باتىس قازاقستان وبلىسىندا تۋىپ-وسكەن 35 جاستاعى داۋرەن ەرمەكوۆ قازىرگى كەزدە اقتوبەدەگى «ەركىن كۇش» كلۋبىندا جاتتىعادى. سپورتتىق مانسابىن 2012 جىلدىڭ كۇزىندە باستاعان ول وسى كۇنگە دەيىن 22 كەزدەسۋ وتكىزىپ, 17 رەت جەڭىسكە جەتتى. 10 قارسىلاسىن ەسىنەن تاندىردى. بۇعان دەيىن ەرمەكوۆ «Eagle FC» مەن «Naiza Fighting Championship» چەمپيوندىق اتاعىن يەلەندى. رۋسلان شاميلوۆتىڭ جاسى 27-دە. ول – رەسەيدىڭ پسكوۆ وبلىسىنىڭ تۋماسى. كاسىپقويلار اراسىنداعى جارىستا 16 مارتە وكتاگونعا شىعىپ, 12 رەت باسىمدىق تانىتتى. توعىز باسەكەنى مەرزىمىنەن بۇرىن اياقتادى.
جەكپە-جەك باستالعان بەتتە ەكەۋى تىك تۇرىپ ايقاستى. بۇل جەردە ەشكىمنىڭ باسىمدىعى بايقالمادى. ەكىنشى راۋندتا داۋرەن كۇرەسكە كوبىرەك كوڭىل ءبولۋدى قۇپ كوردى. بۇل تاكتيكا ءوز جەمىسىن بەردى. ول قارسىلاسىن قايتا-قايتا جىعىپ الىپ, جەردە ابدەن ۋماجدادى. قازاق فايتەرىنىڭ سوققىلارى دا قارسىلاسىنا ءجيى دارىدى. رۋسلان تەك قاۋىپتى جاعدايدان قۇتىلۋدى عانا ويلادى. بىراق ەرمەكوۆ ونى تەمىر قۇرساۋىنان وڭايلىقپەن بوساتپادى. قالعان راۋندتاردا دا سول كورىنىستىڭ كۋاسى بولدىق. ناتيجەسىندە, بارلىق تورەشى داۋرەن ەرمەكوۆتىڭ مىقتىلىعىن ءبىراۋىزدان مويىندادى.
جاسىراتىنى جوق, سول كەشتە «الماتى ارەنانى» بەتكە العان جانكۇيەرلەردىڭ دەنى اسا اۋىر سالماقتاعى ۆياچەسلاۆ داتسيك پەن عالىمجان جاسلانوۆتىڭ جەكپە-جەگىن كورۋگە ەرەكشە قۇلشىنىس تانىتتى. ويتكەنى «سارى تارزاننىڭ» اتاعى الىسقا جايىلعان. ءيا, كوبىنە-كوپ جاعىمسىز كەيىپتە ەكەنىن دە مويىندايمىز. راسىندا دا, داتسيكتىڭ ىستەمەگەنى جوق. ونىڭ جۇرگەن جەرى جانجال, ايعاي-شۋ, داۋ-داماي... ايقاس الاڭىندا ەرەجەنى ورەسكەل بۇزىپ, قارسىلاسى نەمەسە تورەشىلەرمەن توبەلەسكەنى بىلاي تۇرسىن, كوشەدە ادامداردى ۇرىپ, دۇكەندەر مەن سالونداردى تونادى. سول ءۇشىن ۇستىنەن قىلمىستىق ءىس قوزعالىپ, ءبىراز جىلىن تەمىر قاپاستا دا وتكىزدى. جۇيكە اۋرۋىنا شالدىققانداردىڭ اۋرۋحاناسىنا دا جاتىپ شىقتى. 2010 جىلى ۆياچەسلاۆتىڭ شەكارانى زاڭسىز بۇزىپ ءوتىپ, نورۆەگيادان ءبىر-اق شىققانى بار. ءوزىنىڭ ايتۋىنشا, سكانديناۆيا تۇبەگىنە جەتۋ ءۇشىن ول تەڭىزدە ەكى كۇن بويى رەزەڭكە قايىقپەن جۇزگەن ەكەن. ءبىر سوزبەن ايتساق, «سارى تارزاننىڭ» ءومىرى وسىنداي شىتىرمان وقيعالارعا تولى.
جوعارىداعى جاعىمسىز جايتتارعا قاراماستان, ۆياچەسلاۆ داتسيكتىڭ مىقتى سپورتشى ەكەنىنە ەشكىمنىڭ كۇمانى جوق. 43 جاستاعى لەنينگراد وبلىسىنىڭ تۋماسى ايقاس الاڭىندا اندرەي ورلوۆسكي, دجەرونيمو دوس سانتوس جانە الەكساندر ەمەليانەنكو سىندى اتاقتى سپورتشىلاردى كەسكەن تەرەكتەي سۇلاتىپ سالىپ, داڭقتى دجەفف مونسوندى ۇپاي سانىمەن ۇتتى. ارالاس جەكپە-جەكتەن نەبارى ەكى كەزدەسۋ عانا وتكىزگەن عالىمجان جاسلانوۆتىڭ داتسيكپەن جۇدىرىقتاساتىنىن ەستىگەندە قازاق جانكۇيەرلەرى قاتتى مازاسىزداندى. شىنى كەرەك, ءبىز «قانداسىمىز قۇلاپ قالماسا ەكەن» دەپ ىشتەي تىلەدىك.
