كەشە الەم بىرىنشىلىگىنىڭ توپتىق كەزەڭدەگى ويىندارى ءوز مارەسىنە جەتىپ, ءتۋرنيردىڭ پلەي-وفف كەزەڭىنە شىققان جانە ءبىرىنشى ديۆيزيونعا ءتۇسىپ قالعان قۇرامالار بەلگىلى بولدى. جەر-جاھاننىڭ ەڭ ۇزدىك 16 قۇراماسى جينالعان دۇنيەجۇزىلىك دودادا جەرلەستەرىمىز جەتى ويىننىڭ ۇشەۋىندە جەڭىسكە جەتىپ, قاتارىنان ءتورتىنشى جىل جوعارى توپتا ويناۋ مۇمكىندىگىن ساقتاپ قالدى. بۇعان دەيىن ءبىزدىڭ جىگىتتەر تەك 2004 (كانادا) جانە 2005 (چەحيا) جىلدارى ۇيىمداستىرىلعان الەم چەمپيوناتتارىندا قاتارىنان ەكى جىل تۇراقتى ونەر كورسەتكەن بولاتىن. سونىمەن قاتار وتانداستارىمىز 1998, 2004, 2005, 2006, 2010, 2012, 2014, 2016, 2021 جانە 2022 جىلدارى دا جوعارى توپتا جۇلدەلەرگە تالاسىپ كورگەن-ءدى. بىراق ازىرگە جەرلەستەرىمىز بۇل مەجەنى باعىندىرا الماي كەلەدى. قازاقستان قۇراماسىنىڭ 1998 جىلدان بەرگى الەم چەمپيوناتتارىنداعى ەڭ ۇزدىك ناتيجەسى – 5-ورىن. بۇل جەتىستىككە وتانداستارىمىز 2021 جىلى ريگاداعى دودادا قول جەتكىزگەن ەدى.
بيىلعى الەم چەمپيوناتىندا قازاقستان قۇراماسى ءار جىلدارى «قازاقىلاندىرىلعان» كانادالىق, امەريكالىق جانە رەسەيلىك لەگيونەرلەردىڭ كومەگىنەن باس تارتىپ, تەك قانا جەرگىلىكتى حوككەيشىلەرگە سەنىم ارتتى. وتاندىق حوككەيشىلەردەن جاساقتالعان ۇلتتىق قۇراما ريگا تورىندەگى ويىنداردا ءساتتى ونەر كورسەتىپ, جانكۇيەرلەردىڭ سەنىمىن اقتاي ءبىلدى.
جەرلەستەرىمىز الەم بىرىنشىلىگىنىڭ تۇساۋكەسەر باسەكەسىندە نورۆەگيا قۇراماسىن بۋلليت سەرياسىندا جەڭىپ, چەمپيوناتتى جاپ-جاقسى باستاعانىمەن, كەيىنگى ءۇش ويىندا چەحيا (5:1), شۆەيتساريا (5:0) جانە كانادا (5:1) حوككەيشىلەرىنىڭ الدىندا دارمەنسىزدىك تانىتىپ, جەڭىلىپ قالدى. ال بەسىنشى تۋردا سلوۆاكيا قۇراماسىن بۋلليتتە 4:3 ەسەبىمەن تىزە بۇكتىرىپ, التىنشى تۋردا لاتۆياعا ەسە جىبەردى – 7:0. توپتىق كەزەڭنىڭ سوڭعى تۋرىندا سلوۆەنيا حوككەيشىلەرىمەن شەبەرلىك بايقاسىپ, تاماشا كامبەك جاسادى – 4:3. وسىلايشا, قازاقستان ۇلتتىق قۇراماسى الەم چەمپيوناتىنداعى جەتى ويىننىڭ ۇشەۋىندە جەڭىسكە جەتىپ, ءۇش رەتىندە دە قارسىلاستارىن بىردەي ەسەپپەن قاپى قالدىردى.
