دالىرەك ايتساق, وسى جىلدىڭ 1 شىلدەسىنەن باستاپ بىرىڭعاي جيناقتاۋشى زەينەتاقى قورىندا (بجزق) ەڭبەك سىڭىرگەن جىلدارى بويىنشا جيناعى بار زەينەتكەرلەرگە تۇرعىن ءۇي جاعدايىن جاقسارتۋعا نەمەسە ەمدەلۋگە زەينەتاقى جيناعىنىڭ بارلىق سوماسىن پايدالانۋعا قۇقىق بەرىلەدى. بۇل باستاما بيىل قابىلدانعان الەۋمەتتىك كودەكس اياسىندا جۇزەگە اسىرىلادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, شىلدەدەن باستاپ زەينەتكەرلەر www.enpf-otbasy.kz ينتەرنەت-پلاتفورماسى ارقىلى بجزق-دا جينالعان قاراجاتىن تۇرعىن ءۇي جاعدايلارىن جاقسارتۋعا پايدالانۋ ءۇشىن بىرجولعى زەينەتاقى تولەمدەرىن الۋعا «وتباسى بانك» تۇرعىن ءۇي قۇرىلىس جيناق بانكى» اق نەمەسە ەكىنشى دەڭگەيدەگى بانكتەرگە جۇگىنە الادى. ال ەمدەلۋ ماقساتىندا بىرجولعى زەينەتاقى تولەمدەرىن پايدالانۋ ءۇشىن جوعارىدا كورسەتىلگەن پلاتفورما ارقىلى «وتباسى بانكىنە» ءوتىنىش بەرۋ قاجەت.
بۇعان دەيىن 2021 جىلدىڭ 1 قاڭتارىنان باستاپ بجزق ازاماتتارعا زەينەتاقى جيناعىنىڭ ءبىر بولىگىن تۇرعىن ءۇي جاعدايىن جاقسارتۋ نەمەسە ەمدەلۋگە اقى تولەۋ سياقتى الەۋمەتتىك ماقساتتارعا جۇمساۋ قۇقىعى بەرىلگەنى بەلگىلى. وسى ورايدا اتالعان قۇقىقتى قانداي ساناتتاعى ازاماتتار پايدالانا الاتىنىنا توقتالىپ وتەيىك. بىرىنشىدەن, بۇل – بجزق-دا زەينەتاقى جيناعى بار جۇمىس ىستەيتىن ازاماتتار. ولار «تومەنگى جەتكىلىكتىلىك شەگىنەن» اساتىن سومانىڭ ءبىر بولىگىن پايدالانا الادى. ەكىنشىسى – زەينەتاقىسى جوعالعان تابىس سوماسىنىڭ (بۇرىن العان جالاقىسىنىڭ) كەمىندە 40%-ىن قۇرايتىن زەينەتكەرلەر. ولار بجزق-دا قالعان زەينەتاقى جيناقتارى سوماسىنىڭ 50%-ىنا دەيىن پايدالانا الادى. ال ءۇشىنشىسى – وزىنە زەينەتاقى اننۋيتەتىن رەسىمدەگەن جانە ءالى دە جيناعى بار ازاماتتار. ولار بجزق-دا قالعان زەينەتاقى جيناقتارىنىڭ سوماسى شەگىندە پايدالانا الادى. بۇل نورما جۇمىس ىستەيتىن ازاماتتاردى دا, زەينەتكەرلەردى دە قامتيدى.
سونىمەن قاتار الەۋمەتتىك كودەكس اياسىندا 2023 جىلدىڭ 1 شىلدەسىنەن باستاپ بجزق سالىمشىلارىنا زەينەتاقى جيناعى سوماسىنىڭ 50%-ىنا دەيىن ءوزىنىڭ دەربەس تاڭداۋى بويىنشا جەكە باسقارۋشى ينۆەستيتسيالىق كومپانيالارعا بەرۋ قۇقىعى بەرىلەدى. بۇل ازاماتتارعا زەينەتاقى اكتيۆتەرىن باسقارۋعا قاتىسۋعا, وزدەرىنىڭ زەينەتاقى جوسپارىن قۇرۋعا, جيناقتارىن ينۆەستيتسيالاۋدىڭ بالاما ساياساتىن تاڭداۋعا مۇمكىندىك بەرەدى.
جيناقتاردى جەكە باسقارۋعا بەرۋ كەزىندە ءارتۇرلى ينۆەستيتسيالىق ستراتەگيالاردى پايدالانۋ سالىمشىلاردىڭ تاۋەكەلدەرىن ارتاراپتاندىرۋعا, نەعۇرلىم جوعارى ينۆەستيتسيالىق تابىس الۋعا جانە تيىسىنشە زەينەتاقى جيناقتارىنىڭ ۇلعايۋىنا ىقپال ەتەدى. سالىمشى زەينەتاقى جيناقتارىن جەكە باسقارۋشى كومپانياعا اۋدارعان كەزدە ونىڭ جيناقتارىن باسقا باسقارۋشى كومپانياعا اۋدارۋ نەمەسە ۇلتتىق بانكتىڭ, ياعني بجزق-نىڭ باسقارۋىنا قايتارۋ قۇقىعى ساقتالادى.
مەملەكەت ۇلتتىق بانكتىڭ باسقارۋىنداعى, ياعني بجزق-داعى جيناقتار بويىنشا عانا زەينەتاقى جيناقتارىنىڭ ساقتالۋىنا كەپىلدىك بەرەدى. ينۆەستيتسيالىق پورتفەلدى باسقارۋشىنىڭ (يپب) باسقارۋىنا بەرىلەتىن زەينەتاقى جيناقتارىنىڭ ساقتالۋىنا سالىمشى تاڭداعان يپب جاۋاپتى بولادى. جىل قورىتىندىسى بويىنشا يپب العان نومينالدى تابىس پەن زەينەتاقى اكتيۆتەرى تابىستىلىعىنىڭ ەڭ تومەنگى ءمانى اراسىنداعى تەرىس ايىرما تۋىنداعان جاعدايدا وسى باسقارۋشى كومپانيا اتالعان ايىرمانى سالىمشىعا ءوز قاراجاتى ەسەبىنەن وتەۋگە مىندەتتى.
وسى ورايدا زەينەتاقى جيناقتارىن سەنىمگەرلىك باسقارۋعا بەرۋ ءۇشىن سالىمشىلاردىڭ بجزق-عا جۇگىنۋى قاجەت ەكەنىن اتاپ ءوتۋ كەرەك.
