ءىس-شارانىڭ ماقساتى – مادەني-تاريحي قۇندىلىقتاردى كەڭىنەن ناسيحاتتاۋ ارقىلى ۇلتتىق بىرەگەيلىكتى ايقىندايتىن ادامگەرشىلىك باعدارلاردى دارىپتەۋ جانە قالىپتاستىرۋ. مەملەكەتتىك قىزمەتتىڭ قۇلاعىندا جۇرگەن جاس مامانداردىڭ ءبىلىمى مەن بىلىكتىلىگى ساراپقا سالىنعان ءىس-شاراعا مەملەكەتتىك قىزمەت ىستەر اگەنتتىگىنىڭ الماتى وبلىسى بويىنشا دەپارتامەنتى جانە الماتى وبلىسى ىشكى ساياسات باسقارماسى مەن الماتى وبلىسى جاستار رەسۋرستىق ورتالىعى ۇيىتقى بولدى. باسەكەلى بايقاۋعا 12 كوماندا قاتىستى.
تاۋ ەتەگىندەگى «عۇن» ەتنواۋىلىندا وتكەن بايقاۋ شارتىنا ساي, ءار اۋداننان ات ارىتىپ جەتكەن مەملەكەتتىك قىزمەتشىلەردەن قۇرالعان كوماندالار ءتورت كەزەڭ بويىنشا ءبىلىم-بىلىكتىلىگىن بايقاتىپ, كۇش-جىگەرلەرىن سىنعا سالدى. بايقاۋدىڭ شىمىلدىعىن اشقان «ونەرلىنىڭ ءورىسى كەڭ» اتتى العاشقى كەزەڭدە قاتىسۋشىلار وزدەرىن تانىستىرا كەلىپ, ءان سالىپ, بي بيلەپ, بويدا بار ونەرلەرىن پاش ەتتى. ال ەكىنشى «تولاعاي» سپورتتىق كەزەڭىندە جۇگىرۋ مەن سەكىرۋدەن تۇراتىن بىرنەشە ەستافەتالىق جارىس ۇيىمداستىرىلدى. ونەر مەن سپورتتىق جارىستاردان سوڭ مەملەكەتتىك قىزمەتتەگى ايەلدەر ۇلتتىق تاعام تۇرلەرىن, اتاپ ايتقاندا, بۋىن بۇرقىراتا باۋىرساق ءپىسىرۋ, ءيىن قاندىرا قامىر يلەۋ, قۇرت جاساۋداعى شەبەرلىكتەرىن كورسەتسە, ەر-ازاماتتار ات ەرتتەپ, قوشقار كوتەرۋدە تولاعاي كۇش يەلەرى ەكەنىن تانىتتى. تارتىسقا تولى ءتورتىنشى كەزەڭدە تاريح پەن مادەنيەت, سالت-داستۇرگە قاتىستى تانىم كوكجيەگىن تانىتقان ۆيكتورينالىق سۇراقتارعا جاۋاپ بەرۋدەگى تاپقىرلىقتارى تارازىلاندى.
مەملەكەتتىك قىزمەتكەر مەملەكەتتىڭ ايناسى ەكەنىن ايقىنداعان بايقاۋ بارىسىندا مەملەكەتتىك قىزمەتشىنىڭ بويىنداعى قاسيەتتەر مەن مىندەتتەر كورىنىس تاۋىپ, ءىس-شارانىڭ مازمۇنىن اشا ءتۇستى.
سونىمەن مەملەكەتتىك قىزمەت ەتە ءجۇرىپ, وتباسى قۇندىلىعىن ارتتىرىپ, سالت-ءداستۇردى دارىپتەگەن «داستۇردەن تاعىلىم» بايقاۋىنىڭ قورىتىندىسى بويىنشا ءبىرىنشى ورىندى تالعار اۋدانىنىڭ «قازىنا» كومانداسى جەڭىپ الىپ, 200 مىڭ تەڭگە سىيلىققا يە بولدى. ال ەكىنشى ورىندى كەگەن اۋدانىنىڭ «كولساي» كومانداسى ۇتىپ السا, ءۇشىنشى ورىنعا ۇيعىر اۋدانىنىڭ «قارادالا قىراندارى» اتتى كومانداسى تۇراقتاپ, قارجىلاي سىيلىقتاردى قانجىعاسىنا بايلادى.
جەڭىمپاز كوماندالاردى قۇتتىقتاعان مەملەكەتتىك قىزمەت ىستەر اگەنتتىگىنىڭ الماتى وبلىسى بويىنشا دەپارتامەنت باسشىسى ءلاززات مۇقاتايقىزى مەملەكەتتىك قىزمەتشىلەردىڭ بۇگىنگى ءرولى مەن جاۋاپكەرشىلىگىن اتاي كەلە, ەل دامۋىنا قوسىپ جۇرگەن ەڭبەكتەرىنىڭ ابىرويلى بولۋىنا تىلەكتەستىگىن ءبىلدىردى.
«الماتى وبلىسىندا مەملەكەتتىك قىزمەتشىلەردىڭ شتات سانى 4 152 بولسا, وسى كۇنى بۇل باعىتتا 3 709 مەملەكەتتىك قىزمەتشى ەڭبەك ەتىپ كەلەدى. ولاردىڭ 50 پايىزىن ايەلدەر قۇرايدى, ولاردىڭ ورتا جاسى – 39. مەملەكەتتىك قىزمەتشىلەردىڭ 94 پايىزى جوعارى ءبىلىمدى», دەيدى ءلاززات مۇقاتايقىزى.
الماتى وبلىسى