توپتىق كەزەڭنىڭ ويىندارى مارەسىنە جەتكەن سوڭ ۇلتتىق قۇرامانىڭ باس باپكەرى عالىم مامبەتاليەۆ الەم چەمپيوناتىن قورىتىندىلاپ, بىرىنشىلىك تۋرالى ءوز ويىن ورتاعا سالدى. ء«ار جەڭىلىستەن كەيىن قاتەلىكتەرىمىزدەن ساباق الىپ, ويىنىمىزدى جاقسارتىپ وتىرۋعا تىرىستىق. ءبىرىنشى كەزدەسۋدە جەڭىسكە جەتىپ, كەيىنگى ماتچتاردا قارسىلاستارىمىزعا جول بەرىپ قويعانىمىز وتە وكىنىشتى. بىراق ويىندى كورگەن جانكۇيەرلەر سول باسەكەلەردە جىگىتتەرىمىزدىڭ جەڭىسكە دەگەن جىگەرىن انىق بايقاعان بولۋى كەرەك. وزدەرىڭىز بىلەسىزدەر, ءبىز بۇل چەمپيوناتتا تەك ءوزىمىزدىڭ جەرگىلىكتى حوككەيشىلەرىمىزبەن عانا ويناپ شىقتىق. كوپ ويىنشىمىز ءبىرىنشى رەت الەم چەمپيوناتىنا قاتىسقان سوڭ ازداعان قوبالجۋ بولدى. سونداي-اق ءبىرازىنا حالىقارالىق ويىندارداعى تاجىريبە جەتىسپەدى. دەسە دە جىگىتتەر از ۋاقىتتىڭ ىشىندە جاقسى ۇجىم قالىپتاستىرىپ, مۇزايدىندا ءبىر-ءبىرى ءۇشىن, قازاقستان ءۇشىن جانىن بەرىپ وينادى», دەدى ع.مامبەتاليەۆ.
توپتىق كەزەڭدەگى وزگە دە ويىندارعا توقتالار بولساق, «ۆ» توبىندا شۆەيتساريا, چەحيا جانە كانادا قۇرامالارى سوڭعى تۋر ويىندارىنىڭ ناتيجەسىنە قاراماي-اق, ءتۋرنيردىڭ پلەي-وفف كەزەڭىنە جولداما الدى. ال ءتورتىنشى جولدامانى جارىس قوجايىنى لاتۆيا مەن سلوۆاكيا قۇرامالارى ساراپقا سالدى. كەشە لاتۆيا تۋرنير كەستەسىنىڭ كوشباسشىسى شۆەيتساريا قۇراماسىمەن, سلوۆاكيا نورۆەگيا حوككەيشىلەرىمەن كەزدەستى.
«ا» توبىنان اقش, شۆەتسيا جانە بىلتىرعى جەڭىمپاز – فينليانديا حوككەيشىلەرى مەرزىمىنەن بۇرىن پلەي-وفف جولداماسىن يەلەندى. بۇل توپتىڭ سوڭعى جولداماسىنا كەشە گەرمانيا مەن دانيا حوككەيشىلەرى تالاس جۇرگىزدى. پحەنچحان وليمپياداسىنىڭ كۇمىس جۇلدەگەرى اتانعان گەرمانيا سوڭعى تۋردا فرانتسيامەن شەبەرلىك بايقاسسا, دانيا حوككەيشىلەرى فينليانديادان ۇپاي الۋعا تىرىسىپ كوردى. ال العاشقى ويىنىندا فرانتسيانى وۆەرتايمدا تىزە بۇكتىرىپ, كەيىن تاعى ءبىر ۇپاي ولجالاعان ماجارستان ءبىرىنشى ديۆيزيونعا ءتۇسىپ قالدى.
شايبالى حوككەيدەن 2024 جىلعى الەم چەمپيوناتى 10-26 مامىر ارالىعىندا چەحيانىڭ پراگا جانە وستروۆا قالالارىندا وتەدى.
