وليمپيادا كۇنى اياسىندا لوندون وليمپياداسىنىڭ چەمپيونى سەرىك ساپيەۆ, 2016 جىلعى ريودا ۇيىمداستىرىلعان وليمپيا ويىندارىنىڭ كۇمىس جۇلدەگەرى ۆاسيلي لەۆيت جانە بوكستان الەم جانە ازيا چەمپيونى مەرەي اقشالوۆ جاس سپورتشىلارعا شەبەرلىك ساباقتارىن وتكىزدى.
«بارشا قازاقستاندىقتاردى حالىقارالىق وليمپيادا كۇنىمەن قۇتتىقتايمىن! وسىنداي ءىس-شاراعا قاتىسىپ وتىرعانىما قۋانىشتىمىن. جاس سپورتشىلاردىڭ وليمپيادالىق سپورتقا قىزىعۋشىلىق تانىتىپ, چەمپيون بولۋعا ۇمتىلعانىن, ەلىمىزدىڭ چەمپيوندارىمەن كەزدەسكىسى كەلەتىنىن كورۋ – ءبىز ءۇشىن ۇلكەن قۋانىش. مەنىڭ ويىمشا, وسكەلەڭ ۇرپاق جىل وتكەن سايىن سپورتقا بەت بۇرىپ كەلە جاتقانى دا قۋانتادى. «ۇستازدان شاكىرت وزار» دەگەندەي, جاس سپورتشىلاردىڭ بىزدەن وزىپ, جۇزدەن جۇيرىك اتانۋى ءۇشىن بارىمىزدى سالامىز! مەرەكە قۇتتى بولسىن!», دەدى سەرىك ساپيەۆ.
سونىمەن قاتار جاس سپورتشىلار وليمپيادالىق سپورت تۇرلەرىنە ارنالعان ۆيكتوريناعا, «كوڭىلدى ستارتتار» ەستافەتاسىنا قاتىسىپ, ءوز باقتارىن سىناپ كوردى. ارقايسىسى ءوز ءبىلىمى مەن داعدىلارىن كورسەتىپ, قازاقستاننىڭ ۇلتتىق وليمپيادا كوميتەتىنىڭ باعالى سىيلىقتارىن ۇتىپ الدى.
«ەلىمىزدىڭ بارلىق تۇرعىندارىن حالىقارالىق وليمپيادا كۇنىمەن قۇتتىقتاعىم كەلەدى. وليمپيادا كۇنى – جىل سايىن تويلاناتىن يگى ءداستۇر. وسىنداي ءىس-شارالارعا قاتىسقان ۇلدار مەن قىزدار چەمپيون بولۋدى جانە جەڭىس تۇعىرىنان قازاقستان تۋىن جەلبىرەتۋدى ارماندايدى. وسكەلەڭ ۇرپاققا دەگەن سەنىمىم مول جانە ولاردىڭ اتا-انالارىنا بالاسىنىڭ تاڭداۋىنا قۇرمەتپەن قاراعانى ءۇشىن ريزاشىلىعىمدى ايتقىم كەلەدى. ۆيكتورينالارعا بەلسەندى قاتىسقان بالالاردىڭ بىلىمگە دەگەن قۇشتارلىعىنا ءتانتىمىن. قازاقستاندا سپورت قارقىندى دامىپ كەلەدى, بۇل قۋانارلىق جاعداي!», دەدى ۆاسيلي لەۆيت.
ۇلتتىق وليمپيادا كوميتەتى حالىقارالىق وليمپيادا كۇنىن 30 جىل بويى وتكىزىپ كەلەدى.