بىراق تت دەگەن جاناما ەسىممەن تانىلعان عالىمجاننىڭ جۇرەگىنىڭ تۇگى بار ەكەن. اتىشۋلى داتسيكپەن ول ايانباي ايقاستى. قورىققان دا, قايمىققان دا جوق. ەكىنشى راۋندتا قارسىلاسىن ۇرامىن دەپ قاپيادا جاسلانوۆتىڭ اياعى تايىپ كەتتى. ءىستىڭ ءمان-جايىنا بويلاماعان تورەشى بىردەن نوكداۋن بەلگىلەدى. وعان قازاقتىڭ قايسار ۇلى قاتتى ۋايىمداي قويعان جوق. كەرىسىنشە, ۋاقىت وزعان سايىن باتىل قيمىلداپ, قالاي دا جەڭىسكە جەتۋدى كوزدەدى. وزىنەن سالماعى 20 كيلو اۋىر, بويى ءبىر باس جوعارى ۆياچەسلاۆتىڭ اۋىر سوققىلارىنان ساۋاتتى قورعانا ءبىلدى. ءتىپتى ءبىر-ەكى رەت تەمىر تورعا تىرەپ قويىپ, سەريالىق سوققىلارىن ءساتتى وتكىزدى. ول كەزدەرى داتسيك تالتىرەكتەپ بارىپ, ەسىن ازەر جيدى. باسەكە اياقتالعان سوڭ ءۇش تورەشىنىڭ ەكەۋى جەڭىستى ءبىزدىڭ جىگىتكە بەرسە, بىرەۋى تەڭ ەسەپ تىركەدى. ءسويتىپ, باسىم داۋىسپەن تت جەڭىسكە جەتتى.
تورەشى جاسلانوۆتىڭ قولىن كوتەرگەن ساتتە داتسيك بۇل شەشىممەن كەلىسپەيتىندەي سىڭاي تانىتتى. ال عالىمجان بولسا, «كەلەسى جولى ماسكەۋدىڭ تورىندە مما ەرەجەسى بويىنشا توبەلەسەيىك», دەگەن ۇسىنىس ايتتى. بىراق «سارى تارزان» ودان باس تارتتى. «مەنىڭ جاسىم بىرازعا كەلدى. ەگدە تارتقان ادام ءۇشىن الىسىپ-ج ۇلىسۋ وڭاي شارۋا ەمەس. ودان وپا تاپپايتىنىم انىق. سول سەبەپتى دە ارالاس جەكپە-جەكتىڭ ەرەجەسى بويىنشا ايقاسۋدان باس تارتامىن. ال تىك تۇرىپ توبەلەسەيىك دەسەڭ, وعان مەن اركەز دايىنمىن», دەپ جاۋاپ قايىردى.
قازاقتىڭ قوس ساڭلاعى – قازىبەك ساعىن مەن باعدات جۇبانىش سۋپەر جەڭىل سالماقتىڭ (53 كيلو) التىن بەلبەۋى ءۇشىن تالاستى. ەكەۋىنىڭ دە الەمنىڭ ءۇش دۇركىن چەمپيونى دەگەن دارداي اتاعى بار. قازىبەك – قويان-قولتىق ايقاستىڭ, ال باعدات – مما-نىڭ حاس شەبەرى. وسىدان بىرنەشە جىل بۇرىن ولار اۋەسقويلار اراسىنداعى جارىستىڭ بىرىندە كۇش سىناسقان ەدى. ول كەزدە جۇبانىش تورەشىلەردىڭ شەشىمىمەن جەڭىسكە جەتتى. بۇل جولى كەرىسىنشە بولدى. وتە شيەلەنىستى وتكەن باسەكەدە قازىبەك ساعىننىڭ جولى بولىپ, چەمپيوندىق اتاق سول سپورتشىعا بۇيىردى. بىراق قازىلاردىڭ شەشىمى كورەرمەندەردىڭ باسىم بولىگىن قاناعاتتاندىرمادى. باعداتتىڭ مىسى باسىم بولعانىن العا تارتقان ولار جەر تەپكىلەپ, ايعايعا باستى. جەكپە-جەك اياقتالعان سوڭ باعدات جۇبانىش تورەشىلەردىڭ شەشىمىمەن كەلىسپەيتىنىن ايتىپ, ءوز نارازىلىعىن ءبىلدىردى.
«الماتى ارەناعا» جينالعان جانكۇيەرلەر سول كەشتە ءالىبي ىدىرىستىڭ اسقان شەبەرلىگىنە تامساندى. كۇنى بۇگىنگە دەيىن جەتى جەكپە-جەك وتكىزىپ, بارلىعىندا ايقىن باسىمدىق تانىتقان 29 جاستاعى قازاق سپورتشىسىنا بۇل كۇندەرى UFC-ءدىڭ مايتالماندارى دا قىزىعۋشىلىق تانىتىپ وتىر. وسى جىلدىڭ اياعىنا دەيىن ىدىرىستى الەمنىڭ ەڭ بەلدى پروموۋشەنى ۇيىمداستىراتىن جارىستاردىڭ بىرىنەن كورۋىمىز ابدەن مۇمكىن. وعان ول لايىق دەپ ويلايمىز. بۇل جولى ءالىبي وسى كۇنگە دەيىن بىردە-ءبىر رەت جەڭىلىستىڭ كەرمەك ءدامىن تاتپاعان برازيليالىق اليسسون سيلۆانى سان سوقتىردى.
