ارنا ديرەكتورى ەركەجان كۇنتۋعاننىڭ سوزىنشە, ازەربايجان اۋديوۆيزۋال كەڭەسىنىڭ قولداۋىمەن 15 مامىردان باستاپ «Silk Way» تەلەارناسى «K@TV1», «BAKTELECOM», «AZTELEKOM», «BİRLİK», «AZOL TV», «AZEUROTEL», «AZERİ TV», «BOSS GROUP», «GSP», «EUROSEL», «RAHAT TELECOM», «BEEONLİNE», «MEGALINK TV», «ODTV» ابونەنتتەرى ءۇشىن قولجەتىمدى.
بۇعان دەيىن تەلەارنا سىناق رەجيمىندە حابار تاراتتى, وپەراتورلار تەحنيكالىق پارامەترلەرىن تەكسەرىپ, Silk Way-ءدى ءوز جەلىلەرىنە قوسۋعا دايىندالدى.
باسقا ەلدەردەگىدەي ازەربايجاندىق تەلەكورەرمەن كوپ ارنالى فورماتتا ۇسىنىلاتىن ورىس, اعىلشىن, قازاق, قىرعىز جانە وزبەك تىلدەرىنىڭ ءبىرىن تاڭداي الادى. «Silk Way» سيگنالى دا Eutelsat Hot Bird 13 جانە Yamal 401 سپۋتنيكتىك پلاتفورمالارىنان جەكە قابىلداۋ ءۇشىن قولجەتىمدى.
ەكى ەل مەدياسىنىڭ بەلسەندى ىقپالداستىعىنا بيىل ساۋىردە ازەربايجان پرەزيدەنتىنىڭ قازاقستانعا رەسمي ساپارى جاڭا سەرپىن بەردى. مەملەكەت باسشىلارى قاسىم-جومارت توقاەۆ پەن يلحام اليەۆ ەكى ەل حالقىنىڭ بايلانىسىن نىعايتۋداعى قازاقستاندىق جانە ازەربايجاندىق باق-تىڭ ماڭىزىن اتاپ ءوتىپ, اقپارات قۇرالدارى مەن مەديا-ءوندىرىس سالاسىنداعى سەرىكتەستىكتى دامىتۋدى تاپسىردى.
قازاقستان مەن ازەربايجان بۇقارالىق اقپارات قۇرالدارىنىڭ تاجىريبە, كونتەنت الماسۋ جانە ونى بىرىگىپ دايىنداۋ كەزىندەگى ءوزارا ىقپالداستىعى ەكى ەلدىڭ قارىم-قاتىناسىن ودان ءارى نىعايتۋعا سەپتىگىن تيگىزەدى.
«Silk Way» تەلەارناسى ازەربايجاندىق كورەرمەنگە وتاندىق اۆتورلىق باعدارلامالار, دەرەكتى جوبالار, سونداي-اق ەڭ ۇزدىك كوركەم كونتەنتتى ۇسىنادى.
Silk Way تەلەارناسى – قازاقستان رەسپۋبليكاسىنداعى جالعىز حالىقارالىق تەلەارنا. ول الەمنىڭ 118-دەن استام ەلىندە كوپ ارنالى رەجيمدە قازاق, ورىس, اعىلشىن, قىرعىز جانە وزبەك تىلىندە حابار تاراتادى.
