12-تۋردىڭ شىمىلدىعىن «قايرات» پەن «وقجەتپەس» كلۋبتارى اشىپ بەردى. وتكەن تۋردا چەمپيونات اۋتسايدەرى «ماقتاارالدان» سىرت الاڭدا 3:1 ەسەبىمەن جەڭىلگەن «قايرات» بۇل تۋردا كوكشەتاۋدىڭ «وقجەتپەسىن» قابىلداپ, 2:1 ەسەبىمەن جەڭىسكە جەتتى. الماتىنىڭ «ورتالىق» ستاديوندا وتكەن باسەكەنىڭ تاعدىرىن «قايراتتىڭ» برازيليالىق شابۋىلشىسى جواو پاۋلونىڭ جەكە شەبەرلىگى شەشىپ كەتتى. ويىننىڭ سەگىزىنشى مينۋتىندا ول پەنالتيدەن گول سوعىپ, كومانداسىن العا شىعارسا, 49-مينۋتتا ەسەپتى ەسەلەي ءتۇستى. ال ارادا 30 مينۋت وتكەندە قوناقتار ساپىنان رۋسلان بولوۆ 11 مەترلىك ايىپ دوبىن ءساتتى ورىنداپ, ەسەپ ايىرماسىن قىسقارتتى. قاتارىنان ەكى ويىندا جەڭىلىپ, ءۇشىنشى ماتچتا ءۇش ۇپايدى ەنشىلەگەن «قايرات» تۋرنير كەستەسىندە بەسىنشى ورنىن ساقتاپ قالدى.
بىلتىر ەل چەمپيونى اتانعان «استانانىڭ» بيىلعى قارقىنى ازىرگە كوڭىل قۋانتارلىقتاي ەمەس. كەلەسى ايدا چەمپيوندار ليگاسىنىڭ ىرىكتەۋ كەزەڭىنە قاتىساتىن كوماندا كەيىنگى بەس تۋر بويى قارسىلاستارىن تەك ءبىر دوپ ايىرماسىمەن عانا جەڭۋگە شامالارى جەتىپ ءجۇر. بۇل تۋردا ولار پاۆلوداردىڭ «اقسۋىنان» 1:0 ەسەبىمەن باسىم ءتۇستى. ويىنداعى جالعىز گولدى – مارين توماسوۆ سوقتى.
تۋرنير كەستەسىندە «استانانى» وكشەلەپ كەلە جاتقان «اقتوبە» كلۋبى 12-تۋردا جانكۇيەرلەرىنە قوس قۋانىش سىيلادى. ءبىرىنشىسى, جوندەۋ جۇمىستارىنا بايلانىستى ءبىراز ۋاقىتقا جابىلعان قوبىلاندى باتىر اتىنداعى ورتالىق ستاديوندا «اقتوبە» فۋتبولشىلارى 2023 جىلعى العاشقى ويىنىن وتكىزسە, ەكىنشىسى – سول ماتچتا اندرەي كارپوۆيچ شاكىرتتەرى قاراعاندىدان كەلگەن «شاحتەر» كلۋبىن 2:0 ەسەبىمەن تىزە بۇكتىردى. ويىننىڭ التىنشى مينۋتىندا ارمان كەڭەسوۆ «اقتوبەنى» ەسەپتە العا شىعارسا, 71-مينۋتتتا لۋكا گادراني جانكۇيەرلەردى شاتتىققا بولەدى. بۇل جەڭىستەن كەيىن «اقتوبە» تۋرنير كەستەسىندە «قىزىلجاردى» ءبىر ساتى تومەن ىعىستىرىپ, ءۇشىنشى ورىنعا كوتەرىلدى.
كەيىنگى بەس تۋردا بىردە-ءبىر ويىندا ۇپايدان شاشاۋ شىعارماعان شىمكەنتتىڭ «ورداباسى» كلۋبى بۇل تۋردا دا ءۇش ۇپايىن ەشكىمگە بەرگەن جوق. اتىراۋدىڭ «اتىراۋ» كلۋبىن قابىلداعان جەرگىلىكتى ۇجىم 2:1 ەسەبىمەن جەڭىسكە جەتتى. ءبىرىنشى تايمدا بوبۋر ابدۋحوليكوۆ (25-مينۋت) پەن سەرگەي مالىيدىڭ (30) سوققان گولدارى «ورداباسىعا» جەڭىس سىيلادى. قوناقتار ساپىنان ەكىنشى تايمدا نگۋنگۋسي ەففيونگ مەرگەندىك تانىتتى.
ال تۋردىڭ ورتالىق ويىنى سانالعان «توبىل» مەن «قىزىلجار» اراسىنداعى ماتچتا الاڭ يەلەرى باسىمدىق تانىتتى. قوستانايدا وتكەن تارتىستى ماتچتىڭ تاعدىرىن ويىننىڭ 75-مينۋتىندا «توبىلدىڭ» شابۋىلشىسى سەرج دەبلە شەشتى – 1:0. ماڭىزدى ءۇش ۇپايىن قورجىنعا سالعان قوستانايلىق ۇجىم 20 ۇپايمەن التىنشى ورىنعا كوتەرىلىپ الدى.
12-تۋردا كوشباسشىلار سوقپاعان گولدى تۋرنير كەستەسىنىڭ ەكىنشى جارتىسىندا كەلە جاتقان كوماندالار سوعىپ, جانكۇيەرلەردى ءبىر سەرپىلتىپ تاستادى. تالدىقورعاندا وتكەن «جەتىسۋ» مەن «كاسپي» اراسىنداعى ماتچتا جانكۇيەرلەر بەس گولدىڭ كۋاسى بولدى. ءبىرىنشى تايمدا 2:1 ەسەبىمەن الدا تۇرعان اقتاۋلىق ۇجىم ەكىنشى تايمدا قاقپاسىنا ەكى گول وتكىزىپ الىپ, قولدا تۇرعان ءۇش ۇپايىنان ايىرىلىپ قالدى. ويىنداعى جەڭىس گولىن ەكىنشى تايمدا «جەتىسۋدىڭ» سەربيالىق شابۋىلشىسى يوۆان ستويانوۆيچ سوقتى – 3:2.
سونداي-اق تۋرنير كەستەسىندە سوڭعى ورىندا كەلە جاتقان «ماقتاارال» قىزىلورداعا قوناققا بارىپ, جەرگىلىكتى «قايسار» كلۋبىن 10 ويىنشىمەن ءجۇرىپ 2:0 ەسەبىمەن تىزە بۇكتىردى. گولدىڭ اۆتورلارى – رامازان كارىموۆ (42-مينۋت) پەن سەكۋ دۋمبيا (97). وسىلايشا, باس باپكەرلىك قىزمەتكە قايرات نۇرداۋلەتوۆ كەلگەلى بەرى قاتارىنان ەكىنشى ويىندا جەڭىسكە جەتكەن «ماقتاارال» 9 ۇپايمەن تۋرنير كەستەسىندە 11-ورىنعا كوتەرىلدى.
ەندى ەل بىرىنشىلىگىنىڭ ويىندارى ەۋروپا چەمپيوناتىنىڭ ىرىكتەۋ ماتچتارىنا بايلانىستى ۋاقىتشا توقتاتىلىپ, 24 ماۋسىمدا قايتا جالعاسادى.
