ماسەلەن, 2018 جىلدىڭ 21 مامىرىندا بولعان ءورتتىڭ اۋماعى 300 گەكتاردان اسقان. سول ۋاقىتتا بۇل 15 جىل ىشىندە بولعان ەڭ ءىرى اپات رەتىندە تىركەلگەن. ءورت سالدارىنان 20 ادام كوز جۇمىپ, 2,3 مىڭعا جۋىق مال قىرىلدى. 300 ءورت ءسوندىرۋشى مەن ورمانشى جالىنمەن بىرنەشە كۇن بويى كۇرەسكەن. جانىپ تۇرعان ورمانعا 25 توننا سۋ توگىلدى.
كەيىن تەرگەۋ جۇمىستارى جۇرگىزىلىپ, بۇل قاساقانا ۇيىمداستىرىلعان ءورت ەكەنى انىقتالدى. ناتيجەسىندە مەملەكەتكە 78 ملن تەڭگە كولەمىندە شىعىن كەلگەن.
ەسكە سالا كەتسەك, 2020 جىلى «سەمەي ورمانى» رەزەرۆاتىندا ەكى ءىرى ءورت بولعان. ءساۋىر ايىنداعى ءورت نايزاعاي جارقىلىنان شىعىپ, ۇلكەن اۋماققا تاراپ كەتكەن. ورتەنگەن اۋماقتىڭ اۋدانى شامامەن 6 000 گەكتاردى قۇرادى. ال ودان كەيىنگى ءورت 4 000 گەكتارعا جۋىق اۋماققا تاراعان.
بيىلعى جىلدىڭ مامىر ايىندا اباي وبلىسىنىڭ ءۇش اۋدانىندا ءورت بولعان. رەسەي اۋماعىنان شىققان ورت «سەمەي ورمانى» تابيعي رەزەرۆاتىنا دا تاراپ كەتكەنى بەلگىلى بولدى. سول كەزدە ءورت اۋماعى 3 500 گەكتارعا تەڭ ەدى. بىراق ەكپىنى 6-10 م/س بولعان جەلدىڭ كەسىرىنەن ءورتتى وقشاۋلاۋ قيىنعا ءتۇستى.
8 ماۋسىمدا اباي وبلىسىندا ەل تاريحىنداعى ەڭ ءالپاۋىت ورت ورىن الدى. 9 ماۋسىمدا ونىڭ اۋماعى 60 مىڭ گەكتارعا دەيىن ۇلعايدى. ناتيجەسىندە ورمان شارۋاشىلىعىنىڭ 14 قىزمەتكەرى قايعىلى جاعدايدا كوز جۇمدى. وسىعان بايلانىستى سەمەي قالاسىندا توتەنشە جاعداي جاريالاندى.
مەملەكەت باسشىسى قاسىم-جومارت توقاەۆتىڭ جارلىعىمەن 12 ماۋسىم – جالپىۇلتتىق ازا تۇتۋ كۇنى بولىپ جاريالاندى.
جىل باسىنان بەرى ەل اۋماعىندا 146 ورمان ءورتى تىركەلگەن. قىزىل جالىن 24 مىڭعا جۋىق گەكتاردى شارپىعان. جالپى شىعىن 66 ميلليون تەڭگەنى قۇرايدى.
ال وتكەن جىلى قازاقستاندا 801 ورمان ءورتى تىركەلگەن. سالدارىنان ورمان قورىنىڭ 104 مىڭ گەكتارى جويىلدى. مۇنداعى شىعىن 20 ميلليارد تەڭگەدەن استى. ايتا كەتسەك, ەڭ اۋقىمدى ءورت قوستاناي وبلىسىنىڭ اۋليەكول اۋدانىندا بولعان. باسامان جانە سەميوزەرنىي ورمان شارۋاشىلىعىندا 91 تۇرعىن ءۇي ورتەنىپ, ءبىر ادام قايتىس بولعان. شىعىن كولەمى – 18 ميلليارد تەڭگە. ءورتتىڭ جالپى اۋماعى 43 مىڭ گەكتاردان اسقان. بۇل ورمان شارۋاشىعىنىڭ ۇشتەن ءبىر بولىگى جانىپ كەتكەنىن بىلدىرەدى.
2021 جىلعى كورسەتكىشكە توقتالاتىن بولساق, 712 ورمان ءورتى تىركەلگەن. 148 مىڭ گەكتار القاپ تۇتاستاي جانىپ كەتكەن. مەملەكەتكە 4,6 ميلليارد تەڭگە كولەمىندە شىعىن كەلگەن. شىعىس قازاقستان وبلىسى ريددەر قالاسى ماڭىنداعى ورمان ورتىنەن 35 ءۇي مەن 9 شارۋاشىلىق قۇرىلىسى جويىلعان ەدى. قىزىل جالىن شارپىعان اۋماق 310 مىڭ گەكتاردى قۇرادى.
