جالپى, حالىقارالىق دزيۋدو فەدەراتسياسى مۇنداي ماڭىزدى تۋرنيرلەردى وتكىزۋدى كەز كەلگەن ەلگە سەنىپ تاپسىرا بەرمەيدى. ول ءۇشىن جارىستى وتكىزۋگە ءۇمىتتى ەلدىڭ وكىلدەرى الەمدىك دودالاردا ءوز مىقتىلىعىمەن دارالانىپ, وليمپيا ويىندارى سەكىلدى ابىرويلى جارىستاردا جۇلدە الۋعا ءتيىس. سونىمەن قاتار ازيا جانە الەم چەمپيوناتتارىن وتكىزۋدە تاجىريبەسى بولۋى دا ماڭىزدى. ال بۇل تالاپتاردىڭ بارلىعىن ەلىمىز الدەقاشان ورىنداپ قويعانى بەلگىلى. جەرلەستەرىمىز جىل سايىن بولماسا دا, ءار جىلدارى الەم چەمپيوناتتارىندا جۇلدەگەرلەر قاتارىنان كورىنىپ, ازيا بىرىنشىلىكتەرىندە توپ جارىپ ءجۇر. سونداي-اق ءبىر جىل بەدەرىندە ۇيىمداستىرىلاتىن بىرنەشە «Grand Slam», «Grand Prix» سياقتى سەريالى سايىستاردا دا جۇلدەنىڭ الدىن بەرمەي جۇرگەنىن جانكۇيەرلەر جاقسى بىلەدى.
حالىقارالىق جارىس ۇيىمداستىرۋدا ەلىمىزدىڭ مول تاجىريبەسى بار ەكەنى بارشاعا بەلگىلى. 2015 جىلى استانادا العاش رەت دزيۋدودان الەم چەمپيوناتى ۇيىمداستىرىلىپ, سالا ماماندارىنىڭ وڭ باعاسىن العان. بىلتىر تامىز ايىندا سارى قۇرلىق بالۋاندارى ەلوردادا باس قوسىپ, ءتۇرلى-ءتۇستى جۇلدەلەردى ساراپقا سالعانىن ءالى ەشكىم ۇمىتا قويعان جوق.
ەلىمىزدە جاسالىپ جاتقان ەلەۋلى ىستەردەن كەيىن جىلدىڭ باسىندا قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسى (IJF) الەمدىك «Grand Slam» تۋرنيرلەرىن قازاقستاندا دا وتكىزۋ تۋرالى ءتورت جىلدىق كەلىسىمشارتقا قول قويعان-دى.
ءىس-شارا كەزىندە حالىقارالىق دزيۋدو فەدەراتسياسىنىڭ (IJF) پرەزيدەنتى ماريۋس ۆيزەر IJF ءۇشىن ءتۋرنيردى وتكىزۋ قۇقىعىن الەمدىك جارىستاردا جىل سايىن توپ جارىپ, ۇزدىك ناتيجە كورسەتىپ جۇرگەن قازاقستان سياقتى مەملەكەتكە بەرۋ ۇلكەن مارتەبە ەكەنىن جەتكىزگەن بولاتىن.
«كەيىنگى بىرنەشە جىلدا قازاقستاندا دزيۋدو سپورتى قارقىندى دامىپ كەلەدى. «ۇلكەن دۋلىعا», گران-پري جارىستارى, الەم چەمپيوناتتارى مەن وليمپيا ويىندارىندا قازاق بالۋاندارى اۋىز تولتىرىپ ايتارلىقتاي ناتيجەگە قول جەتكىزىپ جۇرگەنىن جاقسى بىلەمىز. سوندىقتان «Grand Slam» تۋرنيرلەرىنىڭ ءبىر كەزەڭىن قازاقستاندا وتكىزەمىز دەپ شەشتىك. بۇل تەك ءبىر جىلعا عانا ەمەس, ءتورت جىلعا جوسپارلانعان كەشەندى تۋرنير ەكەنىن, وليمپيا ويىندارىنا رەيتينگتىك ۇپاي بەرىلەتىن ماڭىزدى جارىستىڭ ءبىرى ەكەنىن ايتا كەتكەن ءجون», دەگەن ەدى حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر.
