2021 جىلى جوسپارلانعان ءىس-قيمىل ناتيجەسىندە «Jusan Bank» جانە تەلەكوممۋنيكاتسيا, اۋىل شارۋاشىلىعى جانە وزگە دە سالالاردىڭ بىرقاتار باسقا دا ءىرى اكتيۆتەرىن قامتيتىن «Jusan» توبى شەتەلدىك يۋريسديكتسياعا شىعارىلىپ, ۇكىمەتى باقىلاۋ قۇقىعىنان ايىرىلعان ەدى.
«ادىلەت مينيسترلىگى باسقا مەملەكەتتىك ورگاندارمەن بىرلەسىپ قابىلداعان ءىس-شارالار ناتيجەسىندە «Jusan» توبىن قازاقستاندىق يۋريسديكتسياعا قايتارۋعا قول جەتكىزدى. قاجەتتى قۇجاتتارعا قول قويىلدى. قازاقستان زاڭناماسىنا سايكەس توپ ۇكىمەتتىڭ جانە باسقا دا مەملەكەتتىك قۇرىلىمداردىڭ باقىلاۋىمەن جۇمىس ىستەيتىن بولادى» دەلىنگەن مينيسترلىك مالىمەتىندە.
ەندى «Jusan Bank» ەلىمىزدەگى ءبىلىم بەرۋ ۇيىمدارىن قارجىلاندىرۋدى جالعاستىرۋ بويىنشا مىندەتتەمەلەردى وزىنە الدى. بانك بۇرىن العان مەملەكەتتىك كومەك مەرزىمىنەن بۇرىن قايتارىلادى. بۇل مەملەكەت باسشىسىنىڭ شەتەلگە شىعارىلعان اكتيۆتەردى قايتارۋ تۋرالى تاپسىرمالارىن ىسكە اسىرۋ شەڭبەرىندە جاسالعان كەزەكتى قادام ەكەنىن ايتا كەتكەن ءجون.
بانك بۇل شەشىمگە قاتىستى پىكىر ءبىلدىرىپ, ونىڭ ءبىر شارتى وتاندىق ءبىلىم بەرۋ ۇيىمدارىن قارجىلاندىرۋدى جالعاستىرۋ ەكەنىن اتادى.
«بانك ءوز قىزمەتىن قازاقستان رەسپۋبليكاسىنىڭ زاڭناماسىنا سايكەس قاتاڭ تۇردە جۇزەگە اسىرۋدى جالعاستىرادى. ءبىز وتانداستارىمىزدىڭ قارجىلىق جانە قارجىلىق ەمەس قىزمەتتەر بويىنشا ارتىپ كەلە جاتقان سۇرانىستارىن قامتاماسىز ەتە الاتىن زاماناۋي تسيفرلىق بانكينگتى قۇرۋ بويىنشا قابىلدانعان ستراتەگيانى ۇستانامىز. وتكەن جىلدىڭ تابىستى ناتيجەلەرى جانە بانكتىڭ اعىمداعى قارجىلىق جاعدايى وزىنە العان بارلىق مىندەتتەمەلەردى ورىنداۋعا, سونىڭ ىشىندە مەملەكەت كومەگىنىڭ ءبىر بولىگىن مەرزىمىنەن بۇرىن قايتارۋعا مۇمكىندىك بەرەدى» دەلىنگەن بانك مالىمدەمەسىندە.
