«سوڭعى ۋاقىتتا بالالارعا قاتىستى جازاتايىم وقيعالار مەن فيزيكالىق زورلىق-زومبىلىق قولدانۋ فاكتىلەرى جيىلەپ كەتتى, بۇعان باق پەن الەۋمەتتىك جەلىلەردەگى جاريالانىمدار, سونداي-اق ۋاكىلدىڭ اتىنا كەلىپ تۇسكەن ازاماتتاردىڭ شاعىمدارى دالەل بولا الادى. وسىعان بايلانىستى ءبىز ارنايى كەڭەس وتكىزەمىز, وندا جەكە بالاباقشالاردىڭ مەڭگەرۋشىلەرى بۇلدىرشىندەردىڭ قاۋىپسىزدىگىن قامتاماسىز ەتۋ ءۇشىن قانداي ماسەلەلەرگە نازار اۋدارۋ كەرەكتىگى تۋرالى اقپارات الادى», دەدى استانا قالاسى بويىنشا بالا قۇقىقتارى جونىندەگى ۋاكىل اسيما بيمەندينا.
جەدەل ۋاكىل مەكتەپكە دەيىنگى مەكەمەلەردە قاۋىپسىزدىكتى قامتاماسىز ەتۋ ماسەلەسىندە ساۋاتتى قارىم-قاتىناس ورناتىپ, ورىنسىز جاعدايلاردى ۋاقىتىلى انىقتاۋ ماڭىزدى ەكەنىن ايتتى.
«بۋللينگ كەزىندە جەدەل ارەكەت ەتۋ ەرەجەلەرى, ءبىلىم بەرۋ ۇيىمدارىنداعى پسيحولوگيالىق قىزمەت ەرەجەلەرى, قاتىگەزدىك پەن زورلىق-زومبىلىق كەزىندە جەدەل ارەكەت ەتۋ الگوريتمى بويىنشا قۇجاتتار بار. بۇل نۇسقاۋلىقتاردى تاربيەشىلەر دە, اتا-انالار دا تولىقتاي ءبىلۋى كەرەك. بۇل كەز كەلگەن ادام جازاتايىم وقيعالاردىڭ الدىن الۋ ءۇشىن جاساۋى ءتيىس العاشقى قادام», دەدى اسيما بيمەندينا.
كەزدەسۋدە استانا پد يۋۆەنالدى پوليتسيا ءبولىمىنىڭ باسشىسى نەلليا دوششانوۆا بالالاردى مەكتەپكە دەيىنگى مەكەمەلەردە دۇرىس ۇستاۋ بويىنشا پراكتيكالىق ۇسىنىستارىمەن ءبولىستى.
«ەڭ الدىمەن, كادرلاردى ىرىكتەۋگە بارىنشا مۇقيات قاراۋ كەرەك. ءوتىنىش بەرۋشىنىڭ جازباسىن عانا ەمەس, ونىڭ قازىرگى پسيحولوگيالىق جاعدايى مەن وتباسىنداعى حال-احۋالدى دا ەسكەرۋ قاجەت. تاربيەشىلەردىڭ جۇمىسىن ساپالى باقىلاۋ ءۇشىن بالاباقشا باسشىلارى بەينەباقىلاۋ كامەرالارىن جەكە قاراۋى قاجەت. ءىستى جاسىرىپ قالۋ نەمەسە ۋاقىتىلى جەتكىزبەۋ فاكتىلەرى بولماس ءۇشىن بۇل جۇمىستى ورىنباسارلارعا نەمەسە تاربيەشىلەردىڭ ەشقايسىسىنا تاپسىرۋعا بولمايدى. سونىمەن قاتار, قىزمەتكەرلەردىڭ ورىنسىز مىنەز-قۇلقىن ۋاقىتىلى انىقتاۋ ءۇشىن كامەرالاردى تەك شاعىم بولعان كەزدە عانا ەمەس, ۇنەمى قاراپ وتىرۋ قاجەت.
بالالاردىڭ ەموتسيونالدى جانە فيزيكالىق دەنساۋلىعىن مۇقيات باقىلاۋ كەرەك. بالاعا ىقتيمال قاتىگەزدىك تۋرالى كەز-كەلگەن جاعدايعا جەتە ءمان بەرۋ قاجەت. زورلىق-زومبىلىق فاكتىسى تۋرالى حابارلاۋ - تەك ازاماتتىق ۇستانىمنىڭ كورىنىسى عانا ەمەس, كاسىبي جاۋاپكەرشىلىك. دورەكى جايت انىقتالعان جاعدايدا مەكتەپكە دەيىنگى مەكەمە باسشىسىنىڭ حابارلاماۋى اكىمشىلىك قۇقىق بۇزۋشىلىق بولىپ سانالادى», دەپ ەسكەرتتى نەلليا دوششانوۆا.
بۇگىنگى تاڭدا استانادا 67 730 بالا باراتىن 507 مەكتەپكە دەيىنگى ءبىلىم بەرۋ ۇيىمى جۇمىس ىستەيدى. سونىمەن قاتار, قالادا مەكتەپ جاسىنا دەيىنگى بالالارعا قاتىستى قاتىگەزدىك فاكتىسى بويىنشا 8 قىلمىستىق ءىس تىركەلگەن.
