بۇل ماسەلەنى بەلگىلى جۋرناليست ارنۇر اسقار «Egemen Qazaqstan» گازەتىنە جازعان «استانا ەكونوميكاسى: تاق كەلگەن جەرگە باق كەلدى مە؟» ماقالاسىندا كوتەرگەن.
وتكەن جىلدىڭ قاڭتار-قاراشا ايلارىندا ەلوردانىڭ سىرتقى تاۋار اينالىمىنىڭ كولەمى 9 526 ملن اقش دوللارىنان اسىپ ءتۇستى. اتاپ ايتقاندا, ەكسپورت كولەمى 7,005.4 ملن دوللار بولسا, يمپورتتىڭ ۇلەسى 2,521,2 ميلليون دوللارعا تەڭ. ەكونوميستەردىڭ مالىمەتىنە سۇيەنسەك, قالا ءتورتىنشى ونەركاسىپتىك رەۆوليۋتسيا جاعدايىندا ەل ەكونوميكاسىن جاڭعىرتۋعا, قازاقستاننىڭ جاھاندىق ەكونوميكالىق كەڭىستىگىنە كىرىگۋىنە زور ىقپالىن تيگىزىپ وتىر.
قالا اكىمدىگى ۇسىنعان دەرەكتەرگە سۇيەنسەك, 25 جىل ىشىندە قالاعا قۇيىلعان ينۆەستيتسيا كولەمى 55 ەسە وسكەن. بىلتىرعى جىلدىڭ قورىتىندىسى بويىنشا نەگىزگى كاپيتالعا 1 ملرد 446 ملن تەڭگەدەن اسىپ ءتۇسىپتى.
ماقالا اۆتورىنىڭ ايتۋىنشا, شەتەلدىك كومپانيالاردىڭ قاتىسۋىمەن قالادا 7 ءىرى ينۆەستيتسيالىق جوبا جۇزەگە اسىرىلدى. ولاردىڭ قاتارىندا ترانسفورماتور شىعاراتىن فرانتسيالىق Alstom كومپانياسى, مەديتسينالىق جابدىقتار شىعاراتىن «Eira Med» كومپانياسى سىندى الپاۋىتتار بار. ء«ابۋ-دابي پلازا» كوپماقساتتى كەشەنىنىڭ قۇرىلىسىنا بىرىككەن اراب امىرلىكتەرىنىڭ, اۆتوكولىكتەرگە ارنالعان لوگيستيكالىق تەرمينال قۇرىلىسىنا جاپونيانىڭ كومپانياسى اتسالىسقانىن اتاپ وتكەن دۇرىس.
حالىقتىڭ سانى جىل سايىن ارتىپ كەلە جاتقاندىقتان, استانا - شەتەلدىك كاپيتال ءۇشىن تارتىمدى قالالاردىڭ ءبىرى. بۇل رەتتە عىلىمي الەۋەتتىڭ اۋقىمدى بولىگى ەلوردادا شوعىرلانعانىن ايتا كەتكەن ورىندى. بۇعان قالاداعى 15 جوعارى وقۋ ورنى مەن 33 كوللەدج دالەل بولا الادى. ورتا مەكتەپتەردىڭ سانى دا 160-تان اسادى جانە بۇل كورسەتكىش جىل ساناپ ارتىپ كەلەدى.
