«ەلوردا جاستارى» - قالا اكىمدىگى مەن وتباسى بانكتىڭ («بايتەرەك» حولدينگىنىڭ ەنشىلەس ۇيىمى) بىرلەسكەن جوباسى.
باعدارلاما جەڭىلدىكپەن نەسيە الۋعا مۇمكىندىك بەرەدى. وعان جاس مۇعالىمدەر, دارىگەرلەر, جۋرناليستەر, مادەنيەت سالاسىنىڭ قىزمەتكەرلەرى, سپورتشىلار, جوو ۇستازدارى مەن عىلىمي قىزمەتكەرلەر, الەۋمەتتىك سالا مەن كوممۋنالدىق قىزمەت قىزمەتكەرلەرى, پوليتسيا دەپارتامەنتى مەن توتەنشە جاعدايلار دەپارتامەنتى قىزمەتكەرلەرى, سونداي-اق استانا قالاسى بويىنشا تۇرعىن ءۇي كەزەگىندە تۇرعان جەتىم بالالار قاتىسا الادى.
قارىز الۋشىلاردىڭ جاسى 35-تەن اسپاۋى ءتيىس.
اتالعان باعدارلامانى جۇزەگە اسىرۋعا استانا قالاسى اكىمدىگى 1,5 ملرد تەڭگە, وتباسى بانك 1,5 ملرد تەڭگە بولىپ وتىر. بۇل قاراجاتقا 200-گە جۋىق تۇرعىن باسپانالى بولادى دەپ كۇتىلەدى.
الەۋەتتى قارىز الۋشىلاردىڭ ءتىزىمىن جەرگىلىكتى اتقارۋشى بيلىك قالىپتاستىرادى.
وتىنىشتەر qatysu.zhilfond.kz سايتىندا 2023 جىلدىڭ 30 مامىرى ساعات 9:00 باستاپ, 6 ماۋسىم ساعات 23:59 دەيىن قابىلدانادى. اۆتوريزاتسيادان ءوتۋ ءۇشىن ەلەكتروندى تسيفرلىق قولتاڭبا قاجەت.
وتىنىمدەردى قابىلداۋ مەرزىمى اياقتالعان سوڭ قاتىسۋشىلاردى ىرىكتەۋ باستالادى. ۇمىتكەرلەر پۋلى بالدىق جۇيە بويىنشا قالىپتاسادى, وندا - ەڭبەك ءوتىلى, ءوتىنىش بەرۋشىنىڭ 1, 2, 3-ءىنشى مۇگەدەكتىك توبىنا جاتاتىن-جاتپايتىنىن (ەرلى-زايىپتىنىڭ نەمەسە بالالارىنىڭ ءبىرى) ەسكەرىلەدى.
پۋل قۇرىلعاننان كەيىن ونىڭ قاتىسۋشىلارى وتباسى بانكىنەن نەسيە الۋعا جولداما الادى.
بانك باعدارلاما قاتىسۋشىسىنىڭ تولەم قابىلەتتىلىگىن تەكسەرىپ, جىلدىق 5 پايىزبەن (جتسم 5,2% باستاپ) جەڭىلدەتىلگەن نەسيە بەرەدى. العاشقى جارنا – 10%. ەلوردالىق جاس تۇرعىندارعا بەرىلەتىن نەسيەنىڭ ەڭ جوعارى سوماسى – 18 ملن تەڭگە, مەرزىمى – 25 جىلعا دەيىن. ونىڭ كومەگىمەن باستاپقى نەمەسە قايتالاما نارىقتان, سونداي-اق «قازاقستان تۇرعىن ءۇي كومپانياسى» اق-نىڭ كەپىلدەمەسىمەن ۇلەستىك قاتىسۋ شارتى بويىنشا سالىنىپ جاتقان ۇيدەن باسپانا ساتىپ الۋعا بولادى.
