جەرگىلىكتى توتەنشە جاعدايلار دەپارتامەنتى ۇسىنعان دەرەكتەرگە قاراعاندا, قازىرگى ۋاقىتتا تارتىلعان كۇشتەر مەن قۇرالدار ءتورت ۋچاسكەدە; پودنەبەسنوە, جەرنوۆكا اۋىلدارىندا, شۋلبينسك كەنتىندە, قاشتاق ورمانشىلىعىندا ءورت ءسوندىرۋ جۇمىستارى جالعاسىپ جاتىر. ءورتتى ءسوندىرۋ تومەنگى بولىكتە جانە اۆياتسيا ارقىلى جۇرگىزىلىپ جاتىر.
جەدەل شتابتىڭ مالىمەتىنشە, ەلدى مەكەندەرگە قاۋىپ ءتونىپ تۇرعان جوق.
ورتكە قارسى اراقاشىقتىق مەن مينەرالداندىرىلعان جولاقتاردى جاساۋ, ءورت وشاقتارى مەن ءورتتىڭ پەريمەترى بويىنشا جيەكتەرگە سۋ توگۋ, ءورتتىڭ جيەگىن توپىراقپەن جابۋ جانە تولتىرۋ جۇمىستارى جالعاسىپ جاتىر.
تاڭەرتەڭ جۇرگىزىلگەن اەروۆيزۋالدى بارلاۋ ناتيجەسىندە كۇشتەر مەن قۇرالدار ءورتتى جەدەل ءسوندىرۋ ءۇشىن قاشتاق ورمانشىلىعىنا جىبەرىلدى.
ءورت سوندىرۋشىلەردىڭ جەدەل قابىلداعان شارالارىنىڭ, ۇيلەسىمدى جۇمىسىنىڭ ارقاسىندا ءورتتىڭ تارالۋىنا جول بەرىلمەدى.
سونىمەن قاتار تارتىلعان تىكۇشاقتار ءورت اۋماعىن اەروۆيزۋالدى تەكسەرۋدى جانە ءورت وشاقتارىنا سۋ اعىزۋدى جۇزەگە اسىرىپ جاتىر. بۇگىن تاڭعى ساعات 6.00-دان بەرى بارلىعى 214 رەت كولەمى 600 توننا سۋ اعىزىلدى. ءورت باستالعالى بەرى بارلىعى 2 100-گە جۋىق رەت كولەمى 6 000 توننادان استام سۋ اعىزىلدى.
بۇدان باسقا, تجم اۋە كەمەلەرى كۇشتەردى جەدەل دەن قويۋ قاجەت ۋچاسكەلەرگە تاسىمالداۋدى جۇزەگە اسىرادى.
وسى ۋاقىتقا دەيىن جەدەل جەلى تەلەفونىنا 188 قوڭىراۋ كەلىپ ءتۇستى. تجم جانە تجد جەدەل جەلىسىنىڭ تەلەفوندارى: 8 7172 53 32 84, 8 7222 35 38 31.
«قازگيدرومەت» سينوپتيكتەرىنىڭ دەرەكتەرى بويىنشا 14 ماۋسىمعا اۋا-رايى بولجامى: جاۋىن-شاشىنسىز, سولتۇستىك, سولتۇستىك-شىعىس باعىتتاعى جەلدىڭ جىلدامدىعى 15-20 م/س, ەكپىنى 23-28 م/س بولادى, اۋا تەمپەراتۋراسى تۇندە +8+130س, كۇندىز +20+250س.
15 ماۋسىمدا جاۋىن-شاشىنسىز, سولتۇستىك باعىتتاعى جەلدىڭ جىلدامدىعى 9-14 م/س, ەكپىنى 17-22 م/س بولادى, تۇندە اۋا تەمپەراتۋراسى +5+100س, كۇندىز +23+280س.
