ۋنيۆەرسيادانىڭ سالتاناتتى اشىلۋ راسىمىندە عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ مينيستر ساياسات نۇربەكتىڭ ارنايى قۇتتىقتاۋىن وقىپ بەردى.
ء«بىلىمدى, تاربيەلى, دەنى ساۋ ۇرپاق – ەلىمىزدىڭ بايلىعى! وسكەلەڭ ۇرپاقتى پاتريوتتىق رۋحتا تاربيەلەۋگە سپورتتىق جارىستاردىڭ ىقپالى زور دەپ ەسەپتەيمىن جانە وسى باعىتتا جۇمىس ىستەپ جۇرگەن جوعارى وقۋ ورىندارىنا, وقىتۋشىلارعا العىس ايتامىن. الداعى ۋاقىتتا بارشاڭىزعا سپورتتا عانا ەمەس, وقۋدا دا ەلىمىزدىڭ يگىلىگىنە باعىتتالعان تابىستار مەن جوعارى جەتىستىكتەر, ۋنيۆەرسيادا سايىستارىنا ءادىل تورەشىلىك, سپورتشىلارعا جەڭىس, قاتىسۋشىلار مەن ۇيىمداستىرۋشىلارعا ساتتىلىك تىلەيمىن» دەلىنگەن قۇتتىقتاۋدا.
قۋانىش اسىلحان ۇلى توعىزقۇمالاق, فۋتزال, شاحماتتان ۋنيۆەرسيادا جارىستارىن تاماشالادى. سونداي-اق ءباسپاسوز ءماسليحاتىنا قاتىسىپ, بۇل دودا تەك ستۋدەنتتەر ءۇشىن عانا ەمەس, بۇكىلحالىقتىق ءمانى زور ءىس-شارا ەكەنىن ايتتى. ۇلت دەنساۋلىعىن نىعايتۋ جانە بۇقارالىق سپورتتى دامىتۋ ماسەلەلەرى مەملەكەتىمىزدىڭ الدىندا تۇرعان ماڭىزدى مىندەتتەردىڭ ءبىرى ەكەنىن جەتكىزدى.
قازىرگى تاڭدا جارىس كەستەسى بويىنشا ۇستەل تەننيسى, ءجۇزۋ جانە جەڭىل اتلەتيكادان جەڭىمپازدار انىقتالىپ قويدى. مەدال كورسەتكىشى بويىنشا جالپىكوماندالىق ەسەپتە م.قوزىباەۆ اتىنداعى سولتۇستىك قازاقستان ۋنيۆەرسيتەتى, ءال-فارابي اتىنداعى قازاق ۇلتتىق ۋنيۆەرسيتەتى, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى كوش باستاپ تۇر.
جامبىل وڭىرىندەگى بۇقارالىق سپورتتى دامىتۋ ماقساتىندا كەلەسى, ياعني 2025 جىلعى ءحىىى جازعى ۋنيۆەرسيادانى وتكىزۋ كەزەگى م.ح.دۋلاتي اتىنداعى تاراز وڭىرلىك ۋنيۆەرسيتەتىنە بەرىلدى.
ايتا كەتەيىك, 28 شىلدە – 8 تامىزدا دۇنيەجۇزىلىك جازعى ۋنيۆەرسيادا چەندۋ قالاسىندا وتەدى, سونىمەن قاتار بيىل ەلىمىزدە تۇركى ستۋدەنتتەر ويىنى وتەدى دەپ جوسپارلانىپ وتىر.
