا باسا ءمان بەردى.
پارلامەنت 11 حالىقارالىق شارت پەن مەملەكەتارالىق كەلىسىمدى راتيفيكاتسيالادى.
***
زاڭ شىعارۋ سالاسىنداعى ءبىزدىڭ بارلىق جۇمىسىمىز قوعام ءۇشىن اشىق ەكەنىن ەرەكشە اتاپ وتكىم كەلەدى.
وسى سەسسيادا, مەملەكەت باسشىسىنىڭ تاپسىرماسىنا سايكەس, پارلامەنتتىڭ قوس پالاتاسى جالپى وتىرىستاردى «حابار 24» تەلەارناسىندا تىكەلەي ەفيردە كورسەتۋگە كوشتى.
سونداي-اق ءماجىلىستىڭ جالپى وتىرىسى «جىبەك جولى» تەلەارناسىنان كورسەتىلىپ كەلەدى.
بۇل باستامانى جۇرتشىلىق جاقسى قابىلداپ جاتىر.
***
وزەكتى تاقىرىپتار تەك جالپى وتىرىستا عانا ەمەس, «دوڭگەلەك ۇستەلدەردە», كوميتەتتەردىڭ كوشپەلى وتىرىستارىندا دا تالقىلاندى.
اتاپ ايتقاندا:
- شاعىن مەكتەپتەر جايى; مەكتەپكە دەيىنگى جانە ورتا ءبىلىم بەرۋ مەكەمەلەرىندەگى قاۋىپسىزدىك جۇيەسىنىڭ احۋالى;
- ەكولوگيا, ەنەرگەتيكا جانە ونەركاسىپ سالالارىنداعى قاۋىپسىزدىك;
- ازاماتتاردىڭ تولەم قابىلەتىن قالپىنا كەلتىرۋ, ولاردىڭ بانكروتتىعى;
- اۋىلدى, اۋىلدىق جەرلەردەگى الەۋمەتتىك-ينجەنەرلىك ينفراقۇرىلىمدى دامىتۋ; كوكونىس شارۋاشىلىعى جانە سۋارمالى ەگىنشىلىك; «اۋىل ەل بەسىگى» جوباسىن ىسكە اسىرۋ, ت.ب.
بۇعان قوسا, دەپۋتاتتار ماسەلە تۋىنداعان جەرلەرگە جەدەل جەتىپ, ورىن العان وقيعالاردىڭ بەل ورتاسىندا حالىقپەن بىرگە بولدى.
***
قوعامداعى وزەكتى ماسەلەلەر دەپۋتاتتىق ساۋالدار ارقىلى دا كوتەرىلىپ كەلەدى.
قوس پالاتا دەپۋتاتتارى مەملەكەتتىك ورگاندارعا 306 دەپۋتاتتىق ساۋال جولدادى.
ونىڭ ارقايسىسىندا ەلدەگى تۇيتكىلدى جايتتار قوزعالدى.
ءار ءوڭىردىڭ, ءار ادامنىڭ, ءار وتباسىنىڭ تۇرمىسىن جاقسارتۋعا باعىتتالعان ماڭىزدى ماسەلەلەر كوتەرىلدى.
***
سونىمەن قاتار دەپۋتاتتاردىڭ اتىنا تۇراقتى تۇردە ازاماتتاردان وتىنىشتەر كەلىپ تۇسۋدە.
وسى سەسسيانىڭ وزىندە حالىق قالاۋلىلارىنىڭ اتىنا شامامەن 7 مىڭعا جۋىق حات كەلدى.
ءتىپتى ارامىزدا ءبىر ءوزىنىڭ اتىنا جۇزدەگەن حات كەلگەن دەپۋتاتتار دا بار.
سونداي-اق دەپۋتاتتار وسى سەسسيادا ءماجىلىس جانىنداعى قوعامدىق قابىلداۋدا 800-دەن استام اداممەن جۇزدەسىپ, بىرقاتار ماسەلە سول جەردە شەشىمىن تاپتى.
***
پارلامەنت جانىنان قۇرىلعان ديالوگ الاڭدارى دا جەمىستى جۇمىس اتقارۋدا.
ەندى حالىقتى تولعاندىراتىن بارلىق زاڭ جوبالارى قوعامدىق پالاتا وتىرىستارىنداتاۋەلسىز ساراپشىلارمەن, جۇرتشىلىق وكىلدەرىمەن الدىن الا تالقىلانىپ, «نولدىك» وقىلىمنان وتەدى.
«جاس ساراپشىلار كلۋبى» مەن «تالداۋ مەكتەبى» جاس ماماندارعا زاڭ شىعارۋ پروتسەسىنە ارالاسۋعا مۇمكىندىك بەردى.
سونداي-اق «ۇلتتىق مۇددە» جوباسى پارلامەنتاريلەردى, زيالى قاۋىم مەن ساراپشىلار قوعامداستىعىن بىرىكتىرەتىن الاڭعا اينالدى.
***
پارلامەنت قابىرعاسىندا قازاقستاننىڭ ورنىقتى دامۋى سالاسىنداعى ماقساتتاردىڭ ىسكە اسىرىلۋى جونىندەگى پارلامەنتتىك كوميسسيا قۇرىلدى.
