مينيسترلىكتىڭ شەكتى ۇپايلارى وزگەرگەن جوق. «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 بالل, «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» باعىتى ءۇشىن كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» سالالارى ءۇشىن كەمىندە 60 بالل, ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل, باسقا جوعارى وقۋ ورىندارىنا ءتۇسۋ ءۇشىن كەمىندە 50 بالل جيناۋ كەرەك. ءار ءپان بويىنشا شەكتى بالل – 5.
سونىمەن قاتار 2019 جىلدان باستاپ اكادەميالىق ەركىندىك شەڭبەرىندە جوعارى وقۋ ورىندارى اقىلى نەگىزدە دە, گرانت بويىنشا دا وقۋعا قابىلداۋ ءۇشىن ۇبت-نىڭ ءوز شەكتى بالدارىن بەلگىلەۋگە قۇقىلى. ۇلتتىق تەستىلەۋ ورتالىعى جىل سايىن تالاپكەرلەرگە ىڭعايلى بولۋ ماقساتىندا ەلىمىزدىڭ بارلىق جوعارى وقۋ ورنىنىڭ شەكتى بالدارىن ورتاق تىزىمدە ۇسىنادى. بۇل دەرەكتەر وقۋ ورىندارىنىڭ ۆەب-سايتتارىندا دا قولجەتىمدى.
– مىسالى, ءبىر تۇلەك «ماتەماتيكا» ءپانىنىڭ مۇعالىمى بولعىسى كەلەدى دەلىك. ول ۇبت-دا جيناعان 80 بالىمەن گرانت كونكۋرسىنا نەمەسە ەۋرازيا ۇلتتىق ۋنيۆەرسيتەتىنىڭ اقىلى بولىمىنە تاپسىرعىسى كەلەدى. وزدەرىڭىز بىلەتىندەي, «پەداگوگيكالىق عىلىمدارعا» شەكتى بالل كەمىندە – 75 بالل, ال ۇلتتىق جوعارى وقۋ ورىندارىنا – كەمىندە 65 بالل. تۇلەكتىڭ جيناعان بالى وقۋعا قابىلداۋ ءۇشىن جەتىپ تۇر. الايدا بۇل ۋنيۆەرسيتەتتەگى ونىڭ وقىعىسى كەلەتىن ماماندىققا شەكتى بالل 90-نان باستالادى. دەمەك, تۇلەككە 80-نەن تومەن شەكتى بالدارى بار باسقا ۋنيۆەرسيتەتتى ىزدەۋ كەرەك. سوندىقتان وقۋعا قۇجاتتاردى تاپسىرار الدىندا تالاپكەرلەر جوعارى وقۋ ورىندارىنىڭ شەكتى بالدارىن بىلۋگە ءتيىس, – دەيدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
2023-2024 وقۋ جىلىنا ارنالعان مەملەكەتتىك ءبىلىم بەرۋ تاپسىرىسى ورنالاستىرىلاتىن جوعارى وقۋ ورىندارىنىڭ ءتىزىمى جاقىن ۋاقىتتا جاريالانادى.
