قازاقستان قۇراما كومانداسى بۇل جارىستا 1 التىن, 1 كۇمىس, 5 قولا مەدال ەنشىلەپ, 42 ەلدىڭ اراسىندا جالپىكوماندالىق ەسەپتە 4 ورىنعا يە بولدى.
«كەرەمەت سەزىمدەمىن, ءوز ەلىمىزدە ءوتىپ جاتقان بايراقتى جارىستا التىنعا قول جەتكىزۋ – ماڭدايىما جازىلعان باقىت شىعار. قۋانىشىمدى سوزبەن ايتىپ جەتكىزۋ مۇمكىن ەمەس. گولدەن سكور سەگىز مينۋتقا سوزىلسا دا, شارشاعانىم سەزىلمەيدى. قارسىلاسىممەن ءبىر-ءبىرىمىزدىڭ قىر-سىرىمىزدى ءبىلىپ, ابدەن نامىسقا سالىپ كۇرەستىك. ءوز ەلىمىزدە وتەتىن جارىسقا پسيحولوگيالىق تۇرعىدا جاقسى دايىن بولدىم. مەنى قولداعان بارشا قازاق ەلىنە العىسىم شەكسىز», دەدى چەمپيون اتانعان ماعجان شامشادين.
ءۇش كۇنگە سوزىلعان الەمدىك دودادا قازاقستان ساپىنان 60 كەلىگە دەيىنگى سالماق دارەجەسىندە ماعجان شامشادين چەمپيون اتانىپ, عۇسمان قىرعىزباەۆ (-66 كگ) كۇمىس جۇلدە ەنشىلەسە, دانيار شامشاەۆ (-73 كگ), اسقار نارقۇلوۆ (-73 كگ), يسلام بوزباەۆ (-100 كگ), عالىمجان قىرىقباي (+100 كگ) جانە اقەركە رامازانوۆا (+78 كگ) جەڭىس تۇعىرىنىڭ ءۇشىنشى ساتىسىنا كوتەرىلدى.
عاليا تىنباەۆا (-48كگ), جانساي سماعۇلوۆ (-73 كگ) پەن بەكارىس سادۋاقاس (-100كگ) كىشى فينالعا دەيىن جەتىپ, 5 ورىنعا تۇراقتادى.
«Qazaqstan barysy Grand Slam جارىسى تاجىريبەلى جانە جاس دزيۋدوشىلار ءۇشىن وتە كەرەمەت الاڭ بولدى. جارىس ناتيجەسىنە قاراپ, ءبىزدىڭ قۇرامادا بۋىن الماسىپ جاتقانىن جانە ءارتۇرلى سالماق اراسىندا ەل ىشىندە باسەكەنىڭ ارتىپ جاتقانىن بايقاۋعا بولادى.
جارىس ءوز جەرىمىزدە ءوتىپ جاتقاندىقتان جاۋاپكەرشىلىك جۇگى ەكى ەسە بولدى. كەيبىر دزيۋدوشىلار ءوز قاتەلىكتەرىنەن مەدالعا قول سوزىم جەردەن توقتاسا, كەيبىرەۋلەرىنىڭ باپتارى مەن باقتارى قاتار شاپپادى.
ءبىزدىڭ سپورتشىلارىمىزعا قولداۋ ءبىلدىرىپ كەلگەن بارلىق جانكۇيەرلەرگە راحمەت ايتامىن جانە ءبىز ءالى دە سىزدەردىڭ ۇمىتتەرىڭىزدى اقتاۋ ءۇشىن كوپ ەڭبەك ەتەتىن بولامىز», دەدى دزيۋدودان قازاقستان ەرلەر ۇلتتىق قۇراماسىنىڭ باس باپكەرى نۇربول سۇلەيمەنوۆ.
قازاقستان دزيۋدو فەدەراتسياسىنىڭ باس حاتشىسى الەمدىك جارىستىڭ ۇيىمداستىرىلۋىن حالىقارالىق ماماندار تاراپىنان جوعارى باعالانعانىن اتاپ ءوتتى.
«Qazaqstan barysy Grand Slam» جارىسىنىڭ ۇيىمداستىرىلۋى حالىقارالىق دزيۋدو فەدەراتسياسى تاراپىنان جوعارى باعالاندى. مۇندا تەك سپورتشىلار ەمەس, دزيۋدو سپورتىنىڭ اينالاسىندا جۇرگەن ءاربىر مەنەدجەر تاجىريبە الىپ ۇلگەردى. ءبىز وسى ۋاقىتقا دەيىن ازيا جانە الەم چەمپيوناتتارىن, گران-پري جانە Masters جارىستارىن, سونداي-اق جاسوسپىرىمدەر اراسىنداعى الەم چەمپيوناتىن وتكىزگەن ەدىك. ەندى تاجىريبەمىزگە الەمدىك Grand Slam باسەكەسى قوسىلدى.
الەمدىك جارىس اياقتالعاننان كەيىن ءبىز بىرنەشە كوماندامەن بىرگە حالىقارالىق وقۋ-جاتتىعۋ لاگەرىن وتكىزەمىز. وندا تەك ۇلتتىق قۇراما سپورتشىلارى ەمەس, جاستار قۇراماسىنىڭ وكىلدەرى دە قاتىسىپ, شەتەلدىك سپورتشىلارمەن بىرگە جاتتىعۋ مۇمكىندىگىنە يە بولادى.
سپورتشىلار مەن باپكەرلەرگە, دەمەۋشىلەرىمىز بەن سەرىكتەستەرىمىزگە, وسى جارىستى ۇيىمداستىرۋعا اتسالىسقان ءاربىر سپورت سالاسىنىڭ قىزمەتكەرلەرىنە, مەنەدجەرلەرگە, مەديتسينا ماماندارىنا, ءار ەرىكتىگە, وسى جارىستىڭ باس-قاسىندا جۇرگەن ءار مامانعا باس ءيىپ, العىسىمدى بىلدىرەمىن. بارلىعىمىزدىڭ جۇمىلا جاساعان جۇمىسىمىزدىڭ جەمىسىن كورىپ وتىرمىز. بارشاڭىزعا ىسكە ءسات!», دەدى باس حاتشى اسحات جىتكەەۆ.
ايتا كەتەرلىگى, حالىقارالىق دزيۋدو فەدەراتسياسىنىڭ كۇنتىزبەسىنە ەنگەن «Qazaqstan barysy Grand Slam» اتاۋىمەن ەنگەن بۇل جارىسقا بارلىعى 42 ەلدەن 340 سپورتشى قاتىستى.
بۇل دودانىڭ ناتيجەسىندە IJF ەرەجەلەرىنە سايكەس جارىستىڭ جەڭىمپازدارى مەن جۇلدەگەرلەرى اراسىندا الەمدىك جانە وليمپيادالىق رەيتينگتەردە ۇپايلار ءبولىندى. اتاپ ايتقاندا, 1 ورىن ءۇشىن 1000, 2 ورىن ءۇشىن – 700, ال 3 ورىن ءۇشىن – 500 ۇپايدان بەرىلدى.
«Qazaqstan barysy Grand Slam» تۋرنيرىندە دزيۋدوشىلار 2024 جىلى پاريجدە وتەتىن جازعى وليمپيادا ويىندارىنا قاتىسۋ ءۇشىن ۇپاي جينادى.
ەستەرىڭىزگە سالا كەتسەك, قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسىنىڭ (IJF) ەكىجاقتى كەلىسىمشارتىنا سايكەس, قازاقستان الەمدىك Grand Slam جارىسىن 2023-2026 جىلدار ارالىعىندا قابىلدايدى.
