ەسىلمەن كەمەلەر ءجۇزىپ بارادى

ارقا توسىندەگى ارۋ استانانىڭ ءسانى مەن ساۋلەتى عانا ەمەس, كۇننەن كۇنگە ينفراقۇرىلىمى دا دامىپ, شاھاردىڭ وركەنيەت بيىگىنە ورلەپ بارا جاتقاندىعىن پاش ەتەدى.  جاقىندا ەسىل وزەنىندە سۋ-كولىك جولىنىڭ اشىلۋ سالتاناتى بولىپ, 65 ادامعا ارنالعان العاشقى كەمە ساياحاتتىق ساپارعا شىقتى. ەسىل وزەنىنىڭ بويىمەن قايىق جۇرگىزىپ, جولاۋشىلار ساياحاتىن ۇيىمداستىرۋ يدەياسىن العاش رەت ەلباسى ايتقان بولاتىن. مەم­لەكەت باسشىسىنىڭ تاپسىر­ما­سى­مەن قالا اكىمدىگى 2008 جىلى جولاۋشىلار كولىگى جانە اۆتو­موبيل جولدارىنا قاراستى “ەسىل-استانا” مەملە­كەتتىك مەكەمەسىن قۇردى. وتكەن جىلدان باستاپ بۇل مەكەمە ەسىل وزەنىنىڭ بويىمەن قايىقپەن جولاۋشىلار تاسىمالداۋ ءىسىن باستاپ كەتتى. “ەسىل-استانا” مەملەكەتتىك مەكەمەسىنىڭ ديرەكتورى دارحان دوسماعامبەتوۆتىڭ ايتۋىنشا, وتكەن جىلى ەسىل بويىمەن قايىق جۇرگىزۋدىڭ العاشقى ماۋسىمى ءساتتى ءوتتى. جىل قورىتىندىسىندا جازعى دەمالىس كەزىندە ەسىل وزەنى ارقىلى قايىقتارمەن ەلوردا ساۋلەتىن تاماشالاۋعا 16 مىڭنان استام ادام قامتىلىپتى. بۇگىندە اتالمىش مەكەمەدە 5 قايىق بار. ونىڭ ۇشەۋى جولاۋشىلار تاسىمالداۋعا, قالعان ەكەۋى سۋدان قۇتقارۋ قىزمەتىن اتقارادى. بيىل ەسىلدە قايىقپەن جولاۋشىلار تاسىمالداۋ جولى م-3 كو­پىرىنەن باستاپ تەلمان كەنتىنە دەيىن ۇزار­تىلعان. جالپى, جولاۋ­شى­لاردىڭ وزەن بويىمەن ساياحات جاساۋ ساپارىنىڭ ۇزىندىعى 12 شاقىرىمدى قۇرايدى. “ەسىل-استانا” مەملەكەتتىك مەكەمەسى الداعى ۋاقىتتا گەرمانيا مەن رەس­ەيدەن تاعى دا ليۋكس-كلاستى ەكى شاعىن كەمە ساتىپ الۋدى جوس­پارلاپ وتىر. قالا كۇنى مەرەكەسى قار­سا­ڭىندا “ەسىل-استانا” مەم­لەكەتتىك مەكەمەسى قالا تۇرعىندارى مەن قوناقتارىن باس قالامىزدىڭ ساۋلەتىن جانە ماڭايىنداعى كور­نەكتى ورىنداردى تاماشالاۋدى كەڭىنەن ۇيىمداستىرۋدى قولعا الدى. سۋ بويىمەن ساياحات جاس­اي­تىن قايىقتان استانالىق سايا­باقتان شۇبار كەنتى ارقىلى سامال شاعىن اۋدانىنداعى كەنەسارى ەسكەرتكىشىنىڭ تۇسىمەن, “رەديسون” قوناق ءۇيى, اقوردا رەزيدەنتسياسى جانىمەن تەلمان كەنتىنە دەيىن ساپار شەگەدى. قالا تۇرعىندارى مەن باس قالامىزعا كەلگەن قوناقتار سۋ جولى ارقىلى ساياحات جاساۋدىڭ ۇمىتىلماس اسەرىنە ءدان ريزا. جىلقىباي جاعىپار ۇلى.