***
سونىمەن قاتار مەملەكەت باسشىسىنىڭ باستاماسىمەن جاساقتالعان ء«بىر ەل – ءبىر مۇددە» دەپۋتاتتىق توبى جۇمىسىن باستادى.
بۇل توپتىڭ نەگىزگى ماقساتى – ۇلت بىرلىگىن نىعايتۋ.
بۇدان بولەك, تاياۋدا «ينكليۋزيۆتى پارلامەنت» دەپۋتاتتىق توبى ءوز مىندەتىن اتقارۋعا كىرىسەتىن بولادى.
***
تاعى ءبىر ماڭىزدى باعىت – پارلامەنتتىك ديپلوماتيانى دامىتۋ.
بۇل سالادا 100-دەن استام ەلدىڭ پارلامەنتتەرىمەن ىنتىماقتاستىق توپتار قۇرىلدى.
دەپۋتاتتار تۇركپا, تمد, ۇجىمدىق قاۋىپسىزدىك شارتى ۇيىمى جانە ەۋروپاداعى قاۋىپسىزدىك پەن ىنتىماقتاستىق ۇيىمى پارلامەنتتىك اسسامبلەيالارى, پارلامەنتارالىق وداق جانە ەۋروپالىق پارلامەنت ءىس-شارالارىنا قاتىستى.
بەلگيا, گرۋزيا, قىرعىزستان, ليتۆا, موڭعوليا, تاجىكستان جانە تۇرىكمەنستان پارلامەنتتىك دەلەگاتسيالارى قازاقستانعا كەلدى.
بۇدان بولەك, جۋىردا قازاقستاننىڭ توراعالىق ەتۋىمەن ورتالىق ازيا ەلدەرى ايەلدەرىنىڭ ديالوگى فورۋمىن وتكىزدىك.
***
سەسسيا بارىسىندا ۇكىمەتپەن قويان-قولتىق جۇمىس اتقارىلعانىن اتاپ وتكەن ءجون.
5 ۇكىمەت ساعاتى وتكىزىلدى.
ۇكىمەت مۇشەلەرى عىلىم سالاسىنداعى, اگروونەركاسىپتىك كەشەندەگى, وڭىرلىك ستاندارتتار, ينۆەستيتسيالىق كليمات جانە باسقا دا سالالارداعى احۋال تۋرالى باياندادى.
وسىنداي كونسترۋكتيۆتى ىنتىماقتاستىق كەلەسى سەسسيادا جالعاسىن تابادى دەپ سەنەمىز.
***
سونىمەن قاتار ۇكىمەتپەن بىرلەسە جۇمىس ىستەۋ كەزىندەگى كەيبىر ماسەلەلەرگە دە توقتالىپ وتكىم كەلەدى.
بىرىنشىدەن, ۇكىمەتتىڭ زاڭعا باستاماشى بولۋ جۇمىسى ءتيىستى دەڭگەيدە اتقارىلماي وتىر.
قوعامدا شۇعىل شەشىمىن كۇتىپ وتىرعان تۇيتكىلدى ماسەلە كوپ ەكەنىن بىلەسىزدەر.
ولار, ءبىرىنشى كەزەكتە, زاڭنامالىق تۇرعىدان شەشۋدى قاجەت ەتەدى.
وكىنىشكە قاراي, بۇل جايتتارعا ۇكىمەت دەر كەزىندە كوڭىل اۋدارىپ, قاجەتتى زاڭ جوبالارىن ماجىلىسكە ۋاقتىلى ۇسىنباي وتىر.
سوندىقتان دەپۋتاتتار وسى وتكىر ماسەلەلەردى شەشۋدى جەدەل تۇردە ءوز قولىنا الىپ, ءتيىستى زاڭ جوبالارىنا باستاماشى بولۋعا ءماجبۇر.
وسى ورايدا ۇكىمەتكە بەلسەندىلىكتى ارتتىرىپ, كەلەسى سەسسياعا ناقتى ءارى قوعامعا قاجەت زاڭ جوبالارىن ازىرلەۋدى جانە پارلامەنتكە ەنگىزۋدى تەزدەتۋگە ءتيىس.
ەكىنشىدەن, دەپۋتاتتاردىڭ تۇزەتۋلەرى مەن تولىقتىرۋلارىنا ۇكىمەت قورىتىندىسىن قاراۋ مەرزىمى تىم ۇزاق.
بەلگىلەنگەن ءتارتىپ بار.
بىراق ول ءتارتىپ كوپ جاعدايدا ساقتالماي وتىر.
سونىڭ سالدارىنان كەيبىر زاڭ جوبالارىنىڭ قابىلدانۋى كىدىرىپ تۇر.
سوندىقتان ۇكىمەتكە قورىتىندىلاردى كەلىسۋ ءراسىمىن قايتا قاراۋ كەرەك دەپ سانايمىز.
ءبىز جۇمىسىمىزدى جاڭا باستادىق.
