– وسى جىلدان باستاپ بارلىق تالاپكەرگە ۇلتتىق بىرىڭعاي تەستىلەۋدەن وتۋگە بايلانىستى ەرەكشە مۇمكىندىك بەرىپ وتىرمىز. ەندى نەگىزگى ۇبت-نى ەكى رەت تاپسىرىپ, ەڭ جاقسى ناتيجەمەن گرانت كونكۋرسىنا قاتىسۋعا مۇمكىندىك بار. ءبىز كەدەرگىسىز ءبىلىم بەرۋگە نيەتتىمىز. تالاپكەرلەردىڭ ساپالى ءبىلىم الىپ, ءوز الەۋەتىن تولىق اشۋ ءۇشىن مۇمكىندىك جاسايمىز, – دەدى استانا قالاسىندا ورنالاسقان تەستىلەۋ ورتالىعىنا بارىپ, ۇبت-نىڭ ءوتۋ بارىسىمەن تانىسقان عىلىم جانە جوعارى ءبىلىم ءمينيسترى ساياسات نۇربەك.
ەسكە سالا كەتەيىك, تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە ورنىن وزدەرى تاڭدادى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناتسياسىن بەلگىلەدى. كومبيناتسيالارعا كەلەتىن بولساق, قازىرگى تاڭدا تالاپكەرلەردىڭ 18 پايىزى – «ماتەماتيكا-فيزيكا», 17 پايىزى – «بيولوگيا-حيميا», 13 پايىزى – «شىعارماشىلىق», 10 پايىزى «ماتەماتيكا-ينفورماتيكا» پاندەرىن تاڭداعان.
تەستىلەۋ فورماتىندا وزگەرىس جوق. پاندەر سانى وزگەرىسسىز قالادى, ياعني ءۇش مىندەتتى جانە ەكى بەيىندىك ءپان, بارلىعى 120 تەست تاپسىرماسى. الايدا «قازاقستان تاريحى» جانە «وقۋ ساۋاتتىلىعى» پاندەرى بويىنشا تەست تاپسىرمالارىنىڭ سانىنا وزگەرىستەر ەنگىزىلدى. ەندى «قازاقستان تاريحىنىڭ» ءبىر نۇسقاسىندا 20 تەست تاپسىرماسى بولادى: 1-دەن 10-عا دەيىن – ءبىر دۇرىس جاۋاپتى تاڭداۋعا ارنالعان; 11-دەن 20-عا دەيىن – كونتەكستكە نەگىزدەلگەن ءبىر دۇرىس جاۋاپتى تاڭداۋعا ارنالعان تەست تاپسىرمالارى (5 سۇراقتان 2 كونتەكستىك ءماتىن). سونداي-اق بۇعان دەيىن تالاپكەرلەرگە وقۋ ساۋاتتىلىعىنان 20 تەست تاپسىرماسى بەرىلسە, ەندى 3 ءماتىن بويىنشا 15 تەست سۇراعى ۇسىنىلادى.
وسىلايشا, قازاقستان تاريحى – 20, وقۋ ساۋاتتىلىعى – 15, ماتەماتيكالىق ساۋاتتىلىق – 15 جانە ەكى بەيىندىك ءپان بويىنشا 35 تەست تاپسىرماسى ۇسىنىلادى. ەڭ جوعارى ۇپاي – 140. تەستىلەۋدىڭ جالپى ۋاقىتى – 4 ساعات (240 مينۋت). سونىمەن قاتار ەرەكشە ءبىلىم بەرۋ قاجەتتىلىكتەرى بار بالالارعا قوسىمشا 40 مينۋت قوسىلادى.
ۇبت تاپسىرمالارىنىڭ قۇرىلىمىندا وزگەرىستەر بار. جاۋاپتى مينيسترلىك تەست تاپسىرمالارىنداعى ديستراكتورلار سانىن (جاۋاپ نۇسقالارى) قىسقارتۋ تۋرالى شەشىم قابىلدادى. ءبىر دۇرىس جاۋابى بار تەست تاپسىرمالارىندا نۇسقالار سانى 5-تەن 4-كە دەيىن, ءبىر نەمەسە بىرنەشە دۇرىس جاۋابى بار تەست تاپسىرمالارىندا ء(ۇش دۇرىس جاۋاپتان كوپ ەمەس) نۇسقالار سانى 8-دەن 6-عا دەيىن ازايدى.
