- ءبىز سىزدەرگە كومەكتەسكەنىمىزگە قۋانىشتىمىز. قازىرگى ۋاقىتتا سۋ, جارىق, جول بولۋى ءۇشىن ينفراقۇرىلىم ماڭىزدى ەكەنىن تۇسىنەمىز. سوندا عانا اۋىلدى جەردە ءومىر ءسۇرۋ الدەقايدا قولايلى بولادى. سىزدەر ءوڭىرىمىز ءۇشىن زور جۇمىس اتقارىپ جۇرسىزدەر – مال ءوسىرىپ, ازىق-ت ۇلىك دايىندايسىزدار. سىزدەردىڭ اۋىز سۋعا مۇقتاج ەكەندىكتەرىڭىزدى بىلگەننەن كەيىن قاراپ وتىرا المادىق, - دەدى «ارسەلورميتتال تەمىرتاۋ» اق باس ديرەكتورى ۆلاديمير يابلونسكي جەرگىلىكتى تۇرعىندارعا.
ۇڭعىمانى بۇرعىلاۋ – «ارسەلورميتتال تەمىرتاۋ» كومپانياسى ءوز موينىنا العان جۇمىستىڭ بىرەۋى عانا. بۇعان قوسا, وسىندا مال كىرمەۋى ءۇشىن ءبىر اي ىشىندە قورشاۋ ورناتۋ, ەلەكتر بەرۋ جەلىسىن جەتكىزۋ, سورعىنى ورناتۋ, اۋىز سۋ شۇمەگى شىعارىلاتىن مودۋلدىك عيماراتتى سالۋ جوسپارلانىپ وتىر. سۋدى ۇيلەرگە جەتكىزۋ ماسەلەسى دە تالقىلانۋ ۇستىندە.
مەملەكەت باسشىسى 2025 جىلعا دەيىن ەل تۇرعىندارىن ساپالى اۋىز سۋمەن تولىق قامتاماسىز ەتۋ مىندەتىن قويدى. ءبىزدىڭ اۋداندا ورتالىقتاندىرىلعان سۋ جوق 20-دان استام ەلدى مەكەن بار, سولاردىڭ ءبىرى – جاڭاجول اۋىلى ەدى. تۇرعىندار اتىنان «ارسەلورميتتال تەمىرتاۋ» كومپانياسىنا ۇلكەن العىس ايتامىن. سىزدەر بيزنەستىڭ الەۋمەتتىك جاۋاپكەرشىلىگىن ءىس جۇزىندە كورسەتىپ وتىرسىزدار. كومپانيامەن جاسالعان مەموراندۋم اياسىندا ءبىز اۋدان ءۇشىن كوپتەگەن پايدالى جوبانى ىسكە اسىراتىنىمىزعا سەنىمدىمىن, - دەدى قارقارالى اۋدانىنىڭ اكىمى ەرلان قۇسايىن. 
جاڭاجولدى اۋىز سۋمەن جابدىقتاۋ جوباسىمەن «ارسەلورميتتال تەمىرتاۋ» اق-نىڭ «وركەن» جشس-ءنىڭ ماماندارى اينالىسىپ ءجۇر. ولار بيىلعى مامىر ايىندا 19 مەترلىك ۇڭعىمانى بۇرعىلاۋعا كىرىسىپ, جۇمىستى 10 كۇن ىشىندە اياقتادى.
- قارقارالى وڭىرىندە كەنتوبە كەنىشى ورنالاسقان, وندا 420 ادام ەڭبەك ەتەدى, ونىڭ 90 پايىزى – جەرگىلىكتى تۇرعىندار. «ارسەلورميتتال تەمىرتاۋ» اق-نىڭ اۋدانعا كورسەتكەن كومەگى – شىنتۋايتىندا, ءوز قىزمەتكەرلەرىنە كورسەتكەن كومەگى. كومپانيا ادامداردىڭ تۇرمىسىن جاقسارتۋعا مۇددەلى, - دەدى «وركەن» جشس «وركەن-كەنتوبە» وكىلدىگىنىڭ ديرەكتورى لەونتي رۋسانوۆ. 
ۇڭعىمانىڭ دەبيتى – ساعاتىنا 43 تەكشە مەتر. قارقارالى اۋدانىنىڭ تۇرعىن ءۇي جانە كوممۋنالدىق شارۋاشىلىق ءبولىمىنىڭ مالىمەتىنە قاراعاندا, جاڭاجول اۋىلى ءۇشىن قاجەتتى سۋ كولەمى تاۋلىگىنە 40 تەكشە مەتردى قۇرايدى. ياعني, جاڭا ۇڭعىمانىڭ قۋاتى ەلدى مەكەننىڭ تۇتىنۋ مولشەرىنەن بىرنەشە ەسە كوپ. قازىر سۋدىڭ ساپاسىنا ساراپتاما جۇرگىزىلىپ جاتىر.
جەرگىلىكتى تۇرعىندار بىرنەشە جىل بويى جاردەم سۇراپ, تالاي تابالدىرىقتى توزدىرعان ەدى. اقىرى ولاردىڭ تۋعان اۋىلىنا دا اۋىز سۋ كەلدى.
- جاڭا اكىم تاعايىندالعان سوڭ عانا سەڭ ورنىنان قوزعالدى. ول وسىندا ءۇش رەت ارنايى كەلىپ, جۇمىستىڭ قالاي جۇرگىزىلىپ جاتقانىن تەكسەردى. ەندى ءبىز تالداۋ ناتيجەلەرىن كۇتەمىز. بىراق سۋدى ۇرتتاپ كورگەن سوڭ-اق ول ءبىز ءىشىپ جۇرگەننەن الدەقايدا جاقسى دەپ ۇيعاردىق. قارقارالى اۋدانىنىڭ اكىمى مەن «ارسەلورميتتال تەمىرتاۋ» كومپانياسىنا ءبىزدىڭ ارمانىمىزدى ورىنداعانى ءۇشىن كوپ راحمەت! - دەدى اۋىل اقساقالى تاۋلەت تەرلىكباەۆ.
