كورمەدە گوبەلەندەر, ساندىك كارتينالار, ابستراكتىلى كومپوزيتسيالار, ناتيۋرمورتتار مەن پەيزاجدار ۇسىنىلعان. كۇردەلى توقۋ تەحنيكاسىمەن تولعاعان الۋان تاقىرىپتاعى تۋىندىلار زاۋرەنىڭ گوبەلەن ونەرىندە وزىندىك ءستيلى بار سۋرەتشى ەكەنىن بايقاتادى. سۋرەتشى شىعارماشىلىعىندا شەڭبەر, سپيرال, ايقىش, تىرشىلىك اعاشى سەكىلدى پىشىندەردى پايدالانا وتىرىپ, كوشپەلىلەر ءۇشىن قاستەرلى سانالاتىن «جەرۇيىق» ارقىلى ۇلى دالا داستۇرىنە دەگەن ادال سەزىمىن بىلدىرەدى. «دالا پاتشايىمى», «قۇدايلاردىڭ كۇيرەۋى», «قالىڭدىق» اتتى گوبەلەندەردىڭ كوركەمدىك ءمان-ماتىنىندەگى ستيلدەنگەن سيمۆولدىق بەلگىلەر مەن ويۋ-ورنەكتەر ءداستۇر ساباقتاستىعى مەن ۇرپاقتار بايلانىسىن كورسەتەدى.
سۋرەتشى زاماناۋي ستيلدە بىرەگەي تۋىندىلار جاسايدى. بۇل تۋىندىلاردان تامىلجىعان تابيعاتتىڭ سۇلۋ كەلبەتى, كەشكى قالانىڭ سايابىر تاپقان تىنىسى, تەاتر ءومىرىنىڭ مەرەكەلىك شادىمان تىرشىلىگى كورىنەدى. بوياۋدىڭ قانىقتىعى مەن تۇستەردىڭ ۇيلەسىمى جاپ-جارىق الەمگە قاراي جەتەلەي جونەلەدى. ازيالىق مادەنيەتتىڭ شىنايى كورىنىسىن ءدال بەينەلەگەن «جىلتىلداعان جۇلدىزدار», «قالا شامدارى», «شىلدە شۋاعى», «اق جانە قارا» ابستراكتىلى كومپوزيتسيالارى بارىنشا ىقشامدالعان كوركەم تۇيىنمەن, كەرەعار تۇستەرمەن ەرەكشەلەنەدى. ادامنىڭ بيلەپ تۇرعان بەينەسىنە ۇقساس ىرعاقتى يىلگەن سىزىقتار اقشىل سارى, بوزعىلت ءتۇستىڭ اياسىندا ايقىن كورىنىس تاۋىپ, «كۇللى دۇنيە اسەمدىك الەمىندە تەربەلىپ تۇرسا» دەگەن ويدى تۇسپالدايدى.
كورمەدە زاۋرە سماعۇلوۆانىڭ كوگىلدىر, كوك, اقىق, كۇمىس-سۇر, ءزۇبارجات ءتۇستى رەڭكتەردى باستى باعدار ەتە وتىرىپ, باسقا دا بوياۋلار گامماسىن شەبەر ۇيلەستىرگەن ساندىك كارتينالارى ۇسىنىلعان. شىعىس ويۋ-ورنەگىمەن كومكەرىلگەن كەنەپتەردە سيمۆولدىق كەيىپكەرلەر, قۇمىرالار, تابيعات اسەمدىگى سۋرەتشىنىڭ وزىنە عانا ءتان ناقىشىمەن بيىك دەڭگەيدە بەينەلەنگەن. شىعارماشىلىق جاڭالىعى مول مازمۇندى كورمەنى تاماشالاعاندار سۋرەت شەبەرىنىڭ سۇلۋ الەمىنەن وزگەشە اسەر الارى حاق.
الماتى