ەلىمىزدە تۇڭعىش رەت جالاۋى جەلبىرەيتىن بايراقتى جارىسقا بۇگىنگە دەيىن الەمنىڭ 44 ەلىنىڭ 310 بالۋانى قاتىساتىندارىن مالىمدەدى. ولاردىڭ قاتارىندا وليمپيا ويىندارى, الەم, ەۋروپا جانە ازيا چەمپيوناتتارىنىڭ جەڭىمپازدارى مەن جۇلدەگەرلەرى دە بار. بۇل سىندا ەل نامىسىن 51 سپورتشى (ەرلەر قۇراماسىنان – 28, ايەلدەر قۇراماسىنان 23 بالۋان) قورعايدى. حالىقارالىق دزيۋدو فەدەراتسياسىنىڭ ەرەجەسى بويىنشا جارىستى ۇيىمداستىرۋشى مەملەكەت ءار سالماقتا ءتورت بالۋانعا دەيىن قوسا الادى.
سونداي-اق قازاقستان استاناسىنا ەڭ كوپ باۋلان اكەلەتىندەردىڭ قاتارىندا فرانتسيا (25), وزبەكستان (22), ازەربايجان (16), يسپانيا سەكىلدى مەملەكەتتەر بار. ال استانادا بەلدەسەتىن ەڭ داڭقتى بالۋانداردان كىمدەر بار دەگەن سۇراققا كەلەر بولساق, 2022 جىلعى جاستار اراسىنداعى الەم چەمپيونى, ەرەسەكتەر اراسىنداعى الەم بىرىنشىلىگىنىڭ قولا جۇلدەگەرى, «Grand Slam» جارىستارىنىڭ جەڭىمپازى 21 جاستاعى يتاليالىق اسسۋنتا سكۋتتو (48 كگ), توكيو وليمپياداسىنىڭ قولا جۇلدەگەرى نيدەرلاندتىق ساننە ۆان دەيكە (70 كگ), 2018 جىلعى الەم چەمپيوناتىنىڭ كۇمىس جۇلدەگەرى ازەربايجاندىق ۋشانگي كوكاۋري جانە تاعى باسقالاردى ايتۋعا بولادى.
بۇل الەمدىك دودا بارلىق دزيۋدوشى ءۇشىن 2024 جىلى پاريجدە وتەتىن جازعى وليمپيا ويىندارىنا جولداما الۋعا جاقسى مۇمكىندىك ەكەنىن جوعارىدا ايتتىق. سونىمەن قاتار «Qazaqstan barysy Grand Slam» ءتۋرنيرى اياقتالعاننان كەيىن ەلىمىزدە دزيۋدودان حالىقارالىق وقۋ-جاتتىعۋ لاگەردە وتكىزىلەدى.
«Grand Slam» («ۇلكەن دۋلىعا») – حالىقارالىق جارىس كۇنتىزبەسىنە سايكەس «IJF World Tour» اياسىندا وتكىزىلەتىن الەمدىك جارىستار سەرياسى ساناتىنا ەنەدى. IJF ەرەجەسى بويىنشا, جارىس جەڭىمپازى مەن جۇلدەگەرلەرىنىڭ الەم جانە وليمپيادا رەيتينگتەرىنە ۇپاي قوسىلادى. اتاپ ايتقاندا, 1-ورىنعا – 1000, 2-ورىنعا – 700, ال 3-ورىنعا 500 ۇپايدان بەرىلەدى.
ايتپاقشى, «Qazaqstan barysy Grand Slam» جارىسىنا كىرۋ تەگىن ەكەنىن ايتا كەتەيىك.
