«جاس ۇرپاق تاريح تاعىلىمىن جانە ەلدىڭ جارقىن بولاشاققا ۇمتىلىسىن ءبىر ارناعا توعىستىرىپ جاتىر. وسىلايشا, ولار ۇلتتىڭ رۋحىن جاڭعىرتۋدا. وسى سەرپىلىستىڭ قارقىنىن ساقتاي وتىرىپ, ونى كۇشەيتە ءتۇسۋ – مەملەكەتتىڭ مىندەتى. بۇل مىندەتتى ابىرويمەن اتقارساق, قازاقتىڭ رەنەسسانس ءداۋىرى, ياعني تۇبەگەيلى وزگەرىستەر زامانى كەلەدى», دەدى پرەزيدەنت.
مەملەكەت باسشىسىنىڭ ايتۋىنشا, اعا بۋىن وكىلدەرى, ەڭبەكقورلىق, ىسكەرلىك سياقتى قۇندىلىقتاردى ۇلگى كورسەتۋ ارقىلى جاستارعا دارىپتەۋ كەرەك. جاستارىمىز كوپ سوزگە قۇمار, جاعىمپاز, جالقاۋ, ەنجار, ماسىل بولماۋعا ءتيىس. ولاردى وسىنداي تەرىس ادەتتەردەن قاشىق بولۋعا ۇيرەتۋ كەرەك. ءبىزدىڭ قوعام وزگەرىستى بىرەۋدەن ماداق ەستۋ ءۇشىن ەمەس, ەڭ الدىمەن, ءوزى ءۇشىن جاساۋعا ءتيىس. مۇنى ەلدىڭ ەرتەڭى, ۇرپاقتىڭ بولاشاعى جارقىن بولۋى ءۇشىن قولعا الۋ كەرەك.
«اشىعىن ايتساق, ءبىز كەيدە ءوز ومىرىمىزدەن گورى جۇرتتىڭ پىكىرىنە كوبىرەك ءمان بەرەمىز. ءتىپتى, بۇل ادەت قانىمىزعا سىڭگەن دەۋگە بولادى. ارينە, قازاقتىڭ قوناقجايلىعى – جاقسى قاسيەت. بىراق ءۇيدىڭ ءىشى-سىرتىن قوناق كەلگەندە عانا رەتكە كەلتىرۋ دۇرىس ەمەس», دەدى ق.توقاەۆ.
