وتكەن دەمالىس كۇندەرى عالىم مامبەتاليەۆ شاكىرتتەرى الەم چەمپيوناتىنىڭ توپتىق كەزەڭدەگى تاعى ەكى ويىنىن وتكىزدى. العاش «ريگا ارەنا» مۇز سارايىنداعى باسەكەدە سلوۆاكيا حوككەيشىلەرىن ماتچ سوڭىنداعى بۋلليت سەرياسىندا سۇرىندىرسە, كەيىننەن مۇزايدىن يەسى – لاتۆيادان جەڭىلدى.
سلوۆاكيامەن وتكەن كەزدەسۋدىڭ العاشقى بولىگىندە جەرلەستەرىمىز ءبىرىنشى بولىپ شايبا وتكىزىپ العانىمەن, ەكىنشى كەزەڭىندە قارسىلاستارىنىڭ قاقپاسىن ءۇش مارتە ءدال كوزدەدى. سلوۆاكيا قۇراماسى ساپىنان 14-مينۋتتا پاتريك كوح مەرگەندىك تانىتسا, ۇزىلىستەن كەيىن وتاندىق حوككەيشىلەردەن رومان ستارچەنكو (21-مينۋت), ۆالەري ورەحوۆ (24) جانە ەۆگەني رىمارەۆ (25) قارسىلاس قاقپاسىن ءدال كوزدەپ, تابلوداعى كورسەتكىشتى 3:1-گە جەتكىزدى.
ءۇشىنشى كەزەڭدە جەرلەستەرىمىز قارقىنىن باسەڭدەتىپ الدى. سونىڭ سالدارىنان سلوۆاكيالىق حوككەيشىلەر ۇرىمتال تۇستى ۇتىمدى پايدالانىپ, اندرەي شۋتوۆ قورعاعان قاقپادان ەكى مارتە ساڭىلاۋ تاۋىپ كەتتى. 48-مينۋتتا ريحارد پانيك ەسەپ ايىرماسىن قىسقارتسا, 56-مينۋتتا پاۆول رەگەندا تارازى باسىن تەڭەستىردى. وسىلايشا, كەزدەسۋدىڭ نەگىزگى كەزەڭى 3:3 ەسەبىمەن تەڭ اياقتالعان سوڭ, ويىن وۆەرتايمعا ۇلاستى. بىراق قوسىمشا ۋاقىتتا دا جەڭىمپاز انىقتالعان جوق. ال بۋلليتتە قازاقستان قۇراماسىنىڭ باعى جانىپ, الەم چەمپيوناتىنداعى ەكىنشى جەڭىسىنە قول جەتكىزدى. مۇنىڭ الدىندا جەرلەستەرىمىز نورۆەگيا حوككەيشىلەرىن دە ءدال وسىنداي ەسەپپەن بۋلليتتە تىزە بۇكتىرگەن ەدى.
التىنشى تۋرعا جوسپارلانعان جارىس قوجايىنى – لاتۆيامەن وتكەن ويىندا جەرلەستەرىمىز قارسىلاستارىنا ءىرى ەسەپپەن جول بەردى – 7:0. ايدىن يەلەرىنەن بۇل كەزدەسۋدە ريحارد بۋكارتس (16-مينۋتتا), وسكارس باتنيا (18), مارتينش دزيەركالس (22), رودريگو ابولس (30 جانە 52-مينۋتتا), ميكس يندراشيس (40) جانە كاسپارس داۋگاۆينش (50) مەرگەندىك تانىتىپ, جەرگىلىكتى جانكۇيەرلەردى شاتتىققا بولەدى.
الەم چەمپيوناتىنىڭ ستاتيستيكاسىنا كوز جۇگىرتەر بولساق, بۇل – ۆ توبىندا تىركەلگەن ەكىنشى ءىرى ەسەپ. بىرىنشىلىكتىڭ العاشقى تۋرىندا شۆەيتساريا قۇراماسى توپتىڭ اۋتسايدەرى سلوۆەنيا قۇراماسىن ءدال وسىنداي ەسەپپەن جەڭگەن بولاتىن. بۇل جەڭىلىستەن كەيىن قازاقستان قۇراماسى ءبىرجولا الەم چەمپيوناتىنىڭ پلەي-وفف كەزەڭىنەن كۇدەرىن ۇزگەنىمەن, جوعارى ديۆيزيونداعى ورنىن ساقتاپ قالۋعا تىرىسادى.
جەرلەستەرىمىز بۇگىنگە جوسپارلانعان توپتىق كەزەڭنىڭ سوڭعى ويىنىندا ازىرگە بىردە-ءبىر ويىندا جەڭىسكە جەتپەگەن سلوۆەنيا حوككەيشىلەرىمەن كەزدەسەدى. ەگەر سلوۆەنيا سلوۆاكيادان جەڭىلسە نەمەسە قازاقستان سلوۆاكيامەن ويىنىندا جەڭىسكە جەتسە, كەلەسى جىلى دا ەليتالى كەزەڭدە باق سىناۋ مۇمكىندىگىن ساقتاپ قالادى.
