«مانساپ ورتالىعى» دەگەندى بۇعان دەيىن ءىرى جوعارى وقۋ ورىندارىنان ەستۋشى ەدىك. ايتالىق, اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە, كيمەپ ۋنيۆەرسيتەتىندە, حالىقارالىق اقپاراتتىق تەحنولوگيالار ۋنيۆەرسيتەتىندە «كارەرا ورتالىعى», ت.ب. جوعارى وقۋ ورىندارىندا بولعان. مۇنداي ورتالىق ەندى مەملەكەتتىك ەڭبەك نارىعىندا پايدا بولىپ وتىر.
جاڭادان قۇرىلعان ەڭبەك موبيلدىلىگى ورتالىقتارىنىڭ نەگىزگى قىزمەتى: «جۇمىس كۇشىنە سۇرانىس پەن ۇسىنىستى تالداۋ, بولجاۋ نەگىزىندە ءوڭىردىڭ ەڭبەك رەسۋرستارىنىڭ تەڭگەرىمىن قامتاماسىز ەتۋ; وڭىرلىك جۇمىسپەن قامتۋ كارتالارىن ازىرلەۋ جانە ولاردى جەرگىلىكتى جەرلەردە ىسكە اسىرۋدى ۇيلەستىرۋ; جۇمىسپەن قامتۋدىڭ بارلىق مەملەكەتتىك باعدارلامالار مەن جەكە باستامالار شەڭبەرىندە اشىلاتىن جۇمىس ورىندارىنىڭ قۇرىلۋىنا مونيتورينگ جاساۋ; جۇمىسپەن قامتاماسىز ەتۋ ماقساتىندا ازاماتتاردىڭ ەرىكتى كوشى-قونىنا جاردەمدەسۋ جانە ازاماتتاردى كوشىرۋ باعدارلامالارىن وڭىرلىك دەڭگەيدە ۇيلەستىرۋ; جۇمىس ىزدەۋشى رەتىندە جۇگىنگەن جانە جۇمىسسىز ادامداردى تىركەۋ; حالىقتى, جەرگىلىكتى اتقارۋشى ورگانداردى جانە ۋاكىلەتتى مەملەكەتتىك ورگاندى وڭىرلىك ەڭبەك نارىعىنىڭ جاي-كۇيى تۋرالى حاباردار ەتۋ», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىندە.
ەڭبەك جانە حالىقتى الەۋمەتتىك قورعاۋ مينيسترلىگىنە قاراستى حالىقتى جۇمىسپەن قامتۋ دەپارتامەنتىنىڭ ديرەكتورى اسقار نيازوۆتىڭ ايتۋىنشا, جاڭا قۇرىلعان ورتالىقتىڭ نەگىزگى ماقساتى – وڭىردەگى جۇمىسپەن قامتۋ ساياساتىن جۇيەلى دامىتۋ.
– جاڭا ورتالىقتار وسى فۋنكتسيالاردى ىسكە اسىرۋ ءۇشىن وڭىردە جۇمىس ىستەيتىن ەڭبەك نارىعىنىڭ بارلىق ينستيتۋتىن تارتاتىن بولادى. ول ءۇشىن بەلسەندى ازاماتتاردى جۇمىسقا ورنالاستىرۋعا بايلانىستى جەكەلەگەن فۋنكتسيالاردى اۋتسورسينگكە شىعارۋ قۇقىعى بەرىلەدى. ءوز كەزەگىندە, مانساپ ورتالىقتارى قالالار مەن اۋداندارداعى ەڭبەك موبيلدىلىگى ورتالىقتارىنىڭ فيليالدارى دەڭگەيىندە اشىلادى. جاڭا ورتالىقتاردىڭ نەگىزگى مىندەتى – ۇلتتىق ەڭبەك نارىعىنىڭ كورسەتكىشتەرىن جەرگىلىكتى ەرەكشەلىكتەرىمەن ۇشتاستىرا وتىرىپ, وڭىرلىك جۇمىسپەن قامتۋ ساياساتىن دامىتۋ, – دەدى ول.
بۇل رەتتە قازىرگى ۋاقىتتا جۇمىسپەن قامتۋعا جاردەمدەسۋ, ەرىكتى تۇردە قونىس اۋدارۋ, اتاۋلى الەۋمەتتىك كومەك تاعايىنداۋ بويىنشا كورسەتىلەتىن قىزمەتتەردىڭ بارلىق سپەكترى ساقتالادى جانە ولاردى كورسەتۋ سول مەكەنجايلار بويىنشا ورنالاساتىن مانساپ ورتالىقتاردا جالعاسا بەرمەك.
اسقار نيازوۆتىڭ ايتۋىنشا, بۇل ترانسفورماتسيا جۇمىسپەن قامتۋ قىزمەتىن جۇيەلى تۇردە قايتا قۇرۋعا, جۇمىستى جاقسارتۋعا جانە مەملەكەت كورسەتەتىن ەڭبەك نارىعىنا كورسەتىلەتىن قىزمەتتەردىڭ ساپاسىن ارتتىرۋعا باعىتتالعان. قىزمەت كورسەتۋ جۇيەسىن ودان ءارى دامىتۋدىڭ تاعى ءبىر ماڭىزدى تەتىگىن – جۇمىسپەن قامتۋ سالاسىنداعى بارلىق قىزمەت پەن قولداۋ ءىس-شارالارىن تولىق تسيفرلاندىرۋ بولىپ وتىر.
– تسيفرلىق جۇمىسپەن قامتۋ ورتالىقتارى – جۇمىس ىزدەۋشىلەر مەن جۇمىس بەرۋشىلەر اراسىنداعى قارىم-قاتىناستاردى جانە بيزنەس ءۇردىسىن تۇبەگەيلى وزگەرتىپ, ولاردى ونلاين رەجىمگە اۋىستىرۋعا مۇمكىندىك بەرەدى, دەيدى ا.نيازوۆ.
ونلاين قىزمەتتەردى ىسكە قوسۋ حالىقتىڭ جۇمىسپەن قامتۋ ورگاندارى قىزمەتكەرلەرىمەن تىكەلەي بايلانىسىن ازايتۋعا جانە ازاماتتار ءۇشىن قىزمەتتەردىڭ قولجەتىمدىلىگىن ارتتىرۋعا مۇمكىندىك بەردى. بۇگىنگى تاڭدا جۇمىسپەن قامتۋ سالاسىندا قىزمەت الۋعا ءوتىنىش بىلدىرگەن ازاماتتاردىڭ شامامەن 77%-ى ەلەكتروندىق ەڭبەك بيرجاسى ارقىلى ونلاين رەجىمدى پايدالانادى ەكەن.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى 12-14 ماۋسىم ارالىعىندا بۇكىل رەسپۋبليكا بويىنشا حالىقتى جۇمىسپەن قامتۋ ورتالىقتارىنىڭ قىزمەتكەرلەرىن وقىتۋ سەمينارلارىن وتكىزگەن. سونداي-اق جۇمىسپەن قامتۋ ورتالىقتارىن ترانسفورماتسيالاۋ ماقساتى مەن ەڭبەك موبيلدىلىگى ورتالىقتارىن قۇرۋ قاجەتتىلىگى ماڭىزدى ەكەنىن ايتادى ماماندار.
