بۇل اقپاراتتى جەتىسۋ وبلىسىنىڭ پوليتسيا دەپارتامەنتى راستادى. 35 جاستاعى سپورتشىنىڭ ءمايىتى ءوزى تۇرىپ جاتقان قاراتال اۋدانىنىڭ دوستىق اۋىلىنان تابىلعان.
«زورلىقپەن ءولتىرۋ بەلگىلەرى تابىلعان جوق. تۋىستارىنىڭ مالىمەتى بويىنشا, ەر ادام ءوز- وزىنە قول جۇمساعان. قازىرگى تاڭدا سوتقا دەيىنگى تەرگەۋ جۇمىستارى جۇرگىزىلۋدە. قىلمىستىق ءىس اۋداندىق پوليتسيا باسشىلىعىنىڭ نازارىندا», دەپ حابارلادى جەتىسۋ وبلىستىق پوليتسيا باسقارماسى.
ايتا كەتەيىك, ۆلاديمير سەدوۆ – قازاقستاننىڭ ەڭبەك سىڭىرگەن سپورت شەبەرى, 2008 جىلعى بەيجىڭ وليمپياداسىنىڭ قاتىسۋشىسى, قازاقستان رەسپۋبليكاسىنىڭ ءتورت دۇركىن چەمپيونى, 2010 جىلعى قازاقستان چەمپيوناتىنىڭ رەكوردسمەنى. ءساتتى ونەر كورسەتكەنى ءۇشىن «قۇرمەت» وردەنىمەن ماراپاتتالعان.
زىلتەمىرشىنىڭ جۇلدىزدى كەزەڭى 2009-2016 جىلدار ارالىعىندا بولدى. ول الەم چەمپيوناتتارىندا بىرنەشە مەدال جەڭىپ العان ەدى. سودان كەيىن سپورتشىنىڭ دوپينگ قابىلداعانى انىقتالىپ, حالىقارالىق اۋىر اتلەتيكا فەدەراتسياسى ونىڭ بارلىق مەدالدارىن قايتارىپ الدى.
