11 ماۋسىم كۇنى سادىر جاپاروۆ قاسىم-جومارت توقاەۆقا كوڭىل ايتۋ جەدەلحاتىن جولدادى.
«قۇرمەتتى قاسىم-جومارت كەمەل ۇلى, بۇكىل قىرعىز حالقىنىڭ اتىنان جانە جەكە ءوزىمنىڭ اتىمنان قازاقستاننىڭ شىعىسىندا بولعان ورمان ءورتى سالدارىنان قازا تاپقان قىزمەتكەرلەردىڭ جاقىندارىنىڭ قايعىسىنا ورتاقتاسىپ كوڭىل ايتامىن. قازا تاپقان قازاقستاندىقتاردىڭ تۋعان-تۋىستارى مەن جاقىندارىنا شىن جۇرەكتەن قولداۋ ءبىلدىرىپ, زارداپ شەككەندەردىڭ بارلىعىنا تەزىرەك ساۋىعىپ كەتۋىن تىلەيمىز», دەلىنگەن جەدەلحاتتا.
ايتا كەتەيىك, بۇگىن قازاقستاندا جالپىۇلتتىق ازا تۇتۋ كۇنى بولىپ جاريالاندى. ءتيىستى جارلىققا قاسىم-جومارت توقاەۆ ءبىر كۇن بۇرىن, 11 ماۋسىمدا قول قويدى.
«اباي اۋدانىنداعى ورمان ءورتى سالدارىنان ادامداردىڭ قازا بولۋىنا بايلانىستى 2023 جىلعى 12 ماۋسىمدا قازاقستان رەسپۋبليكاسىندا جالپىۇلتتىق ازا تۇتۋ كۇنى جاريالانسىن», دەلىنگەن قۇجات ماتىنىندە.
