UFC پرەزيدەنتى دانا ۋايتتىڭ ايتۋىنشا, شاۆقات راحمونوۆ 16 قىركۇيەك كۇنى مەكسيكانىڭ تاۋەلسىزدىگى كۇنىنە وراي اقش-تىڭ لاس-ۆەگاس قالاسىنداعى T-Mobile ارەنادا ۇيىمداستىرىلاتىن ارالاس جەكپە-جەك كەشىندە سەگىزبۇرىشقا كوتەرىلەدى. ول UFC تۋرنيرىندە امەريكالىق كەلۆين گاستەلۋممەن ايقاسادى. بۇل جەكپە-جەك وسى كەشتىڭ ەڭ نەگىزگى جەكپە-جەگىنىڭ ءبىرى بولادى دەپ جوسپارلانىپ وتىر. 31 جاستاعى گاستەلۋم 2010 جىلدان بەرى ارالاس جەكپە-جەكپەن شۇعىلدانادى. وسى ۋاقىتقا دەيىن ول 26 مارتە وكتاگونعا شىعىپ, سونىڭ 17-سىندە جەڭىسكە جەتكەن. سەگىز ايقاسىندا قارسىلاسىنا جول بەرگەن بولسا, ءبىر كەزدەسۋى ەسەپكە الىنباعان. UFC-ءدىڭ ورتا سالماقتاعى رەيتينگىندە 12-ساتىعا جايعاسقان.
كەلۆين ەڭ كەيىنگى كەزدەسۋىن وسى جىلدىڭ ءساۋىر ايىندا امەريكالىق كريس كيورتيسپەن وتكىزىپ, تورەشىلەردىڭ شەشىمى بويىنشا جەڭىسكە جەتكەن. سونىمەن قاتار سول كەشتىڭ ەڭ ۇزدىك فايتەرى اتانعان. ال «نوماد» لاقاپ اتىمەن الەمگە تانىلعان 28 جاستاعى شاۆقات راحمونوۆ ناۋرىز ايىندا وتكەن ايقاسىندا امەريكالىق دجەفف نيلدەن باسىم تۇسكەن بولاتىن.
