بالتىق جاعالاۋى وكىلدەرىنىڭ بۇل دوداداعى تابىسى كەزدەيسوق ەمەس. الەم چەمپيوناتتارىنىڭ تاريحىنا كوز جۇگىرتەر بولساق, كەيىنگى 10 جىلدا لاتۆيا قۇراماسى ەليتالى كەزەڭدە تۇراقتى ونەر كورسەتىپ كەلەدى. ال تۇراقتىلىق قاشاندا ناتيجە بەرەتىنى بەلگىلى. لاتۆيالىقتار وسىدان بەس جىل بۇرىن دا دانياداعى الەم چەمپيوناتىنىڭ پلەي-وفف كەزەڭىنە شىعىپ, تەك شيرەك فينالدا شۆەتسيادان جەڭىلىپ قالعان-دى. ارادا بەس جىل وتكەندە جەرەبە شۆەتسيا مەن لاتۆيا حوككەيشىلەرىن تاعى دا شيرەك فينالدا كەزدەستىرىپ, بۇل جولى لاتۆيا قۇراماسى ەسە قايتاردى.
توپتىق كەزەڭدە قازاقستانمەن بىرگە ۆ توبىندا باق سىناعان لاتۆيا قۇراماسى جوسپارلانعان جەتى ويىننىڭ بەسەۋىندە جەڭىس تۋىن جەلبىرەتىپ, ءۇشىنشى ورىنمەن چەمپيوناتتىڭ پلەي-وفف كەزەڭىنە جولداما الدى. العاشقى ەكى تۋردا ولار بولاشاق الەم چەمپيونى كانادا (6:0) جانە سلوۆاكياعا (2:1) جول بەرسە, كەيىنگى بەس ماتچتا چەحيا (4:3), نورۆەگيا (2:1), سلوۆەنيا (3:2), قازاقستان (7:0) جانە شۆەيتساريانى (4:3) قاپى قالدىردى. ال شيرەك فينالدا شۆەتسيانى 3:1 ەسەبىمەن سۇرىندىرسە, جارتىلاي فينالدا تاعى دا كانادا قۇراماسىنا جول بەرىپ (4:2), ءۇشىنشى ورىن ءۇشىن ويناۋ مۇمكىندىگىنە يە بولدى.
قولا جۇلدە ءۇشىن بولعان ماتچتا لاتۆيا ويىنشىلارى مۇزايدىندا ءبىر ساتكە دە ايانىپ قالعان جوق. ناتيجەسىندە, مۇحيتتىڭ ارعى بەتىنەن كەلگەن قۇرامانى وۆەرتايمدا جەڭىپ (4:3), تۇڭعىش رەت الەم چەمپيوناتىنىڭ قولا جۇلدەسىن يەلەندى.
جارتىلاي فينالدا اقش-تان باسىم ءتۇسىپ, ءوز تاريحىندا ءۇشىنشى مارتە فينالعا شىققان گەرمانيا قۇراماسى بۇل جولى دا باس جۇلدەگە ءبىر قادام قالعاندا ءسۇرىندى. نەمىستەر 1930 جىلعى العاشقى فينالىندا كاناداعا جول بەرگەن بولسا, 1953 جىلعى باسەكەدە شۆەتسيادان ايلاسىن اسىرا المادى. ال ءۇشىنشى مۇمكىندىگىندە تاعى دا كانادا قۇراماسىنىڭ مىقتىلىعىن مويىنداۋعا ءماجبۇر بولدى. ال 1920 جىلدان بەرى وتكىزىلىپ كەلە جاتقان الەم چەمپيوناتىندا كانادا حوككەيشىلەرى وسىمەن 28-مارتە جەڭىس تۇعىرىنان كورىنىپ, جەڭىسكە جەتۋ جاعىنان الەم بىرىنشىلىگىنىڭ رەكوردىن ورناتتى. سونىمەن قاتار كانادالىقتار 16 مارتە كۇمىس جۇلدەگەر اتانسا, 9 رەت قولا جۇلدەنى قانجىعالارىنا بايلاعانىن ايتا كەتكەن ءجون.
ەندى شايبالى حوككەيدەن كەلەسى جىلعى الەم چەمپيوناتى 10-26 مامىر ارالىعىندا چەحيانىڭ پراگا جانە وستروۆا قالالارىندا وتەدى. عالىم مامبەتاليەۆ جەتەكشىلىك ەتەتىن قازاقستان قۇراماسى بيىلعى بىرىنشىلىكتە ۆ توبىندا – التىنشى, ال جالپىكوماندالىق ەسەپتە 11-ورىندى يەلەنىپ, كەلەسى جىلى دا ەليتالى كەزەڭدە ويناۋ مۇمكىندىگىن ساقتاپ قالدى.
سونىمەن قاتار فينليانديا مەن لاتۆياداعى الەم چەمپيوناتىنىڭ اياسىندا حالىقارالىق شايبالى حوككەي فەدەراتسياسىنىڭ كەزەكتى جيىنى ءوتىپ, 2027 جىلعى چەمپيوناتتى قابىلدايتىن ەلدى انىقتادى. ءتورت جىلدان كەيىنگى دودانى وتكىزۋگە قازاقستان مەن گەرمانيا قاتار تالاسىپ, داۋىس بەرۋ ناتيجەسىندە كوپشىلىك قولداۋىنا يە بولعان گەرمانيا جەڭىسكە جەتتى. ءسويتىپ, 2027 جىلعى بىرىنشىلىك گەرمانيادا ۇيىمداستىرىلاتىن بولدى.
