كينو ونەرىندەگى مىڭ-سان ماسەلە قوعامعا تاڭسىق ەمەس. كۇنى كەشە وتكەن ۇلتتىق قۇرىلتايدا ەل پرەزيدەنتى دە بۇل تاقىرىپقا ايرىقشا توقتالدى. «كينو ماماندارى پايدا تابۋ ءۇشىن وتە ارزان فيلمدەر تۇسىرۋگە ءماجبۇر. سوندىقتان قۇنى ارزان, مازمۇنى ارزان فيلمدەر پايدا بولۋدا. وتاندىق كينونىڭ دامۋىنا جاڭاشا كوزقاراس, تىڭ سەرپىن كەرەك. مىسالى, كينوعا بارعان كورەرمەن سانىن ەسەپتەيتىن تسيفرلىق جۇيە ەنگىزۋگە بولادى. مادەنيەت جانە سپورت مينيسترلىگىنە جۋىق ارادا وسى جۇيەنى دايىنداپ, قولدانىسقا ەنگىزۋدى تاپسىرامىن. شىنىن ايتۋىمىز كەرەك, سوڭعى كەزدە تۇسىرىلگەن تاريحي فيلمدەردىڭ ولقىلىقتارى كوپ. سول ءۇشىن ماماندارمەن اقىلداسىپ, جالپى كينو سالاسىن رەفورمالاۋ كەرەك», دەدى قاسىم-جومارت توقاەۆ.
ءيا, كەيىنگى جىلدارى تاريحي تۇلعالار ومىرىنە ارنالعان تەلەسەريال كوپ ءتۇسىرىلدى: «جاڭگىر حان. ساراي سىرى», «احمەت. ۇلت ۇستازى», «دومالاق انا», «تاشەنەۆ. تايتالاس», «قانىش. قازىنا», «مۇقاعالي. بۇل عاسىردان ەمەسپىن», «مىرجاقىپ. ويان, قازاق!». ياعني تاريحي كينولاردى تەلەارنالار تۇسىرەتىن ءۇردىس بەلەڭ الدى. زەرتتەپ قاراساق, كينوفيلم مەن تەلەفيلمنىڭ كوركەمدىك جاعىنان دا, ساپالىق تۇرعىسىنان دا ايىرماشىلىعى كوپ, ەكەۋى ەكى ءتۇرلى تۋىندى. تەلەۆيزيالىق فورماتقا لايىقتالعان كەز كەلگەن كينو تەك سول شەڭبەرگە سىيادى. سول دەڭگەيدە تۇسىرىلەدى. ال بۇل ساپاداعى فيلمدەر از قاراجاتقا تۇسىرىلگەن سوڭ كوركەم تۋىندىنىڭ ۇدەسىنەن شىعا الماي جاتادى. بۇرناعى زاماندى تىرىلتۋگە كەرەكتى وبرازداردى جاساۋعا قاجەت دۇنيەلەردى جاڭعىرتۋ قوماقتى قارجىنى تالاپ ەتەتىنى زاڭدى. «جوسپار ءۇشىن», «بولىنگەن قارجىنى يگەرۋ ءۇشىن قىسقا ۋاقىتتا» تۇسىرىلگەن تۋىندىدان كوركەمدىك ىزدەۋدىڭ ءوزى ابەستىك پە دەيسىڭ.
كينو, ەڭ الدىمەن ونەر. ونەرگە ونەر تۇرعىسىنان قاراعاندا, ول ارقاشان بيىك ءھام تازا. سودان بولار, كوركەم فيلمگە قويىلار تالاپ تا جوعارى. جۇمسالار قۋات تا, ەڭبەك تە, ۋاقىت تا, قارجى دا وراسان. دەسەك تە قازىر ەستەتيكالىق ءلاززات الاتىن ساپالى فيلمدەردىڭ تۇسىرىلمەي جاتقانىنا اسەر ەتۋشى فاكتور كوپ: ناۋقانشىلدىق, ۋاقىت, قاراجات, تالعام, ءبىلىم, شەبەرلىك.
كەيىنگى جىلدارى «كينو تۋرالى» زاڭنىڭ اياسىندا قۇرىلعان ۇلتتىق كينونى قولداۋ مەملەكەتتىك ورتالىعىنىڭ تاپسىرىسىمەن كوپتەگەن فيلم ءتۇسىرىلدى. اتاپ ايتساق, 2019 جىلدان بەرى 115 جوبانى قولدادى, ونىڭ ىشىندە 48-ءى – تولىقمەتراجدى كوركەم فيلم, 29-ى – دەرەكتى فيلم, 25-ءى – قىسقامەتراجدى فيلم جانە 13-ءى – انيماتسيالىق فيلم. بۇگىندە 2022 جىلعا دەيىن مەملەكەتتىك قارجىلاندىرۋدى العان 83 ءفيلمنىڭ ءوندىرىسى اياقتالعان. ال 20 جوبا ءالى ءتۇسىرىلىپ جاتىر. كينوورتالىقتىڭ ءبىر يگىلىگى, كەز كەلگەن جەكە پروداكشندەر ءوزىنىڭ شىعارماسىن ۇسىنا الادى. ال بۇرىن مەملەكەتتىك بيۋدجەتتىڭ قارجىسى تەك «قازاقفيلمگە» تۇسەتىن, ياعني وعان جەكە ستۋديالار قاتىسا المايتىن. مۇندا ءبارى ءوز جۇمىسىن ۇسىنا الاتىندىقتان, باسەكە جوعارى. بىراق سول كوپتىڭ اراسىنان اسىلدى تاۋىپ, وتكىزۋ جاعى قيىنعا سوعىپ تۇر. وعان قوسا ۇلتتىق كينونى قولداۋ مەملەكەتتىك ورتالىعى تەك وندىرىسكە ءمان بەرەتىندىكتەن, ونىڭ رەداكتورلىق, كوركەمدىك, ۇلتتىق بوياۋى سولعىن با, قانىق پا, شىنىمەن دە ۇلتتىق دۇنيەگە جاتا ما, وعان ءمان بەرمەيدى. ماسەلەن, بىلتىر ىرىكتەۋدەن وتكەن مەملەكەتتەن قارجىلاي قولداۋ الاتىن 62 جوبانىڭ 35-ءى – مەملەكەتتىك تىلدە جازىلىپ, مەملەكەتتىك تىلدە تۇسىرىلەتىن فيلم. وزگەسى – ورىس تىلىندە ءتۇسىرىلىپ, سودان كەيىن عانا مەملەكەتتىك تىلدە دىبىستالادى. قوعامدا اتالعان ورتالىققا قاتىستى بۇدان وزگە دە داۋلى پىكىرلەر جەتەرلىك. القيسسا. پرەزيدەنت تاپسىرماسىنان سوڭ كينو وندىرىسىندە جىل كەلگەندەي ءبىر جاڭالىق سەزىلەر دەيمىز.