2022-2023 وقۋ جىلىنان باستاپ «ينفورماتيكا» ءپانى ۇبت-نىڭ بەيىندىك پاندەر كومبيناتسياسىنىڭ تىزىمىنە ەنگىزىلدى. وسىعان بايلانىستى «ينفورماتيكا مۇعالىمدەرىن دايارلاۋ», «اقپاراتتىق تەحنولوگيالار», «اقپاراتتىق قاۋىپسىزدىك» ءبىلىم بەرۋ باعدارلامالارىنىڭ توپتارىنا تۇسۋشىلەر «ماتەماتيكا-ينفورماتيكا» كومبيناتسياسى بويىنشا ۇبت تاپسىرادى.
– اكادەميالىق ادالدىقتى قامتاماسىز ەتۋ ماقساتىندا «1 كومپيۋتەر – 2 كامەرا – 1 تەستىلەنۋشى» قاعيداتى ساقتالادى. سونداي-اق وتكەن جىلدان باستاپ تەست نۇسقالارى تاڭبالانعانىن اتاپ وتكەن ءجون. ياعني ۇبت-عا قاتىسۋشىلاردىڭ ارقايسىسىنىڭ جەكە تەست نۇسقاسى بولادى. سونىمەن قاتار كالكۋلياتور مەن مەندەلەەۆ كەستەسى كومپيۋتەر ەكرانىندا كورسەتىلەدى. تالاپكەرلەردىڭ پىكىرى مەن قالاۋىن ەسكەرە وتىرىپ, نەگىزگى ۇبت-دا ولارعا مەندەلەەۆ جانە تۇزداردىڭ ەرىگىشتىك كەستەسىنىڭ قاعاز نۇسقاسى بەرىلەدى. تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. سەرتيفيكات اپەللياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى, – دەپ ناقتىلادى مينيستر.
شەكتى ۇپاي وزگەرگەن جوق: «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 ۇپاي, «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» كەمىندە 70 ۇپاي, «اۋىل شارۋاشىلىعى جانە بيورەسۋرستار», «ۆەتەريناريا» كەمىندە 60 ۇپاي, ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 ۇپاي, باسقا جوعارى وقۋ ورىندارىنا كەمىندە 50 ۇپاي جيناۋ كەرەك.
تەستىلەۋگە كىرگىزۋ كەزىندە مەتالل ىزدەگىشتەر پايدالانىلادى. بۇل تالاپكەرلەردىڭ قاۋىپسىزدىگىن قامتاماسىز ەتىپ, ەرەجەلەردى بۇزۋ مەن تىيىم سالىنعان زاتتاردى (ۇيالى تەلەفون, شپارگالكا جانە ت.ب.) ىشكە كىرگىزبەۋ ءۇشىن قاجەت.
تەستىلەۋ بارىسىندا اۋديتوريانىڭ (كومپيۋتەرلىك سىنىپتىڭ) جانە بەينەباقىلاۋدىڭ اۋدانىنا بايلانىستى رۇقسات ەتىلگەن ماگنيتتىك تولقىندار شەگىندە ۇتقىر جانە راديوەلەكتروندىق بايلانىس سيگنالدارىن «تۇنشىقتىراتىن» قۇرىلعىلار قولدانىلادى.
2023 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا تالاپكەردىڭ ۇبت ناتيجەسى جويىلادى.
ۇلتتىق تەستىلەۋ ورتالىعىنىڭ باسشىسى رۋسلان ەمەلباەۆ اتاپ وتكەندەي, 2023 جىلعى تالاپكەرلەر ۇبت-نى بەس رەت تاپسىرۋ قۇقىعىنا يە. سىناقتار قاڭتار, ناۋرىز, مامىر-ماۋسىم جانە تامىز ايلارىندا وتەدى. بۇرىن سىناق ءبىر كۇندە وتەتىن, تيىسىنشە دۇربەلەڭ دە كوپ ەدى. قازىر مۇنىڭ ءبارى ساپ تىيىلعان.
