سپورتتى دامىتۋ ديرەكتسياسىنىڭ مالىمەتىنشە, قول دوبى بويىنشا باسەكەلەر شەشۋشى تۋرعا دەيىن تارتىستى وتكەن. ماسەلەن, سوڭعى تۋر الدىندا بىردەن 3 كوماندا – قاراعاندى, اقتوبە مەن شىمكەنت گاندبولشىلارى باس جۇلدەدەن دامەلى بولدى. بەسىنشى تۋردا جارىس قوجايىندارى استانا قالاسىنىڭ كومانداسىمەن شەبەرلىك بايقاسىپ, 38:30 ناتيجەسىمەن جەڭىسكە جەتتى. ءسويتىپ, كەنشىلەر كومانداسى ۇپاي سانىن 8-گە جەتكىزسە, شىمكەنت قالاسىنىڭ كومانداسى اقتوبە وبلىسىمەن وتكەن اسا تارتىستى ماتچتا 33:22 ەسەبىمەن باسىم ءتۇسىپ, ولار دا 8 ۇپايدان جينادى. جارىس سوڭىندا تورەشىلەر جەڭىمپاز بەن جۇلدەگەرلەردى دوپ ايىرماشىلىعى بويىنشا انىقتادى. بەس تۋردا ەڭ كوپ گول سوعىپ, ءوز قاقپاسىنا از گول وتكىزگەن قاراعاندى وبلىسىنىڭ كومانداسى سپارتاكيادا جەڭىمپازى اتانسا (57-53), شىمكەنت قالاسى كۇمىس (56-55), اقتوبە وبلىسى (51-56) قولا مەدالعا يە بولدى.
«وسىدان ءتورت جىل بۇرىنعى V جازعى سپارتاكيادا دا قاراعاندى قالاسىندا وتكەن بولاتىن. سول كەزدە 4 كوماندانىڭ اراسىندا (قاراعاندى, استانا, پاۆلودار مەن اتىراۋ) كەنشىلەر قالاسىنىڭ وكىلدەرى چەمپيون اتانعان. استانا قالاسى كۇمىس, پاۆلودار وبلىسى قولا مەدال العان. بيىلعى جارىستىڭ دەڭگەيى كوتەرىلگەن. سوڭعى تۋردا 3 كوماندا بىردەي ۇپاي جيناپ, تەڭ ءتۇسۋى سونىڭ كورسەتكىشى», دەدى استانا قالاسى كومانداسىنىڭ باپكەرى ۆلاديمير بەرەزين.
نەبارى ەكى ويىندا جەڭىسكە جەتكەن ەلوردالىقتار بۇل جولى 4-ورىنمەن شەكتەلدى. جازعى سپارتاكياداعا قاتىسىپ جاتقان جاڭا وبلىستىڭ ءبىرى الماتى – 5-ءشى, ال ماڭعىستاۋ وبلىسى 6-ساتىدان كورىندى.
ء«بىز بۇگىن قولا مەدالدى مىسە تۇتتىق. قالاعانىمىز باس جۇلدە ەدى. بۇگىن شىمكەنت قالاسىمەن ناشار وينادىق. اسىرەسە العاشقى اينالىمدا. تىم كوپ گول وتكىزىپ العان سوڭ ايىرماشىلىق كوبەيىپ كەتتى. نەگە بۇلاي بولعانىن بىلمەيمىن. دەمەك, ءالى دايىندىقتى كۇشەيتىپ, تاعى جۇمىس ىستەۋ كەرەك. ەندى ۇلتتىق قۇرامامەن ازيا ويىندارىنا دايىندىق كۇتىپ تۇر. قۇرامانىڭ جۋىردا جاساقتالعانىنا قاراماستان, جاقسى ناتيجە كورسەتۋگە بارىمىزدى سالامىز», دەدى ۇلتتىق قۇراما قاقپاشىسى اسىلحان نابيەۆ.
قازاقستان ەرلەر قۇراماسى الدا قىتايداعى ازيا ويىندارى مەن قاتار استاناسىندا وتەتىن پاريج وليمپياداسىنىڭ ىرىكتەۋ تۋرنيرىنە قاتىسادى.
