پوليگون اۋماعىندا اسكەري قىزمەتشىلەردىڭ كاسىبي بىلىكتىلىگىن ارتتىرىپ, شەبەرلىكتەرىن شىڭداۋدى ماقسات تۇتقان وقۋ-جاتتىعۋ جيىنى ءۇش كۇنگە سوزىلىپ, جاۋىنگەرلەر ءوزارا تاجىريبە الماستى.
– وقۋ-جاتتىعۋ جيىنى بارىسىندا ءبولىم كومانديرلەرى مەن ولاردىڭ ورىنباسارلارى بروندى ترونسپورتەر تەحنيكاسىن جۇرگىزۋ, سۋدا جۋزۋ, ءارتۇرلى موديفيكاتسياداعى قارۋ-جاراقپەن وق اتۋ ساباقتارىن ءوتتى. بۇگىندە ولار وتە جاقسى ناتيجە كورسەتىپ جاتىر, – دەدى 5511 اسكەري ءبولىم كومانديرىنىڭ قارۋ-جاراق جونىندەگى ورىنباسارى, مايور ابرور ابدۋللاەۆ.
قۋاتتى قارۋمەن جابدىقتالعان بتر-80 – سوڭعى ۇلگىدە جاڭارتىلعان تەحنيكا. جول تالعامايتىن كولىك ويلى-قىرلى جەرلەرمەن دە, سۋدا دا جۇرە بەرەدى. ونى كەڭەس اسكەرلەرى اۋعان سوعىسىندا قولدانعان. كەيىن 90-جىلداردان باستاپ رەسەي قارۋلى كۇشتەرىنىڭ جانە باسقا دا بىرقاتار بۇرىنعى كەڭەستىك رەسپۋبليكانىڭ بارلىق ءىرى قارۋلى قاقتىعىستارىندا ءوزىنىڭ تيىمدىلىگىن كورسەتكەن. ونى جۇرگىزۋ دە ەكىنىڭ ءبىرىنىڭ قولىنان كەلە بەرمەيدى.
– قازىرگى ۋاقىتتا بTر-80-ءدى سۋدا جۇرگىزۋ ءۇشىن پراكتيكالىق ساباقتار بولىپ جاتىر. بۇل تەحنيكا الدىنان كەزىككەن شۇڭقىر عانا ەمەس, وزەن سەكىلدى كەدەرگىلەردى دە وڭاي ەڭسەرەدى. سۋعا تۇسپەس بۇرىن ونى جاقسىلاپ تەكسەرىپ, بارلىق ليۋكتەردى جابۋ كەرەك, – دەيدى 5518 اسكەري ءبولىمىنىڭ اعا مەحانيك جۇرگىزۋشىسى, سەرجانت رۋسلان بەكەنوۆ.
وقۋ-جاتتىعۋ جيىنى بارىسىندا اسكەري قىزمەتشىلەرگە بارلىق جاعداي جاسالعان. ءتىپتى وقۋ-جاتتىعۋدان كەيىن تىنىستاۋ ءۇشىن ارنايى دەمالاتىن ورىندارمەن جابدىقتالعان تەحنيكالار دا بار. اسكەري كولىكتىڭ ءىشى كەڭ ءارى بارلىق زامان تالابىنا ساي جاساقتالعان.
– بۇل جيىننىڭ اسكەري قىزمەتشىلەردىڭ ءوزارا تاجىريبە الماسۋلارى ءۇشىن ماڭىزى زور. ءبىز وسىندا كەلىپ, وزىمىزگە كوپ پايدالى ءبىلىم الدىق. جاڭا ماشىقتاردى مەڭگەردىك. كۇندەلىكتى قىزمەتتە جۇرگەندە ونىڭ بارىنە كوڭىل بولۋگە مۇمكىندىك بولا بەرمەيدى. ال مىنا جەردە بار نازارىمىزدى وسىعان اۋدارامىز, – دەيدى 5518 اسكەري ءبولىمىنىڭ كومانديرى, پودپولكوۆنيك مەدەت ەرتايلاقوۆ.