الداعى ۋاقىتتا مەملەكەتتىك ورگاندار دەپۋتاتتاردىڭ باستامالارىن قاراعان كەزدە ۆەدومستۆولىق مۇددەمەن شەكتەلمەۋگە ءتيىس.
ۇشىنشىدەن, جالپى وتىرىستارعا, جۇمىس توپتارىنا كەلەتىن مەملەكەتتىك ورگاندار باسشىلارىنىڭ دايىندىعى تومەن.
جاۋاپتارىنىڭ ساپاسى سىن كوتەرمەيدى.
بۇل دەپۋتاتتىق ساۋالدارعا بەرىلەتىن جاۋاپتارعا دا قاتىستى.
ءبىز دەپۋتاتتىق ساۋالداردا حالىقتى تولعاندىراتىن وزەكتى ماسەلەلەر كوتەرىپ, سايلاۋشىلاردىڭ تىلەگى مەن اماناتىن جەتكىزەمىز.
وكىنىشكە قاراي, بىزگە تولىق جاۋاپتىڭ ورنىنا جالپىلاما, سىرعىتپا جاۋاپتار عانا كەلەدى.
ەگەر بۇل جاعداي جالعاسا بەرسە, بولاشاقتا دەپۋتاتتىق ساۋالعا اۋىزشا جاۋاپ بەرۋ ءۇشىن ءبىز ۇكىمەت مۇشەلەرىن ارنايى شاقىرتۋعا ءماجبۇر بولامىز.
بۇل ءبىزدىڭ رەگلامەنتتە قاراستىرىلعان.
قۇرمەتتى دەپۋتاتتار!
ءبىز وسى سەسسيادا زاڭ شىعارۋ جۇمىسىنا ەرەكشە قارقىن بەردىك.
سول قارقىندى الداعى ۋاقىتتا دا ساقتاۋدىڭ ماڭىزى زور.
پارلامەنتاريلەر كەلەسى سەسسيادا سايلاۋشىلاردىڭ وزەكتى ماسەلەلەرىن شەشۋگە, پرەزيدەنتتىڭ سايلاۋالدى باعدارلاماسىن ىسكە اسىرۋعا ەرەكشە ەكپىن بەرۋگە ءتيىس.
ءبىز ۇلتتىق قوردان بالالارعا بولىنەتىن تولەمدەر ماسەلەسى جونىندەگى زاڭ جوباسىمەن جۇمىستى جالعاستىراتىن بولامىز.
بۇل – پرەزيدەنتتىڭ اۋقىمدى رەفورمالارى اياسىنداعى نەگىزگى باستاماسىنىڭ ءبىرى.
مەملەكەت باسشىسىنىڭ تاپسىرماسى بويىنشا سالىق, بيۋدجەت, سۋ, قالا قۇرىلىسى كودەكستەرىمەن, مەملەكەتتىك ساتىپ الۋ, عىلىم جانە تەحنولوگيالىق ساياسات تۋرالى زاڭ جوبالارىمەن جۇمىس ىستەۋ مىندەتى الدىمىزدا تۇر.
***
كەلەسى اپتادان باستاپ ءبارىمىز وڭىرلەرگە شىعامىز.
سول كەزدە قارالاتىن زاڭدار بويىنشا حالىقپەن تەرەڭىرەك پىكىر الماسۋ, جۇرتشىلىقتىڭ ويىن ءبىلۋ ماڭىزدى.
پارلامەنت زاڭداردى حالىق ءۇشىن جانە حالىقپەن بىرگە جازادى.
بۇل – ءبىزدىڭ باستى ۇستانىمىمىز.
قۇرمەتتى بىرلەسكەن وتىرىسقا قاتىسۋشىلار!
ءبىز سەگىزىنشى سايلانعان پارلامەنتتىڭ ءبىرىنشى سەسسياسىن اياقتاپ وتىرمىز.
وسىعان بايلانىستى, دەپۋتاتتارعا, پرەمەر-مينيسترگە, ۇكىمەت مۇشەلەرىنە, بارلىق ارىپتەستەرىمە بىرلەسە اتقارعان جۇمىسى ءۇشىن العىس بىلدىرەمىن.
سونداي-اق جۇمىستى كاسىبي دەڭگەيدە ۇيىمداستىرعانى ءۇشىن ەكى پالاتا اپپاراتتارىنىڭ قىزمەتكەرلەرىنە دە دەپۋتاتتىق كورپۋس اتىنان راحمەت ايتقىم كەلەدى.
زاڭ شىعارۋ پروتسەسىنە نەمقۇرايدى قارامايتىن قوعام بەلسەندىلەرىنە جانە جالپى ساراپشىلار قوعامداستىعىنا ريزاشىلىعىمدى بىلدىرگىم كەلەدى.
سونىمەن قاتار جۇمىسىمىزدى جوعارى دەڭگەيدە جاريالاپ جۇرگەن بۇقارالىق اقپارات قۇرالدارى وكىلدەرىنە دە العىس ايتامىز.
ءسوزىمدى قورىتىندىلاي كەلە, ەل يگىلىگى جولىنداعى جاۋاپتى ىستە بارشاڭىزعا تابىس تىلەيمىن!
