ساياباقتىڭ اۋماعى كەلۋشىلەردىڭ ساناتىنا بايلانىستى ءارتۇرلى ايماققا بولىنگەن. اتاپ ايتساق, سكەيت الاڭىنان باسقا ۆەلو جانە جاياۋ جۇرگىنشىلەر جولىن, امفيتەاتر, ساحنا-پوديۋمدى كورۋگە بولادى. سونداي-اق دەمالۋعا جانە سەرۋەندەۋگە, سپورتپەن شۇعىلدانۋعا ارنالعان الاڭدار مەن بالالار ويىن كەشەندەرى قاراستىرىلعان.
– بۇل جاي عانا سكەيت تەبۋگە ارنالعان الاڭ ەمەس, بۇل ءارتۇرلى جاستاعى تۇرعىننىڭ قىزىعۋشىلىعىن ەسكەرە وتىرىپ جاسالعان تولىققاندى كەشەن. مۇندا ويىن الاڭدارى, ۇلكەن كىسىلەردىڭ سەرۋەندەۋىنە جانە دەمالۋعا لايىقتى ورىندار, سپورتتىق ءىس-شارالارعا ارنالعان ۆوركاۋت بار, – دەدى وبلىس اكىمىنىڭ ورىنباسارى رۋستام يساتاەۆ.
سالتاناتتى ءىس-شارا بارىسىندا قوناەۆ قالاسىنىڭ اكىمى نۇرلان قۇماتاەۆ تا شاھاردىڭ دامۋىنا قاتىستى پىكىرىن ءبىلدىردى.
– قالامىزدا جاسوسپىرىمدەر سپورتپەن شۇعىلدانىپ قانا قويماي, سكەيتپەن كاسىبي تۇردە اينالىسقىسى كەلەدى. ەگەر بۇرىن ولار ۋاقىتىن ءتيىمدى وتكىزۋ ءۇشىن الماتىعا بارسا, ەندى ءبارى بىزگە كەلەدى دەپ ويلايمىن. سونىمەن قاتار ءبىز «جەڭىس» ساياباعىن قايتا قۇرامىز. ءبىر سوزبەن ايتقاندا, الداعى ۋاقىتتا قالامىزدا تۇبەگەيلى وزگەرىستەر بولادى, – دەدى شاھار باسشىسى.
بۇعان قوسا مەرەكە كۇنى 1,5 جاستان 18 جاسقا دەيىنگى مۇمكىندىگى شەكتەۋلى بالالاردى بەيىمدەۋ, تۇزەتۋ جانە وڭالتۋ ءۇشىن كۇندىز ۋاقىت وتكىزۋ ورتالىعىنىڭ اشىلۋى دا قالا تۇرعىندارىن قۋانتتى. مۇندا تىرەك-قيمىل اپپاراتى جانە پسيحو-نەۆرولوگيالىق اۋرۋلارى بار بالالارعا دارىگەرلەردىڭ نۇسقاۋى (جەكە وڭالتۋ جوسپارى) بويىنشا كومەك كورسەتىلەدى. ولاردىڭ تاسىمالدانۋى مەن 4 رەت تاماقتانۋىن قامتاماسىز ەتە وتىرىپ, تەگىن قىزمەت الۋىنا مۇمكىندىك جاسالعان. مۇندا دەفەكتولوگتەر, لوگوپەدتەر, بالالار پسيحولوگتەرى, ماسساج تەراپەۆتتەرى جۇمىس ىستەيدى, مۋزىكالىق ساباقتار مەن كاسىپتىك تەراپيا, فيزيوتەراپيا قاراستىرىلعان. سونىمەن قاتار بالالار مامانداردىڭ باقىلاۋىندا بولادى.
قاپشاعاي سۋ قويماسىنداعى شومىلۋ ماۋسىمى دا ادەتتەگىدەي جازدىڭ العاشقى كۇنى اشىلعانىن ەسكە سالا كەتەيىك.
الماتى وبلىسى
