مەكتەپتە 8 سىنىپتا وقىپ جۇرگەندە ەلوردادا وتەتىن «جاس استانا جاس جەتكىنشەكتەر كوزىمەن» حالىقارالىق فەستيۆالىنە شاقىرۋ الىپ, توبەمىز كوككە جەتەردەي قۋاندىق. اۋىلدان ۇزاپ شىعىپ كورمەگەن ءبىزدىڭ بالا قيالىمىز جاڭا استاناعا ويشا ءجۇز بارىپ, ءجۇز شارلاپ قايتاتىن. ءسويتىپ, ارمان بولعان استاناعا عاسىرلار توعىسىندا, 2000 جىلعى 10 ماۋسىمدا كەلۋ بۇيىردى.
ەلوردادا مىڭجىلدىقتار مەرەكەسى «ميللەنيۋم-پاتي-استانا» سالتاناتتى شاراسى دۇركىرەپ ءوتىپ جاتقان كەز ەدى. ەركە ەسىلدىڭ جاعاسىندا, كورگەن جۇرت اۋزىن اشىپ, كوزىن جۇمىپ تامسانعان عالامات كونتسەرت ءوتتى. سول كەزدەگى (2000 جىل) قوعامدىق كەلىسىم, اقپارات جانە مادەنيەت ءمينيسترى التىنبەك سارسەنباي ۇلىمەن كەزدەسىپ, ول كىسىنىڭ قولىنان العىس حات العانىمىز بالا كەزىمىزدەگى ەستەن كەتپەس, عاجاپ وقيعا بولعانى انىق.
وسى ساپار تۋرالى كۇندەلىگىمە بىلاي دەپ جازىپپىن: «استاناداي قالانى, التىنبەكتەي اعانى كورگەن بىزدە نە ارمان بار؟ قازاقتىڭ جەرىندە, ەلوردا تورىندە تۇرىپ, بويىمىزدى قۋانىش كەرنەدى. ءبىر ارمانىم – جاڭا استانانى كورۋ ەدى, ورىندالدى, ەندىگى تىلەگىم – كەلەشەكتە وسى قالادا تۇرىپ, قىزمەت ىستەپ, ۇرپاق ءوربىتىپ, تامىرىمدى تەرەڭگە جايسام دەيمىن. يا, جاراتقان, ءوزىڭ جار بولىپ, تىلەگىمىزدى قابىل ەت!»..
اراعا ون جىل سالىپ, استاناعا وتباسىمىزبەن كوشىپ كەلدىك. قالامى جۇيرىك كىل مىقتى ءجۋرناليستىڭ باسى قۇرالىپ, «حالىق ءسوزى» اتتى رەسپۋبليكالىق گازەتتى جارىققا شىعاردىق. باسىلىم بەتىندە ەلوردا مەن ونىڭ تۇرعىندارىنىڭ قوردالانعان كوپ ماسەلەسىنە قوزعاۋ سالىپ, شەشىمىن تابۋىنا گازەت ارقىلى ىقپال ەتكەنىمىز راس. اسىرەسە استانانىڭ قازاقىلانۋىنا قازاق ءباسپاسوزىنىڭ سىڭىرگەن ەڭبەگى كوپ.
سول كەزدە ەلوردادا ءاربىر جاڭا تۋعان ءسابيدىڭ قۇرمەتىنە ءبىر ءتۇپ اعاش ەگۋ داستۇرگە اينالعان ەدى. شۇكىر, بۇل كۇندە ەككەن اعاشىمىز جايقالىپ ءوسىپ, توككەن تەرىمىز تەككە كەتپەدى. قازاق مۇندايدا «ماڭدايىڭنىڭ باعى بەس ەلى ەكەن» دەپ جاتۋشى ەدى, بەس بىردەي ۇرپاق ءسۇيىپ, كوپ بالالى وتباسى اتاندىق. اتا-انامىز دا ەلورداعا قونىس اۋدارىپ, ورتامىزدى تولتىرىپ, وتباسىمىزدى بايىتىپ وتىر. تاۋبە!
وسىلايشا بالا كەزگى ارمانىمىز اقيقاتقا اينالىپ, ارقا توسىندە ءورىسىمىز كەڭەيىپ, ىرىسىمىز مولايىپ, تامىرىمىزدى تەرەڭگە جايىپ كەلەمىز.
استانامىزدىڭ شيرەك عاسىرلىق تويى قۇتتى بولسىن!
